ಪರಿಸರ ಸ್ನೇಹಿ ಆರ್ಥಿಕತೆ ಅಪರಾಧ

ರಯೊ ಡಿ ಜನೈರೊ (ಎಎಫ್‌ಪಿ):  ಪರಿಸರ ಸ್ನೇಹಿ ಆರ್ಥಿಕತೆಯೆಂಬುದು, ಮನುಕುಲದ ವಿರುದ್ಧ ಎಸಗುವ ಅಪರಾಧವಾಗಿದೆ. ಇದು ಭೂಮಿಯನ್ನು ಅಮೆರಿಕದ ವಸಾಹತುವನ್ನಾಗಿವುದಲ್ಲದೆ, ಜಗತ್ತಿನ ಸಮುದಾಯಗಳ ಹಕ್ಕುಗಳನ್ನು ಕಸಿದುಕೊಳ್ಳುತ್ತದೆ ಎಂದು ಐದು ರಾಷ್ಟ್ರಗಳ ಮೂಲನಿವಾಸಿಗಳು ದನಿ ಎತ್ತಿದ್ದಾರೆ.

ರಯೊ ಡಿ ಜನೈರೊದಲ್ಲಿ ಸುಸ್ಥಿರ ಅಭಿವೃದ್ಧಿಗೆ ಸಂಬಂಧಿಸಿದ ವಿಶ್ವಸಂಸ್ಥೆಯ ರಯೊ +20 ಶೃಂಗಸಭೆಗೆ ಪರ್ಯಾಯವಾಗಿ ಮೂಲನಿವಾಸಿಗಳು ನಡೆಸಿದ ಸಭೆಯಲ್ಲಿ ಈ ವಿರೋಧ ದಾಖಲಿಸಲಾಗಿದೆ.

`ಸುಸ್ಥಿರ ಅಭಿವೃದ್ಧಿಯನ್ನು ಸಾಧಿಸಬೇಕಾದರೆ,  ಮೂಲನಿವಾಸಿಗಳು ಸಹಸ್ರಾರು ವರ್ಷಗಳಿಂದ ಪಾಲಿಸುತ್ತಾ ಬಂದಿರುವ ಸಂಪನ್ಮೂಲಗಳ ನಿರ್ವಹಣೆಯ ಸಾಂಪ್ರದಾಯಿಕ ಕ್ರಮಗಳನ್ನು ಎಲ್ಲಾ ರಾಷ್ಟ್ರಗಳು ಅನುಸರಿಸಬೇಕು~ ಎಂದು `ಕಾರಿ-ಒಕಾ 2~ ಎಂದು ಕರೆದಿರುವ ಘೋಷಣೆ ಹೇಳಿದೆ.

`ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳು ಭೂಮಿಯ ಸಮತೋಲನ ನಾಶ ಮಾಡುವುದಕ್ಕೆ, ಋತುಮಾನಗಳನ್ನು ಕೆಡಿಸುವುದಕ್ಕೆ, ಹವಾಮಾನವನ್ನು ಹಾಳು ಮಾಡುವುದಕ್ಕೆ, ಬದುಕನ್ನು ವ್ಯಾಪಾರೀಕರಣಗೊಳಿಸುವುದಕ್ಕೆ ಮತ್ತು  ಮನುಕುಲದ ಅಸ್ವಿತ್ವಕ್ಕೆ ಬೆದರಿಕೆ ಒಡ್ಡುವುದಕ್ಕೆ ನಾವು ಅವಕಾಶ ಕೊಡುವುದಿಲ್ಲ~ ಎಂದು ಮೂಲನಿವಾಸಿಗಳು ಹೇಳಿದ್ದಾರೆ.

`ರಯೊ +20 ಶೃಂಗ ಸಭೆ ಮತ್ತು ಪರಿಸರ ಸ್ನೇಹಿ ಆರ್ಥಿಕತೆಯ ಧ್ಯೇಯೋದ್ದೇಶಗಳು, ಮೂಲ ನಿವಾಸಿಗಳು ಎದುರಿಸುತ್ತಾ ಬಂದಿರುವ ವಸಾಹತುಶಾಹಿಯ ಮುಂದುವರಿದ ಭಾಗವೇ ಆಗಿದೆ~ ಎಂದು ಆರೋಪಿಸಲಾಗಿದೆ.

`ಸ್ವಯಂ ನಿರ್ಣಯದ, ಸ್ವಯಂ ಆಡಳಿತ ನಡೆಸುವ ಮತ್ತು ಅಭಿವೃದ್ಧಿ ಕುರಿತು ಸ್ವತಃ ನಿರ್ಧಾರ ತೆಗೆದುಕೊಳ್ಳುವ ನಮ್ಮ ಹಕ್ಕುಗಳು, ಭೌಗೋಳಿಕ ಪ್ರದೇಶಗಳು ಮತ್ತು ಸಂಪನ್ಮೂಲಗಳ ಮೇಲೆ ನಾವು ಹೊಂದಿರುವ ಹಕ್ಕುಗಳ ಮೇಲೆ ವಿಶ್ವದ ವಿವಿಧ ಸರ್ಕಾರಗಳು ದಾಳಿ ನಡೆಸುತ್ತಿವೆ~ ಎಂದು ಆಪಾದಿಸಿದ್ದಾರೆ.

ಈ ಪರ್ಯಾಯ ಶೃಂಗಸಭೆಯಲ್ಲಿ ಜಗತ್ತಿನ 200 ಪರಿಸರವಾದಿ ಗುಂಪುಗಳು ಮತ್ತು ಸಾಮಾಜಿಕ ಚಳವಳಿ ಸಂಸ್ಥೆಗಳು ಭಾಗವಹಿಸಿದ್ದವು.

ಬ್ರೆಜಿಲ್‌ನ 20 ಮೂಲ ನಿವಾಸಿಗಳ ಗುಂಪುಗಳ 400 ಪ್ರತಿನಿಧಿಗಳು ಸೇರಿದಂತೆ ಕೆನಡಾ, ಅಮೆರಿಕ, ಕೊಲಂಬಿಯಾ ಮತ್ತು ನಿಕರಾಗುವಾದ 1,200 ಮೂಲ ನಿವಾಸಿಗಳು ಸಭೆಯಲ್ಲಿದ್ದರು.