ಮುಂಬೈ (ಪಿಟಿಐ): ಹತ್ತು ದಿನಗಳ ಹಿಂದೆ ಸ್ಟೇಜ್ ಷೋ ನೀಡಲು ತೆರಳುತ್ತಿದ್ದಾಗ ಅಚಾನಕ್ಕಾಗಿ ಕಣ್ಮರೆಯಾಗಿದ್ದ ಮರಾಠಿ ನಟಿ ಅಲ್ಕಾ ಪುಣೆವರ್ ಚೆನ್ನೈನಲ್ಲಿ ತನ್ನ ಪ್ರಿಯಕರನ ಜತೆ ಕಾಣಿಸಿಕೊಡಿದ್ದಾಳೆ.
ಅಲ್ಕಾ ಪ್ರಿಯಕರ ಅಲೋಕ್ ಪಾಲಿವಾಲ್ ಆಕೆಗಿಂತ ದುಪ್ಪಟ್ಟು ವಯಸ್ಸಿನವ.
‘ಡಿ. 27ರಂದು ನವಿಮುಂಬೈನ ಉರಾನ್ನಲ್ಲಿ ಸ್ಟೇಜ್ ಷೋ ನೀಡಲು ಅಲ್ಕಾ ತೆರಳಿದ್ದಳು. ಕಾರ್ಯಕ್ರಮದ ನಂತರ ಪುಣೆಯಲ್ಲಿ ಮತ್ತೊಂದು ಷೋಗೆ ಹೋಗಬೇಕಿತ್ತು. ಈ ನಡುವೆ, ಅಲ್ಕಾ, ಆಕೆಯ ಪ್ರಿಯಕರ ಹಾಗೂ ಮತ್ತೊಬ್ಬ ಸ್ನೇಹಿತ ಸೇರಿ ರಾಯಗಡ ಜಿಲ್ಲೆಯ ಖೊಪೊಲಿಯಲ್ಲಿ ‘ಅಪಘಾತ’ದ ನಾಟಕ ಆಡಿದರು. ಅಲ್ಕಾ ಕಾರು 700 ಅಡಿ ಕಂದರಕ್ಕೆ ಬಿದ್ದಿತ್ತು. ಈ ಜೋಡಿ ಓಡಿಹೋಗುವುದಕ್ಕಾಗಿ ಹೆಣೆದ ನಾಟಕ ಇದಾಗಿತ್ತು’ ಎಂದು ನವಿಮುಂಬೈ ಪೊಲೀಸರು ತಿಳಿಸಿದ್ದಾರೆ.
ಇವರಿಬ್ಬರ ಸ್ನೇಹಿತ ಸಂಜಯ್ ಸೋನ್ಕರ್ ಪೊಲೀಸರ ಕೈಗೆ ಸಿಕ್ಕಿಬಿದ್ದಾಗ ನಿಜ ಬಯಲಾಯಿತು. ಈ ಪ್ರಕರಣದಲ್ಲಿ ತನ್ನ ತಪ್ಪು ಒಪ್ಪಿಕೊಂಡಿರುವ ಸೋನ್ಕರ್ ಡಿ.27ರ ರಾತ್ರಿಯಿಂದ ಹಿಡಿದು 28ರ ಬೆಳಿಗ್ಗೆವರೆಗೆ ನಡೆದ ಘಟನೆಯನ್ನು ಚಾಚೂತಪ್ಪದೇ ಹೇಳಿದ್ದಾನೆ.
ಈ ಜೋಡಿಯನ್ನು ಚೆನ್ನೈಗೆ ಕಳಿಸಲು ಈ ನಾಟಕ ಮಾಡಿದ್ದಾಗಿ ವಿಚಾರಣೆ ವೇಳೆ ಸೋನ್ಕರ್ ಒಪ್ಪಿಕೊಂಡಿದ್ದಾನೆ. ನಾಪತ್ತೆಯಾಗುವ ಮುನ್ನ ಅಲ್ಕಾ ಮತ್ತು ಅಲೋಕ್ ಸಾಕಷ್ಟು ಬಾರಿ ಮೊಬೈಲ್ನಲ್ಲಿ ಸಂಭಾಷಣೆ ನಡೆಸಿದ್ದಾರೆ. ಇದು ಪ್ರಕರಣ ಭೇದಿಸುವಲ್ಲಿ ಪೊಲೀಸರಿಗೆ ಸಹಕಾರಿಯಾಗಿದೆ.