ಬೆಂಗಳೂರು: ನಗರದಲ್ಲಿ ಅಂತರ್ಜಲ ಮಟ್ಟ ಕುಸಿಯುತ್ತಿರುವ ಹಿನ್ನೆಲೆಯಲ್ಲಿ ಕೊಳವೆಬಾವಿಗಳನ್ನು ಕೊರೆಯಲು ಜಲಮಂಡಳಿ ಅನುಮತಿ ಪಡೆದು ಶುಲ್ಕ ಪಾವತಿಸಬೇಕೆಂಬ ನಿಯಮ ಸರ್ಕಾರ ಜಾರಿ ಮಾಡಿದ್ದರೂ, ಸರಿಯಾಗಿ ಪಾಲನೆಯಾಗುತ್ತಿಲ್ಲ ಎಂಬ ಆರೋಪ ಕೇಳಿ ಬರುತ್ತಿದೆ.
ಇನ್ನು ಕೊಳವೆ ಬಾವಿ ಕೊರೆಯುವುದಕ್ಕೆ ವಿಧಿಸಲಾಗುವ ಶುಲ್ಕ 50 ರೂಪಾಯಿ ಮಾತ್ರ. ಕರ್ನಾಟಕ ಗೆಜೆಟ್ ಸೆಪ್ಟೆಂಬರ್ 6, 2012ರ ಪ್ರಕಾರ ನೋಂದಣಿಯಾದ ಏಜೆನ್ಸಿಗಳು ಮಾತ್ರ ಕೊಳವೆ ಬಾವಿಗಳನ್ನು ಕೊರೆಯಲು ಅವಕಾಶವಿದ್ದು, ಈಗಾಗಲೇ ಯಥೇಚ್ಛವಾಗಿ ಕೊಳವೆಬಾವಿಗಳು ಅಸ್ತಿತ್ವದಲ್ಲಿರುವ ಕಡೆ ಯಾವುದೇ ರೀತಿಯಲ್ಲೂ ಕೊಳವೆ ಬಾವಿಯನ್ನು ಕೊರೆಯಲು ಅವಕಾಶವನ್ನು ನಿರ್ಬಂಧಿಸಲಾಗಿದೆ. ಕರ್ನಾಟಕ ಅಂತರ್ಜಲ ಪ್ರಾಧಿಕಾರದ ನಿಯಮಾವಳಿ ಪ್ರಕಾರ ಜಲಮಂಡಳಿಯಿಂದ ಅನುಮತಿ ಪಡೆಯದೇ ಕೊಳವೆ ಬಾವಿಗಳನ್ನು ಕೊರೆಯುವ ಏಜೆನ್ಸಿಗಳಿಗೆ ಸೆರೆವಾಸದೊಂದಿಗೆ ರೂ 2 ರಿಂದ 10 ಸಾವಿರ ದಂಡ ವಿಧಿಸಲಾಗುವುದು. ಭೂತಜ್ಞ ಪ್ರಮಾಣೀಕರಿಸಿದಂತೆ ಕೊಳವೆ ಬಾವಿ ನೀರಿನ ಪ್ರಮಾಣ ತಗ್ಗಿಸುವ ಪ್ರದೇಶಗಳಲ್ಲಿ ಖಾಸಗಿ ಕೊಳವೆ ಬಾವಿಗಳನ್ನು ತೆರೆಯುವ ಅವಕಾಶ ನಿರಾಕರಿಸಲಾಗುವುದು.
ಈ ಬಗ್ಗೆ `ಪ್ರಜಾವಾಣಿ'ಯೊಂದಿಗೆ ಮಾತನಾಡಿದ ಹಿರಿಯ ಜಲಮಂಡಳಿ ಅಧಿಕಾರಿ, `ಕೆಲವು ಅತ್ಯವಶ್ಯಕ ನಿಯಮಗಳು ಸೂಕ್ತ ಸಮಯದಲ್ಲಿ ಜಾರಿಯಾಗುವುದಿಲ್ಲ. ಕೊಳವೆ ಬಾವಿ ಕೊರೆಯುವ ಏಜೆನ್ಸಿಗಳಿಗೆ ಈ ನಿಯಮದ ಬಗ್ಗೆ ಸಮರ್ಪಕ ಮಾಹಿತಿ ಇಲ್ಲ. ಇನ್ನು ಕೆಲವರು ನಿಯಮ ಜಾರಿಯಾಗುವ ಮೊದಲೇ ಕೊಳವೆ ಬಾವಿ ಕೊರೆದು ಹಣ ಮಾಡಿಕೊಳ್ಳುವ ಉದ್ದೇಶ ಹೊಂದಿದ್ದಾರೆ' ಎಂದರು.