ದೊಡ್ಡಬಳ್ಳಾಪುರ: ಸಾಕ್ಷರತಾ ಸಮಿತಿ ಜಿಲ್ಲಾ ಸಂಯೋಜಕಿ ಕಾಂತಮ್ಮ ಹಾಗೂ ತಾಲ್ಲೂಕಿನ ಹೊನ್ನಾವರ ಗ್ರಾ.ಪಂ. ಅಭಿವೃದ್ಧಿ ಅಧಿಕಾರಿ ಮಂಜುನಾಥ್ ಅವರ ವಿವಾಹ ಸೋಮವಾರ ನಗರದ ಸೋಮೇಶ್ವರ ದೇವಾಲಯದಲ್ಲಿ ವಿವಿಧ ದಲಿತ ಸಂಘಟನೆಗಳ ಮುಖಂಡರ ಸಮ್ಮುಖದಲ್ಲಿ ನಡೆಯಿತು.
ಆದರೆ ತಾಳಿ ಕಟ್ಟಿದ ನಂತರ `ಕಾಂತಮ್ಮ ಅವರನ್ನು ಹೆಂಡತಿಯಾಗಿ ಸ್ವೀಕರಿಸಲು ವರದಕ್ಷಿಣೆ ನೀಡಬೇಕು ಇಲ್ಲವಾದರೆ ಮನೆಗೆ ಕರೆದೊಯ್ಯುವುದಿಲ್ಲ~ ಎಂದು ಮಂಜುನಾಥ್ ಪಟ್ಟು ಹಿಡಿದ ಪರಿಣಾಮ ಆತನ ವಿರುದ್ಧ ದೂರು ದಾಖಲಿಸಿ ಜೈಲಿಗೆ ಕಳುಹಿಸಲಾಯಿತು.
ಈ ಬಗ್ಗೆ ಮಾಹಿತಿ ನೀಡಿದ ಛಲವಾದಿ ಮಹಾಸಭಾ ತಾಲ್ಲೂಕು ಅಧ್ಯಕ್ಷ ಜಿ.ಲಕ್ಷ್ಮೀಪತಿ, `ಜಾತಿ ಕಾರಣ ನೀಡಿ ಕಾಂತಮ್ಮ ಅವರನ್ನು ಮದುವೆಯಾಗಲು ನಿರಾಕರಿಸುತ್ತಾ ಬಂದಿದ್ದ ಮಂಜುನಾಥ್‌ಗೆ ಈ ಮುನ್ನ ತಿಳಿವಳಿಕೆ ಹೇಳಲಾಗಿತ್ತು. ಆದರೂ ಆತ ಯಾರ ಮಾತಿಗೂ ಬೆಲೆ ಕೊಟ್ಟಿರಲಿಲ್ಲ.
ಕಾಂತಮ್ಮನಿಗೂ ತನಗೂ ಯಾವುದೇ ಸಂಬಂಧ ಇಲ್ಲ ಎಂದು ವಾದಿಸುತ್ತಿದ್ದ~ ಎಂದು ವಿವರಿಸಿದರು. ಮಂಜುನಾಥ್ ಕಾಂತಮ್ಮ ಅವರ ಜೊತೆ ಒಂದೂವರೆ ವರ್ಷಗಳಿಂದ ಸಂಬಂಧ ಹೊಂದಿದ್ದ. ಈ ಹಿನ್ನೆಲೆಯಲ್ಲಿ ಆತನ ವಿರುದ್ಧ ಅತ್ಯಾಚಾರ ಆರೋಪದಡಿ ದೂರು ದಾಖಲಿಸಲಾಗಿದೆ ಎಂದು ಲಕ್ಷ್ಮೀಪತಿ ತಿಳಿಸಿದರು. ವಿವಾಹ ಸಂದರ್ಭದಲ್ಲಿ ಮಂಜುನಾಥ್ ದೇವಾಲಯದಿಂದ ತಪ್ಪಿಸಿಕೊಂಡು ಹೋಗಲು ಯತ್ನಿಸಿದ್ದರಿಂದ ಮುಖಂಡರು ಆತನನ್ನು ಥಳಿಸಲು ಮುಂದಾದರು. ಈ ಸಂದರ್ಭದಲ್ಲಿ ಪೊಲೀಸರು ಮಧ್ಯ ಪ್ರವೇಶ ಮಾಡಿ ಹಲ್ಲೆ ತಪ್ಪಿಸಿದರು.
ಬಲವಂತದ ಮದುವೆ: ಈ ಕುರಿತು ಹೇಳಿಕೆ ನೀಡಿರುವ ಪಿಡಿಒ ಮಂಜುನಾಥ್ `ನನ್ನ ಮೇಲೆ ಸುಳ್ಳು ಆರೋಪ ಮಾಡಲಾಗುತ್ತಿದೆ. ಬಲವಂತವಾಗಿ ವಿವಾಹ ಮಾಡಲಾಗಿದೆ ಎಂದು ಪ್ರತಿಕ್ರಿಯಿಸಿದ್ದಾರೆ.
