ತೆಂಗು, ಖುಷ್ಕಿ ಬೇಸಾಯವೇ ಬದುಕು

ರಾಮನಗರ: ಜಿಲ್ಲೆಯನ್ನು ಎರಡು ವರ್ಷ ಕಾಡಿದ ಬರಗಾಲದತೀವ್ರತೆ  ಈ ವರ್ಷ ಅಷ್ಟಾಗಿಲ್ಲ. ಆದರೂ ಸಂಪೂರ್ಣ ಬರ ಮುಕ್ತ ವಾತಾವರಣವೇನೂ ಕಾಣುತ್ತಿಲ್ಲ. ಇಡೀ ಜಿಲ್ಲೆಯಲ್ಲಿ ವಾಡಿಕೆಯಷ್ಟು ಮಳೆಯಾಗದಿದ್ದರೂ ಚದುರಿದಂತೆ ಅಲ್ಲಲ್ಲಿ ಬಿದ್ದ ಸಾಧಾರಣ ಮಳೆಯಿಂದ ರೈತರು ಕೃಷಿ ಕಾಯಕದಲ್ಲಿ ತೊಡಗಿಕೊಂಡಿದ್ದಾರೆ.

ಆರಂಭದಲ್ಲಿ ಅಬ್ಬರಿಸಿದ ಮುಂಗಾರು ನಂತರ ಎರಡು ತಿಂಗಳು ತಣ್ಣಗಾದ ಪರಿಣಾಮ ಕೃಷಿಕರಲ್ಲಿ ಆತಂಕ ಹೆಚ್ಚಾಗಿತ್ತು. ಇದರಿಂದ ಹಲವು ಬೆಳೆಗಳು ಒಣಗಿ ನಿಂತವು. ಈಗ ಸೆಪ್ಟೆಂಬರ್ ಮೊದಲ ವಾರದಲ್ಲಿ ಉತ್ತಮ ಮಳೆಯಾಗಿದ್ದು, ರೈತರಲ್ಲಿ ಒಂದಿಷ್ಟು ಭರವಸೆ  ಮೂಡಿಸಿದೆ. ಹೀಗಾಗಿ ಜಿಲ್ಲೆಯ ಕೃಷಿಕರು ಈ ಋತುಮಾನದ ಎರಡನೇ ಇನ್ನಿಂಗ್ಸ್‌ನ ಕೃಷಿ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. 

ಈ ವರ್ಷದ ಏಪ್ರಿಲ್, ಮೇ ತಿಂಗಳಲ್ಲಿ ಮುಂಗಾರು ಪೂರ್ವ ಮಳೆ ಸಾಧಾರಣವಾಗಿ ಸುರಿಯಿತು. ಇದು ಮಾಗಡಿಯಲ್ಲಿ ಎಳ್ಳು, ಅಲಸಂದೆ, ಅವರೆ, ನೆಲಗಡಲೆ ಮತ್ತಿತರ ಬೆಳೆಗಳಿಗೆ ಅನುವು ಮಾಡಿಕೊಟ್ಟಿತು. ಜುಲೈ, ಆಗಸ್ಟ್‌ನಲ್ಲಿ ಮಳೆ ಕೊರತೆ: ಜೂನ್ ತಿಂಗಳಿನಲ್ಲಿ ಮುಂಗಾರು ಮಳೆ ಜಿಲ್ಲೆಯಲ್ಲಿ ವಾಡಿಕೆಗಿಂತ (63 ಮಿ.ಮೀ) ಹೆಚ್ಚಿನ (93.8 ಮಿ.ಮೀ) ಪ್ರಮಾಣದಲ್ಲಿ ಸುರಿದ ಕಾರಣ ರೈತರು  ಕೃಷಿ ಕಾರ್ಯದಲ್ಲಿ ಮಗ್ನರಾಗಿದ್ದರು. ಭೂಮಿ ಹದ ಮಾಡಿಕೊಂಡು ಬಿತ್ತನೆ ಮಾಡಿದ್ದರು. ಆದರೆ ಜುಲೈನಲ್ಲಿ ಅಷ್ಟಾಗಿ ಮಳೆಯಾಗದ ಕಾರಣ  ಅವರ ಶ್ರಮ ವ್ಯರ್ಥವಾಗುವ ಲಕ್ಷಣಗಳು ಕಂಡುಬಂದಿದ್ದವು.

ಜುಲೈನಲ್ಲಿ  82.8 ಮಿ.ಮೀನಷ್ಟು ವಾಡಿಕೆ ಮಳೆಯಾಗಬೇಕಿತ್ತು. ಆದರೆ ಬಿದ್ದದ್ದು ಕೇವಲ 56.1 ಮಿ.ಮೀ. ಅಸಮರ್ಪಕ ಮಳೆಯಿಂದ ಹಲವೆಡೆ ಚಿಗುರಿದ್ದ ಬೆಳೆ ಒಣಗಿ ಹೋಯಿತು. ಆಗಸ್ಟ್‌ನಲ್ಲಾದರೂ ಉತ್ತಮ ಮಳೆಯಾಗುತ್ತದೆ ಎಂದು ನಿರೀಕ್ಷಿಸಿದ್ದ ರೈತರಿಗೆ ಮತ್ತೆ ನಿರಾಸೆ ಕಾದಿತ್ತು. ರಾಮನಗರ, ಚನ್ನಪಟ್ಟಣ, ಮಾಗಡಿ ತಾಲ್ಲೂಕಿನಲ್ಲಿ ವಾಡಿಕೆಗಿಂತ ಬಹಳ ಕಡಿಮೆ ಮಳೆಯಾದರೆ, ಕನಕಪುರ ತಾಲ್ಲೂಕಿನಲ್ಲಿ ಮಾತ್ರ ವಾಡಿಕೆಗಿಂತ ಹೆಚ್ಚಿನ ಪ್ರಮಾಣದಲ್ಲಿ ಮಳೆಯಾಯಿತು. ಮೂರು ತಾಲ್ಲೂಕುಗಳ ರೈತರು ಸಮರ್ಪಕ ಮಳೆಯಿಲ್ಲದೆ ಕಂಗಾಲಾಗಿ, ಗ್ರಾಮಗಳಲ್ಲಿ ದೇವರಿಗೆ ವಿಶೇಷ ಪೂಜೆಗಳನ್ನು ಮಾಡಿ ಮಳೆರಾಯನನ್ನು ಆರಾಧಿಸತೊಡಗಿದರು.

ಇದೀಗ ಚೇತರಿಕೆ: ಸೆಪ್ಟೆಂಬರ್ ಮೊದಲ ವಾರದ ಮೂರು ದಿನಗಳಲ್ಲಿ ಜಿಲ್ಲೆಯಾದ್ಯಂತ ಸಾಕಷ್ಟು ಉತ್ತಮ ಮಳೆಯಾಗಿದೆ. ಸೆಪ್ಟೆಂಬರ್‌ನಲ್ಲಿ ಸುರಿಯಬೇಕಾದ ಮಳೆಯಲ್ಲಿ ಶೇ 45ರಷ್ಟು ಈ ಮೂರು ದಿನದಲ್ಲಿಯೇ ಸುರಿದಿದೆ. ಇದೀಗ ಪುನಃ ರೈತರು ಕೃಷಿ ಕೈಗೊಳ್ಳಲು ಮುಂದಾಗಿದ್ದಾರೆ. ಕೆಲವೆಡೆ ಎರಡನೇ ಬಾರಿಗೆ ರಾಗಿ ನಾಟಿ ಮಾಡುವ ಕಾಯಕ ಕೈಗೊಂಡಿದ್ದಾರೆ.

ಸಮರ್ಪಕವಾಗಿ ಮಳೆಯಾಗದ ಕಾರಣ ಯಾವುದೇ ಕೆರೆ-ಕುಂಟೆಗಳು ತುಂಬಿಲ್ಲ. ಹಳ್ಳ ಕೊಳ್ಳಗಳಲ್ಲಿ ನೀರು ಹರಿಯುವ ಮಳೆಯೂ ಆಗಿಲ್ಲ. ಇದರಿಂದಾಗಿ  ಅಂತರ್ಜಲ ಮಟ್ಟದಲ್ಲಿ ಏರಿಕೆಯೂ ಕಂಡಿಲ್ಲ. ಸ್ಥಗಿತಗೊಂಡಿದ್ದ ಕೊಳವೆ ಬಾವಿಗಳಿಗೆ ಇನ್ನೂ ನೀರು ಬಂದಿಲ್ಲ. ಇದೆಲ್ಲದರ ಪರಿಣಾಮ ಕುಡಿಯುವ ನೀರಿನ ಅಭಾವ ಇದೆ. ಸಾಧಾರಣ ಮಳೆಯಾಗಿರುವ ಕಾರಣ ಮೇವಿನ ಕೊರತೆ ಅಷ್ಟಾಗಿ ಎದುರಾಗಿಲ್ಲ.

ಒಣಗಿರುವ ಮಾವು, ತೆಂಗು: ಎರಡು ವರ್ಷದಿಂದ ಸತತವಾಗಿ ಬರಗಾಲ ಇರುವ ಕಾರಣ ಪ್ರಮುಖ ತೋಟಗಾರಿಕೆ ಬೆಳೆಗಳಾದ ಮಾವು ಮತ್ತು ತೆಂಗು ಸೊರಗಿವೆ. ನೀರಿಲ್ಲದೆ ಒಣಗುತ್ತಿವೆ. ಇಲ್ಲಿಯವರೆಗೆ ಸುರಿದಿರುವ ಮಳೆ ಖುಷ್ಕಿ ಬೇಸಾಯಕ್ಕೆ ಪೂರಕವಾಗಿದೆಯೇ ಹೊರತು, ತೋಟಗಾರಿಕೆ ಹಾಗೂ ನೀರಾವರಿ ಬೇಸಾಯಕ್ಕೆ ಸಹಕಾರಿಯಾಗಿಲ್ಲ. ಹನಿ ನೀರಾವರಿ ಹಾಗೂ ಸೂಕ್ತ ನಿರ್ವಹಣೆ ಹೊಂದಿರುವ ಕೆಲ ತೋಟಗಳನ್ನು ಹೊರತು ಪಡಿಸಿದರೆ ಜಿಲ್ಲೆಯ ಬಹುತೇಕ ಭಾಗದಲ್ಲಿ ಮಾವು ಮತ್ತು ತೆಂಗಿನ ಮರಗಳು ಒಣಗಿರುವ ದೃಶ್ಯಗಳು ಸಾಮಾನ್ಯವಾಗಿ ಕಂಡು ಬರುತ್ತವೆ.

ಭತ್ತ ಕುಸಿತ: ಕೆರೆ- ಕುಂಟೆಗಳಲ್ಲಿ ನೀರಿಲ್ಲದ ಕಾರಣ ಭತ್ತ ಬೆಳೆಯುವ ರೈತರು ಬೇರೆ ಬೆಳೆ ಬೆಳೆಯಲು ಮುಂದಾಗಿದ್ದಾರೆ. ಈ ಮೊದಲು 6,629 ಹೆಕ್ಟೇರ್‌ನಲ್ಲಿ ಭತ್ತ ಬೆಳೆಯಲಾಗುತ್ತಿತ್ತು. ಆದರೆ ಈ ವರ್ಷ ಕೊಳವೆ ಬಾವಿ ಹೊಂದಿರುವ ಕೆಲ ರೈತರು (2,118 ಹೆಕ್ಟೇರ್) ಮಾತ್ರ ಭತ್ತದ ಸಾಹಸಕ್ಕೆ ಮುಂದಾಗಿದ್ದಾರೆ.