ಬೆಂಗಳೂರು: ಪೋಸ್ಟಲ್ ತಂಡದವರು ಇಲ್ಲಿ ನಡೆಯುತ್ತಿರುವ ಬಿಡಿಎಫ್ಎ ಆಶ್ರಯದ ರಾಜ್ಯ ಸೂಪರ್ ಡಿವಿಷನ್ ಲೀಗ್ ಫುಟ್ಬಾಲ್ ಚಾಂಪಿಯನ್ಷಿಪ್ನಲ್ಲಿ ರೋಚಕ ಜಯ ಸಾಧಿಸಿದರು.
ಅಶೋಕನಗರ ಬೆಂಗಳೂರು ಫುಟ್ಬಾಲ್ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಪೋಸ್ಟಲ್ 2-1 ಗೋಲುಗಳಿಂದ ಡಿವೈಎಸ್ಎಸ್ ತಂಡವನ್ನು ಮಣಿಸಿ ಪೂರ್ಣ ಪಾಯಿಂಟ್ ತನ್ನದಾಗಿಸಿಕೊಂಡಿತು.
ಕೆನೆತ್ (22ನೇ ನಿಮಿಷ) ಮತ್ತು ವೆಂಕಟೇಶ್ (30ನೇ ನಿ.) ಗೋಲು ಗಳಿಸಿ ಪೋಸ್ಟಲ್ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಡಿವೈಎಸ್ಎಸ್ ತಂಡದ ಏಕೈಕ ಗೋಲನ್ನು ಸುನಿಲ್ 55ನೇ ನಿಮಿಷದಲ್ಲಿ ತಂದಿತ್ತರು.
ಈ ಗೆಲುವಿನ ಮೂಲಕ ಪೋಸ್ಟಲ್ ಮೂರು ಪಂದ್ಯಗಳಿಂದ ತನ್ನ ಪಾಯಿಂಟ್ಗಳನ್ನು ಐದಕ್ಕೆ ಹೆಚ್ಚಿಸಿಕೊಂಡಿತು. ಆಡಿದ ಮೂರೂ ಪಂದ್ಯಗಳಲ್ಲಿ ಸೋಲು ಅನುಭವಿಸಿದ ಡಿವೈಎಸ್ಎಸ್ ಇನ್ನೂ ಪಾಯಿಂಟ್ ಖಾತೆ ತೆರೆದಿಲ್ಲ.
ಎಸ್ಎಐಗೆ ಜಯ: `ಎ' ಡಿವಿಷನ್ ಲೀಗ್ ಚಾಂಪಿಯನ್ಷಿಪ್ನ ಪಂದ್ಯದಲ್ಲಿ ಎಸ್ಎಐ ತಂಡ 2-0 ಗೋಲುಗಳಿಂದ ಬೆಂಗಳೂರು ಮಾರ್ಸ್ ತಂಡವನ್ನು ಸೋಲಿಸಿತು. ಪಾವೊನಿಯೊ ಹೊಕಿಪ್ (29) ಮತ್ತು ಸರೋಜ್ ರಾಯ್ (73) ವಿಜಯಿ ತಂಡದ ಪರ ಗೋಲು ಗಳಿಸಿದರು.
ಮಂಗಳವಾರ ನಡೆಯುವ ಪಂದ್ಯಗಳಲ್ಲಿ ಎಜಿಒಆರ್ಸಿ- ಬೆಂಗಳೂರು ಕಿಕ್ಕರ್ಸ್ ಮತ್ತು ಎಡಿಇ- ಆರ್ಡಬ್ಲ್ಯುಎಫ್ ತಂಡಗಳು ಪರಸ್ಪರ ಪೈಪೋಟಿ ನಡೆಸಲಿವೆ.