ಕೊಲಂಬೊ (ಪಿಟಿಐ): ವಲಸೆ ಕಾಯ್ದೆ ಉಲ್ಲಂಘಿಸಿರುವ ಹಿನ್ನೆಲೆಯಲ್ಲಿ ಭಾರತೀಯರು ಸೇರಿದಂತೆ 160 ವಿದೇಶಿ ಇಸ್ಲಾಂ ಧರ್ಮ ಪ್ರಚಾರಕರು ಇದೇ 31ರ ಒಳಗೆ ದೇಶ ತೊರೆಯುವಂತೆ ಶ್ರೀಲಂಕಾದ ಅಧಿಕಾರಿಗಳು ಸೂಚಿಸಿದ್ದಾರೆ.
`ತಬಲಿಘ್ ಜಮಾತ್~ಗೆ ಸೇರಿದ ಭಾರತ, ಪಾಕಿಸ್ತಾನ, ಬಾಂಗ್ಲಾ ದೇಶ, ಮಾಲ್ಡೀವ್ಸ್ ಮತ್ತು ಅರಬ್ ರಾಷ್ಟ್ರಗಳ ಈ ಧರ್ಮ ಪ್ರಚಾರಕರು ಪ್ರವಾಸಿ ವೀಸಾದ ಮೇಲೆ ಕಳೆದ ತಿಂಗಳು ಇಲ್ಲಿಗೆ ಬಂದಿದ್ದಾರೆ. ಆದರೆ, ಅವರು ಧರ್ಮ ಪ್ರಚಾರ ಕಾರ್ಯದಲ್ಲಿ ತೊಡಗಿದ್ದು, ಇದು ಸಂಪೂರ್ಣವಾಗಿ ವಲಸೆ ಕಾಯ್ದೆಗೆ ವಿರುದ್ಧವಾಗಿದೆ~ ಎಂದು ತಿಳಿಸಿದ್ದಾರೆ.