ಚಾಮರಾಜಪೇಟೆ ಕ್ಷೇತ್ರದ ವಾರ್ಡ್ ಸಂಖ್ಯೆ 139ರ ವ್ಯಾಪ್ತಿಗೆ ಬರುವ ಬಕ್ಷಿ ಗಾರ್ಡನ್ ಪ್ರದೇಶದಲ್ಲಿ ಪುಂಡು ಪೋಕರಿಗಳು ಮಾತ್ರವಲ್ಲದೆ, ಕುಡುಕರು, ಬೀದಿ ಕಾಮಣ್ಣರು, ಪುಡಿ ರೌಡಿಗಳ ಹಾವಳಿ ವಿಪರೀತವಾಗಿಬಿಟ್ಟಿದೆ. ಇವರೆಲ್ಲರ ಕಾಟದಿಂದಾಗಿ ಹೆಣ್ಣುಮಕ್ಕಳು ಮತ್ತು ಮಹಿಳೆಯರು ನಿರ್ಭಯವಾಗಿ ತಿರುಗಾಡಲು ಕಷ್ಟವಾಗಿಬಿಟ್ಟಿದೆ.
ಕುಡುಕರು ಮಧ್ಯರಾತ್ರಿಯವರೆಗೂ ಅರಚುತ್ತಾ, ಕಿರುಚುತ್ತಾ ಗಲ್ಲಿ ಗಲ್ಲಿಗಳಲ್ಲಿ ಅಡ್ಡಾಡಿ ಜನರ ನಿದ್ರೆಗೆಡಿಸಿದರೆ, ಬೀದಿ ಕಾಮಣ್ಣರು ಎಲ್ಲೆಂದರಲ್ಲಿ ನಿಂತು ಶಾಲಾ ವಿದ್ಯಾರ್ಥಿನಿಯರನ್ನು, ಮಹಿಳೆಯರನ್ನು ಕೆಟ್ಟ ಶಬ್ದಗಳಿಂದ ಚುಡಾಯಿಸುತ್ತಿರುತ್ತಾರೆ.
ಇನ್ನು ಪುಂಡು ಪೋಕರಿಗಳು, ಪುಡಿ ರೌಡಿಗಳು ಲಾಂಗ್ ಮಚ್ಚುಗಳನ್ನು ಝಳಪಿಸುತ್ತಾ ಜನರಲ್ಲಿ ಭೀತಿ ಹುಟ್ಟಿಸಿ ಮಾಯವಾಗಿಬಿಡುತ್ತಾರೆ.