ನವದೆಹಲಿ: ಶನಿವಾರ ಸಂಜೆ ಮಹಿಳೆಯರ ವಿಭಾಗದಲ್ಲಿ ಭಾರತ ತಂಡ ಆಡಲು ಇನ್ನೂ ಎರಡು ತಾಸು ಇರುವಾಗಲೇ ಮೇಜರ್ ಧ್ಯಾನಚಂದ್ ರಾಷ್ಟ್ರೀಯ ಹಾಕಿ ಕ್ರೀಡಾಂಗಣದಲ್ಲಿ ಜನಗಣ ಮನ ಮೊಳಗಿತ್ತು!
ಹೌದು. ಮಧ್ಯಾಹ್ನ ನಾಲ್ಕು ಗಂಟೆಗೆ ಪುರುಷರ ವಿಭಾಗದ ಫ್ರಾನ್ಸ್ ಮತ್ತು ಪೊಲೆಂಡ್ ನಡುವಿನ ಪಂದ್ಯದ ಸಂದರ್ಭದಲ್ಲಿ ಈ ಪ್ರಮಾದ ಜರುಗಿತು. ಪಂದ್ಯದ ಕೆಲವು ನಿಮಿಷಗಳ ಮುನ್ನ ಉಭಯ ತಂಡಗಳ ರಾಷ್ಟ್ರಗೀತೆ ನುಡಿಸಲಾಗುತ್ತದೆ. ಆದರೆ ಕಂಪ್ಯೂಟರ್ ಆಪರೇಟರ್ ಮಾಡಿದ ಪ್ರಮಾದದಿಂದ ಫ್ರಾನ್ಸ್ ರಾಷ್ಟ್ರಗೀತೆಯ ಬದಲಿಗೆ ಭಾರತದ ರಾಷ್ಟ್ರಗೀತೆ ಆರಂಭವಾಯಿತು. ಇದರಿಂದ ಮೈದಾನದಲ್ಲಿದ್ದ ಆಟಗಾರರು ಮತ್ತು ಗೌರವ ಸಲ್ಲಿಸಲು ಎದ್ದು ನಿಂತಿದ್ದ ಮಾಧ್ಯಮದವರು ಹಾಗೂ ಪ್ರೇಕ್ಷಕರ ಗ್ಯಾಲರಿಯಲ್ಲಿದ್ದ ಬೆರಳೆಣಿಕೆಯಷ್ಟು ಜನರು ಗೊಂದಲಕ್ಕೊಳಗಾದರು. ರಾಷ್ಟ್ರಗೀತೆಯನ್ನು ಅರ್ಧದಲ್ಲಿಯೇ ನಿಲ್ಲಿಸಲಾಯಿತು. ನಂತರ ಫ್ರಾನ್ಸ್ ರಾಷ್ಟ್ರಗೀತೆಯನ್ನು ನುಡಿಸಲಾಯಿತು.