ವಾಷಿಂಗ್ಟನ್ (ಪಿಟಿಐ): ಮಹಿಳೆಯರಿಗೆ ನೆನಪಿನ ಶಕ್ತಿ ಹೆಚ್ಚು, ಪುರುಷರು ಏಕಕಾಲಕ್ಕೆ ಹಲವು ಕಾರ್ಯಗಳನ್ನು ನಿಭಾಯಿಸಲಾರರು– ಇಬ್ಬರ ಮಿದುಳಿನ ನರತಂತುಗಳು ಭಿನ್ನ ರೀತಿಯಲ್ಲಿ ಬೆಸೆದುಕೊಂಡಿರುವುದೇ ಇದಕ್ಕೆ ಕಾರಣ ಎಂದು ಅಧ್ಯಯನವೊಂದು ಹೇಳಿದೆ.
ಭಾರತೀಯ ಮೂಲದ ವಿಜ್ಞಾನಿಯೊಬ್ಬರು ಈ ಕುರಿತು ಸಂಶೋಧನೆ ನಡೆಸಿದ್ದು, ಮಿದುಳಿನ ನರತಂತುಗಳ ಜೋಡಣೆಯಲ್ಲಿನ ವ್ಯತ್ಯಾಸವನ್ನು ಪತ್ತೆಹಚ್ಚಿದ್ದಾರೆ. ಕೆಲವು ಕೆಲಸಗಳನ್ನು ನಿರ್ವಹಿಸುವುದರಲ್ಲಿ ಪುರುಷರು ನಿಸ್ಸೀಮರಾಗುವುದಕ್ಕೆ ಹಾಗೂ ಇನ್ನು ಕೆಲವು ಕಾರ್ಯಗಳನ್ನು ನಿಭಾಯಿಸುವುದರಲ್ಲಿ ಮಹಿಳೆಯರದು ಎತ್ತಿದ ಕೈ ಆಗಿರುವುದಕ್ಕೆ ಈ ನರತಂತು ಜೋಡಣೆಯ ವ್ಯತ್ಯಾಸವೇ ಕಾರಣ ಎಂದು ಪೆನ್ಸಿಲ್ವೇನಿಯಾ ವಿಶ್ವವಿದ್ಯಾಲಯದ ರೇಡಿಯಾಲಜಿ ತಜ್ಞೆ ಪ್ರೊ.ರಾಗಿಣಿ ವರ್ಮಾ ಪ್ರತಿಪಾದಿಸಿದ್ದಾರೆ.
ಪುರುಷರ ಮಿದುಳಿನಲ್ಲಿನ ನರತಂತುಗಳು ವಿಷಯ ಗ್ರಹಣ ಹಾಗೂ ಸಂಯೋಜಿತ ಕ್ರಿಯೆಗೆ ಪೂರಕವಾಗುವಂತೆ ಜೋಡಣೆಯಾಗಿದ್ದರೆ, ಮಹಿಳೆಯರ ಮಿದುಳಿನ ನರತಂತುಗಳು ವಿಶ್ಲೇಷಣಾತ್ಮಕ ಸಾಮರ್ಥ್ಯ ಹಾಗೂ ಅಂತಃಪ್ರಜ್ಞೆಯ ನಡುವಿನ ಸಂವಹನಕ್ಕೆ ಪೂರಕವಾಗುವಂತೆ ಬೆಸೆದುಕೊಂಡಿವೆ ಎಂಬುದು ಅವರ ವಿವರಣೆ.