ಸೂರ್ಯನಿಗೂ ಈಗ ಚಳಿ. ಅವನು ಏಳುವುದೂ ತಡವೇ. ಹಿಮ ಪದರಗಳ ನಡುವೆ ಕಿರಣಗಳ ತೂರುತ್ತಾ ಬೆಂಕಿ ಕಾಯಿಸಿ ಕೂತವರಿಗೆ `ಇರಿ, ನಾ ಬಂದೆ' ಎನ್ನುವ ರವಿರಾಯನೂ ಚಳಿಯಲ್ಲಿ ಪುಳಕಗೊಂಡವನಂತೆಯೇ ಇಣುಕುತ್ತಾನೆ.
ಕಬ್ಬನ್ ಉದ್ಯಾನದಲ್ಲಿ ಅದಾಗಲೇ ಜೆರ್ಸಿ ತೊಟ್ಟವರು ಬಿರುಸಿನ ನಡಿಗೆಯನ್ನೋ, ಓಟವನ್ನೋ ಮುಗಿಸುವ ಹಂತಕ್ಕೆ ಬಂದಿರುವುದನ್ನು ಅವನು ನೋಡಿ ಆನಂದತುಂದಿಲನಾಗುತ್ತಾನೆ. ಹಸಿರು ಹಾಸಿನ ನಡುವೆ ಅಲ್ಲಲ್ಲಿ ಮೂಡುವ ಬಿಸಿಲುಕೋಲುಗಳೆ ಸೂರ್ಯನ ನಗುವಿನ ಸಂಕೇತಗಳು. ಚಳಿಗಾಲದ ಈ ಚಿತ್ರಗಳೇ ರವಿ ಪುಳಕಕ್ಕೆ ಕನ್ನಡಿ ಹಿಡಿಯುತ್ತವೆ.