ಪಶುಪಾಲನೆ ಇಲಾಖೆಯಲ್ಲಿ ಪಶುವೈದ್ಯರ ಕೊರತೆಯಿಂದ ಗ್ರಾಮೀಣ ಪ್ರದೇಶಗಳಲ್ಲಿ ಕಾರ್ಯನಿರ್ವಹಿಸಲು ನಿವೃತ್ತ ಪಶುವೈದ್ಯರನ್ನು ಗುತ್ತಿಗೆ ಆಧಾರದ ಮೇಲೆ ಒಂದು ವರ್ಷದ ಅವಧಿಗೆ ಈ ವರ್ಷದ ಜನವರಿಯಲ್ಲಿ ಮರು ನೇಮಕ ಮಾಡಿಕೊಂಡ ಸರ್ಕಾರದ ಕ್ರಮ ಸ್ವಾಗತಾರ್ಹ.
ಇದರ ಆದೇಶದಂತೆ ನನಗೆ ಜನವರಿಯಲ್ಲಿ ದಾವಣಗೆರೆಯ ಒಂದು ಸ್ಥಳಕ್ಕೆ ನೇಮಕಾತಿ ಆದೇಶ ನೀಡಲಾಗಿತ್ತು. ಆದರೆ 4 ತಿಂಗಳು ಕಳೆದ ನಂತರ ಆ ಜಾಗಕ್ಕೆ ಕಾಯಂ ಪಶುವೈದ್ಯರೊಬ್ಬರನ್ನು ವರ್ಗಾವಣೆ ಮಾಡಲಾಯಿತು. ನನ್ನನ್ನು ಕೋರಿಕೆಯ ಮೇರೆಗೆ ಬೇರೆ ಸ್ಥಳಕ್ಕೆ ನಿಯುಕ್ತಗೊಳಿಸಿದರು. ನಂತರ 3 ತಿಂಗಳಾಗುವಷ್ಟರಲ್ಲಿ ಎರಡನೆಯ ಸ್ಥಳಕ್ಕೆ ಮತ್ತೊಬ್ಬ ಪಶುವೈದ್ಯರನ್ನು ವರ್ಗಾವಣೆ ಮಾಡಿ, ನನ್ನನ್ನು ಆ ಸ್ಥಳದಿಂದ ಪದವಿಮುಕ್ತಗೊಳಿಸಲಾಗಿದೆ. ಆದರೆ ನನಗೆ ಯಾವುದೇ ಬದಲಿ ಸ್ಥಳವನ್ನು ಸೂಚಿಸಿರುವುದಿಲ್ಲ. ಈಗ ನಾನು ಸ್ಥಳ ನಿಯುಕ್ತಿಗಾಗಿ ಬೆಂಗಳೂರಿನ ಆಯುಕ್ತರ ಕಚೇರಿಗೆ ಪುನಃ ಅಲೆಯಬೇಕು.
ನಿವೃತ್ತರನ್ನು ಮರುನೇಮಕ ಮಾಡಿ, 3–4 ತಿಂಗಳಿಗೊಮ್ಮೆ ಸ್ಥಳ ಬದಲಾವಣೆ ಮಾಡುತ್ತ ಕನಿಷ್ಠ ಒಂದು ಸ್ಥಳದಲ್ಲಿ ಪೂರ್ಣ ಅವಧಿಗೆ ಕಾರ್ಯನಿರ್ವಹಿಸಲು ಬಿಡದಿರುವುದು ಎಷ್ಟು ಸಮಂಜಸ? ಈ ರೀತಿ ನಡೆಸಿಕೊಂಡಲ್ಲಿ ನಿವೃತ್ತಿ ಹೊಂದಿದವರು ಪಶುವೈದ್ಯರಾಗಿ ಗುತ್ತಿಗೆ ಆಧಾರದ ಮೇಲೆ ಸೇವೆ ಸಲ್ಲಿಸಲು ಯಾರು ಮುಂದೆ ಬಂದಾರು?
– ಡಾ. ಜಿ. ಪಿ. ಮೋಹನ್, ದಾವಣಗೆರೆ