ಲಂಡನ್‌ (ಪಿಟಿಐ): ಇದೇ ಮೊದಲ ಬಾರಿ 75 ವರ್ಷದ ರೋಗಿಯೊಬ್ಬರಿಗೆ ಕೃತಕ ಹೃದಯ ಕಸಿ ಕಟ್ಟುವಲ್ಲಿ ಫ್ರಾನ್ಸ್‌ ವೈದ್ಯರು ಯಶಸ್ವಿಯಾಗಿದ್ದಾರೆ.
ಒಂದು ಕೆ.ಜಿಗಿಂತಲೂ ಕಡಿಮೆ (ಆರೋಗ್ಯವಂತ ಮಾನವನ ಹೃದಯದ ಮೂರು ಪಟ್ಟು) ತೂಕ ಹೊಂದಿರುವ ಈ ಕೃತಕ ಹೃದಯವು ರೋಗಿಯ ಆಯಸ್ಸನ್ನು ಐದು ವರ್ಷ ಹೆಚ್ಚಿಸಬಲ್ಲದು.
ಲೀಥಿಯಂ ಬ್ಯಾಟರಿಯಿಂದ ಕಾರ್ಯ ನಿರ್ವಹಿಸುವ ಈ ಹೃದಯವನ್ನು ಫ್ರಾನ್ಸ್‌ನ ಜೀವವೈದ್ಯಕೀಯ ಕಂಪೆನಿ ‘ಕಾರ್ಮಟ್‌’ ಅಭಿವೃದ್ಧಿ ಪಡಿಸಿದೆ. ರೋಗಿಗಳು ಈ ಹೃದಯವನ್ನು ದೇಹದ ಹೊರಭಾಗದಲ್ಲಿ ಧರಿಸಬಹುದಾಗಿದೆ.
ಪ್ಯಾರಿಸ್‌ನ ಜಾರ್ಜ್‌ ಪೊಂಪಿಡುವೊ ಆಸ್ಪತ್ರೆಯಲ್ಲಿ ಕೃತಕ ಹೃದಯವನ್ನು ವೃದ್ಧ ರೋಗಿಯೊಬ್ಬರಿಗೆ ಯಶಸ್ವಿಯಾಗಿ ಕಸಿ ಮಾಡಲಾಗಿದೆ. ಈ ಕಸಿ ಕಟ್ಟುವಿಕೆಯಲ್ಲಿ ಹಸುಗಳ ಅಂಗಾಂಶ ಸೇರಿದಂತೆ ಹಲವು ‘ಜೈವಿಕ–ಸಾಮಗ್ರಿ’ ಬಳಸಲಾಗುತ್ತದೆ ಎಂದು ‘ದ ಟೆಲಿಗ್ರಾಫ್‌’ ವರದಿ ಮಾಡಿದೆ.
ಇದುವರೆಗೆ ಲಭ್ಯವಿದ್ದ ಕೃತಕ ಹೃದಯಗಳನ್ನು ಕೇವಲ ತಾತ್ಕಾಲಿಕ ಅವಧಿಗಷ್ಟೇ ಬಳಸಲಾಗುತ್ತಿತ್ತು. ಆದರೆ, ಹೊಸ ಹೃದಯವು ಐದು ವರ್ಷಗಳ ಕಾಲ ಯಾವುದೇ ತೊಂದರೆ ಇಲ್ಲದೆ ಕಾರ್ಯನಿರ್ವಹಿಸಬಹುದು.
ಕೃತಕ ಹೃದಯ ಅಳವಡಿಸಲಾಗಿರುವ ರೋಗಿಯ ಆರೋಗ್ಯ ಸ್ಥಿರವಾಗಿದ್ದು, ಚಿಕಿತ್ಸೆಗೆ ಸೂಕ್ತವಾಗಿ ಸ್ಪಂದಿಸುತ್ತಿದ್ದಾರೆ ಎಂದು ವೈದ್ಯರು ಹೇಳಿದ್ದಾರೆ.
