ದಸರಾ ಸಭೆಯಲ್ಲಿ ಸಿಎಂ ಡಿ.ವಿ.ಸದಾನಂದಗೌಡ: ಗುಣಮಟ್ಟದಲ್ಲಿ ರಾಜಿ ಬೇಡ

ಮೈಸೂರು: `ದಸರಾ ಮಹೋತ್ಸವದಲ್ಲಿ  ಸಾಂಸ್ಕೃತಿಕ ಕಾರ್ಯಕ್ರಮಗಳ ಗುಣಮಟ್ಟದೊಂದಿಗೆ ಯಾವುದೇ ರಾಜಿ ಬೇಡ. ಯಾರದ್ದೇ ಶಿಫಾರಸು ಅಥವಾ  ಒತ್ತಡಕ್ಕೆ ಮಣಿಯದೇ ನಿಜವಾದ ಪ್ರತಿಭೆಗಳಿಗೆ ಅವಕಾಶ ಕೊಡಬೇಕು~ ಎಂದು ಮುಖ್ಯಮಂತ್ರಿ ಡಿ.ವಿ. ಸದಾನಂದಗೌಡ ಗುರುವಾರ ಅಧಿಕಾರಿಗಳಿಗೆ ಸೂಚಿಸಿದರು.

ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿ ಉನ್ನತ ಸಮಿತಿಯ ಸಭೆಯಲ್ಲಿ ನಾಡಹಬ್ಬದ ಕುರಿತು ವಿವಿಧ ಇಲಾಖೆಗಳಿಂದ ಮಾಹಿತಿ ಪಡೆದ ಅವರು ಸೂಚನೆ ನೀಡಿದರು.

`ಈ ವಿಷಯದಲ್ಲಿ ಯಾವುದೇ ರಾಜಿ ಇಲ್ಲ. ಯಾವುದೇ ಒಂದು ದೂರು ಬಂದರೂ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುತ್ತೇನೆ. ಯಾವುದೇ ಪ್ರಮಾದ ವಾಗದಂತೆ ನೋಡಿಕೊಳ್ಳಿ~ ಎಂದು ಸಾಂಸ್ಕೃತಿಕ ಕಾರ್ಯಕ್ರಮದ ಉಪ ಸಮಿತಿಯ ವಿಶೇಷಾಧಿಕಾರಿಯೂ ಆಗಿರುವ ಮುಡಾ ಆಯುಕ್ತ ಬೆಟ್‌ಸೂರಮಠ ಅವರಿಗೆ ಸೂಚಿಸಿದರು.

`ದಸರಾ ದೀಪಾಲಂಕರಾದಲ್ಲಿ ಹೊಸತನ ಇರಬೇಕು. ಅಲ್ಲದೇ   ಈ ಸಂದರ್ಭದಲ್ಲಿ ವಿದ್ಯುತ್ ಕೈಕೊಡುವ ದೂರುಗಳು ಬರಬಾರದು. ಈ ಬಗ್ಗೆ ವಿಶೇಷ ನಿಗಾ ಅವಶ್ಯಕ. ಯಾವುದೇ ಕುಂದು ಬರಕೂಡದು~ ಎಂದು ಸೆಸ್ಕ್ ಅಧಿಕಾರಿಗಳಿಗೆ ಹೇಳಿದರು.

ಇದಕ್ಕೆ ಉತ್ತರಿಸಿದ ಸೆಸ್ಕ್ ವ್ಯವಸ್ಥಾಪಕ ನಿರ್ದೇಶಕ ಡಾ. ಬೋರೇಗೌಡ, `ದೀಪಾಲಂಕಾರಕ್ಕಾಗಿ ಹಲವಾರು ಪ್ರಾಯೋಜಕರು ಮುಂದೆ ಬಂದಿವೆ. ಈ ಬಾರಿ ನಗರದ ವಿವಿಧ ಪ್ರದೇಶಗಳಲ್ಲಿ ಅಲ್ಲಿಯ ವಿಶೇಷತೆಗಳು ಮತ್ತು ಐತಿಹಾಸಿಕ ಕಥೆಗಳ ಆಧಾರಿತ ಲೈಟಿಂಗ್ ಪ್ರದರ್ಶವನ್ನು ಏರ್ಪಡಿಸುವ ವ್ಯವಸ್ಥೆ ಮಾಡಲಾಗುತ್ತಿದೆ~ ಎಂದರು.

ಜಾಹೀರಾತು ಫಲಕ ತೆರವು
`ನಗರದಲ್ಲಿ ಸರ್ಕಾರಿ ಪ್ರಾಯೋಜಿತ ಫಲಕಗಳನ್ನು ಬಿಟ್ಟು ಬೇರೆ ಎಲ್ಲ ಜಾಹೀರಾತು ಫಲಕಗಳನ್ನು ತೆರವುಗೊಳಿಸಬೇಕು. ವೈಯಕ್ತಿಕ ಪ್ರಚಾರದ  ಕಟೌಟ್‌ಗಳು, ಜಾಹೀರಾತುಗಳನ್ನು ನಿರ್ದಾಕ್ಷಿಣ್ಯವಾಗಿ ತೆರವುಗೊಳಿಸುವ ಕೆಲಸವಾಗಬೇಕು. ನಗರದ ಸೌಂದರ್ಯಕ್ಕೆ ಚ್ಯುತಿ ಬರಬಾರದು~ ಎಂದು ಸಿಎಂ ಪಾಲಿಕೆ ಅಧಿಕಾರಿಗಳಿಗೆ ಸೂಚಿಸಿದರು.

`ಮಹೋತ್ಸವಕ್ಕೆ ಸಿಗುತ್ತಿರುವ ಪ್ರಾಯೋಜಕತ್ವದ ದುರ್ಬಳಕೆ ಆಗಬಾರದು. ರಸ್ತೆಯ ಹೊಂಡಗಳನ್ನು ಮುಚ್ಚುವ ಮತ್ತು ದುರಸ್ತಿ ಮಾಡುವ ಕಾಮಗಾರಿಗಳನ್ನು ತ್ವರಿತವಾಗಿ ಮುಗಿಸಬೇಕು~ ಎಂದು ಹೇಳಿದರು.

ಜನಸ್ನೇಹಿ ಪೊಲೀಸ್
ಕಾನೂನು ಮತ್ತು ಸುವ್ಯವಸ್ಥೆ ಕ್ರಮಗಳ ಕುರಿತು ಮುಖ್ಯಮಂತ್ರಿಗಳಿಗೆ ವಿವರಣೆ ನೀಡಿದ ಪೊಲೀಸ್ ಆಯುಕ್ತ ಸುನಿಲ ಅಗರವಾಲ್, `ದೇಶ, ವಿದೇಶಗಳಿಂದ ಬರುವ ಲಕ್ಷಾಂತರ ಪ್ರವಾಸಿಗರೊಂದಿಗೆ ಸೌಜನ್ಯ ಮತ್ತು ನಗುಮುಖದೊಂದಿಗೆ ವರ್ತಿಸಲು ಜನಸ್ನೇಹಿಯಾಗಿರಲು ಪೊಲೀಸರಿಗೆ ತರಬೇತಿ ನೀಡಲಾಗುತ್ತಿದೆ. ಜನರಿಗೆ ಮಾಹಿತಿ ನೀಡಲು 40 ಕಿಯಾಸ್ಕ್‌ಗಳನ್ನು ಆರಂಭಿಸಲಾಗುವುದು. ನಗರದಲ್ಲಿ ಮುನ್ನೆಚ್ಚರಿಕೆ ಕ್ರಮವಾಗಿ ಮುಂದಿನ ಶುಕ್ರವಾರ ಪೊಲೀಸ್ ಪಥಸಂಚಲನ ನಡೆಸಲಾಗುವುದು~ ಎಂದು ಹೇಳಿದರು.

2012ರ ದಸರೆಗೆ ಚಾಲನೆ
`ಮುಖ್ಯಮಂತ್ರಿಗಳು ದಸರಾದಲ್ಲಿ ಹೊಸ ರೂಢಿಯನ್ನು ಆರಂಭಿಸಬೇಕು. ಈ ದಸರಾ ಉತ್ಸವದ ಅಂತ್ಯವಾಗುತ್ತಿದ್ದಂತೆಯೇ ಮುಂದಿನ ವರ್ಷದ ಉತ್ಸವಕ್ಕೆ ಚಾಲನೆ ನೀಡಬೇಕು. ಕೇವಲ ಒಂದು ತಿಂಗಳಲ್ಲಿ ತಯಾರಿ ನಡೆಸುವ ಬದಲು, ಇಡೀ ವರ್ಷ ಉತ್ತಮ ಯೋಜನೆ, ವಿನೂತನ ಚಟುವಟಿಕೆಗಳನ್ನ ರೂಪಿಸಲು ಒತ್ತು ನೀಡಬೇಕು~ ಎಂದು ಸಭೆಯಲ್ಲಿದ್ದ ಸಂಸದ ಅಡಗೂರು ಎಚ್. ವಿಶ್ವನಾಥ್ ಸಲಹೆ ನೀಡಿದರು.

`ಮೈಸೂರಿನ ರಸ್ತೆಗಳಲ್ಲಿ ಬಿದ್ದಿರುವ ಗುಂಡಿಗಳನ್ನು ತುಂಬಲು ದಸರಾ ದುಡ್ಡೇ ಬೇಕಾ?. `ಬೇರೆ ಹಣವೇ ಇಲ್ಲವೇ. ಇಡೀ ವರ್ಷ ಕೆಟ್ಟುಹೋದ ರಸ್ತೆಗಳ ರಿಪೇರಿಗೆ ದಸರಾ ಹಣವೇ ಏಕೆ ಬೇಕು. ಉಳಿದ ಹಣ ಎಲ್ಲಿ ಹೋಯಿತು. ಕಳೆದ ವರ್ಷ ಕೆಲಸ ಮಾಡಿದ ಗುತ್ತಿಗೆದಾರರಿಗೆ ಬಾಕಿ ಹಣ ಪಾವತಿಸಿಲ್ಲ~ ಎಂದು ತರಾಟೆ ತೆಗೆದುಕೊಂಡರು.

ದಸರಾ ಪ್ರಾಧಿಕಾರ ರಚಿಸಿ
`ಒಂದೇ ತಿಂಗಳಲ್ಲಿ ತರಾತುರಿಯ ತಯಾರಿ ನಡೆಸುವ ಬದಲಿಗೆ ದಸರಾ ಮಹೋತ್ಸವಕ್ಕಾಗಿ ಒಂದು ಪ್ರತ್ಯೇಕ ಮತ್ತು ಶಾಶ್ವತವಾದ ದಸರಾ ಪ್ರಾಧಿಕಾರ ಆರಂಭಿಸಬೇಕು. ಇಡೀ ವರ್ಷ ಅತ್ಯುತ್ತಮ ಯೋಜನೆ ರೂಪಿಸಬೇಕು~ ಎಂದುವಿಧಾನ ಪರಿಷತ್ ಸದಸ್ಯ ತೋಂಟದಾರ್ಯ ಸಲಹೆ ನೀಡಿದರು.

`ಮೈಸೂರಿನಲ್ಲಿರುವ ವಿಮಾನ ನಿಲ್ದಾಣದಲ್ಲಿ ಬೇರೆ ಬೇರೆ ಕಡೆಗಳಿಂದ ವಿಮಾನ ಸಂಚಾರ ಆರಂಭವಾಗಬೇಕು. ದೇಶದ ವಿವಿಧ ರಾಜ್ಯಗಳು ಮತ್ತು ವಿದೇಶಗಳಿಂದ ಮೈಸೂರಿಗೆ ಅಪಾರ ಸಂಖ್ಯೆಯಲ್ಲಿ ಪ್ರವಾಸಿಗರು ಬರುತ್ತಾರೆ. ಅವರಿಗೆ ವಿಮಾನಯಾನದ ಅನುಕೂಲತೆ ಒದಗಿಸಬೇಕು. ಈ ಬಗ್ಗೆ ವಿಮಾನ ಹಾರಾಟ ಸಂಸ್ಥೆಗಳೊಂದಿಗೆ ಸಮಾಲೋಚನೆ ನಡೆಸಿ ನಿರ್ಧಾರ ಕೈಗೊಳ್ಳಬೇಕು~ ಎಂದು ಅಭಿಪ್ರಾಯಪಟ್ಟರು.

ಸಂಸ್ಕೃತಿಗೆ ಕುಂದು ಬರದಿರಲಿ
`ಯುವ ದಸರಾದಲ್ಲಿ ನಾಡು, ನುಡಿ, ಪರಂಪರೆಗೆ ಧಕ್ಕೆಯಾಗುವಂತಹ ಕಾರ್ಯಕ್ರಮಗಳು ಬೇಡ. ಉತ್ತಮ ಪ್ರತಿಭೆಗಳಿಗೆ ಅವಕಾಶ ನೀಡಬೇಕು. ನಾಡಹಬ್ಬದ ಘನತೆ ಹೆಚ್ಚಿಸಬೇಕು. ದೆಹಲಿ ಗಣರಾಜ್ಯೋತ್ಸವ  ಪರೇಡ್ ಮಾದರಿಯ ಶಿಸ್ತು ಅಗತ್ಯವಿದೆ~ ಎಂದು ಮಾಜಿ ಸಚಿವ ಸಿ.ಎಚ್.ವಿಜಯಶಂಕರ ಸಲಹೆ ನೀಡಿದರು. 
ಸಭೆಯಲ್ಲಿ ವಿಧಾನ ಪರಿಷತ್ ಸದಸ್ಯ ಗೋ.ಮಧೂಸೂದನ, ಜಿಲ್ಲಾಧಿಕಾರಿ ಪಿ.ಎಸ್. ವಸ್ತ್ರದ್, ಮೇಯರ್ ಪುಷ್ಪಲತಾ ಟಿ.ಬಿ. ಚಿಕ್ಕಣ್ಣವರ, ಶಾಸಕ ಸಾ.ರಾ.  ಮಹೇಶ್, ಜಿ.ಪಂ. ಅಧ್ಯಕ್ಷೆ ಸುನೀತಾ ವೀರಪ್ಪಗೌಡ, ಮುಡಾ ಅಧ್ಯಕ್ಷ ನಾಗೇಂದ್ರ ಮತ್ತಿತರರು ಹಾಜರಿದ್ದರು.