ನ್ಯೂಯಾರ್ಕ್ (ಪಿಟಿಐ): ವಿಶ್ವದಲ್ಲೇ ಅತ್ಯಂತ ಹಿರಿಯ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದ ಅಮೆರಿಕದ ಯೂನೈಸ್ ಸ್ಯಾನ್ಬಾರ್ನ್ (115) ಟೆಕ್ಸಾಸ್ನಲ್ಲಿ ಸೋಮವಾರ ಬೆಳಿಗ್ಗೆ ನಿಧನರಾದರು.
ಪ್ರಪಂಚದ ಹಿರಿಯ ಮಹಿಳೆ ಎನಿಸಿದ್ದ ವೆಸ್ಟ್ಇಂಡೀಸ್ನ ಯೂಜಿನ್ ಬ್ಲಾಂಚಾರ್ಡ್ 2010 ರಲ್ಲಿ ಮರಣ ಹೊಂದಿದ ನಂತರ ಸ್ಯಾನ್ಬಾರ್ನ್ ಆ ಪಟ್ಟ ಪಡೆದಿದ್ದರು. ಕಳೆದ ಜುಲೈ 20ರಂದು 115ನೇ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದ ಆಕೆ ಹಲವು ವರ್ಷಗಳಿಂದ ಅನಾರೋಗ್ಯದಿಂದ ಹಾಸಿಗೆ ಹಿಡಿದಿದ್ದರು.
ಮೂರು ಬಾರಿ ಮದುವೆಯಾಗಿದ್ದ ಈ ಹಿರಿಯಜ್ಜಿಯ ಕೊನೆಯ ಪತಿ 1979ರಲ್ಲಿ ಮರಣ ಹೊಂದಿದ್ದರು. ತನ್ನ ಏಕಮಾತ್ರ ಪುತ್ರಿಯೊಂದಿಗೆ ಅವರು ವಾಸಿಸುತ್ತಿದ್ದರು. ಸ್ಯಾನ್ಬಾರ್ನ್ ನಿಧನದಿಂದ ಹಿರಿಯಜ್ಜಿಯ ಪಟ್ಟ ಜಾರ್ಜಿಯಾದ 114ರ ಹರೆಯದ ಬೆಸ್ಸೆ ಕೂಪರ್ ಪಾಲಾಗಿದೆ.