ವಾಷಿಂಗ್ಟನ್‌ (ಪಿಟಿಐ): ವೀಸಾ ವಂಚನೆ ಆರೋಪದಡಿ ಈಚೆಗೆ ಬಂಧಿಸಲಾಗಿದ್ದ ಭಾರತದ ಹಿರಿಯ ರಾಜತಾಂತ್ರಿಕ ಅಧಿಕಾರಿ ದೇವಯಾನಿ ಖೋಬ್ರಾಗಡೆ ಅವರ ರಾಯಭಾರತ್ವ ಮಾನ್ಯತೆಯ ಕುರಿತು ವಿಶ್ವಸಂಸ್ಥೆ ಕಳುಹಿಸಿದ ದಾಖಲೆಗಳನ್ನು ಪರಿಶೀಲಿಸು ತ್ತಿರುವುದಾಗಿ ಅಮೆರಿಕ ತಿಳಿಸಿದೆ.
‘ದೇವಯಾನಿ ಕುರಿತು ವಿಶ್ವಸಂಸ್ಥೆ ಕಳುಹಿಸಿದ ದಾಖಲೆಗಳನ್ನು ಶುಕ್ರವಾರ ಸ್ವೀಕರಿಸಲಾಗಿದ್ದು, ಅವುಗಳನ್ನು ಪರಿಶೀಲಿಸಲಾಗುತ್ತಿದೆ’ ಎಂದು ವಿದೇಶಾಂಗ ಇಲಾಖೆ ವಕ್ತಾರರೊಬ್ಬರು ತಿಳಿಸಿದ್ದು, ಈ ಬಗ್ಗೆ ಹೆಚ್ಚಿನ ಮಾಹಿತಿ ನೀಡಲು ನಿರಾಕರಿಸಿದರು. ನ್ಯೂಯಾರ್ಕ್‌ನ ಭಾರತೀಯ ರಾಜತಾಂತ್ರಿಕ ಕಚೇರಿಯಲ್ಲಿ ಉಪ ಕಾನ್ಸುಲ್‌ ಆಗಿ ಕಾರ್ಯನಿರ್ವಹಿಸುತ್ತಿದ್ದ ದೇವಯಾನಿ ಅವರನ್ನು ವೀಸಾ ವಂಚನೆ ಆರೋಪದಡಿ ಸ್ಥಳೀಯ ಕೋರ್ಟ್ ನೀಡಿದ ಆದೇಶದ ಅನ್ವಯ ಈ ತಿಂಗಳ 12ರಂದು ಬಂಧಿಸಲಾಗಿತ್ತು.
