ಬಂಡಾಯದ ನೆಲದಲ್ಲಿ ಅನುಕಂಪದ ಅಲೆ

ಗದಗ: ರೈತ ಹೋರಾಟಕ್ಕೆ ಹೆಸರಾದ ನರಗುಂದದಲ್ಲಿ ಈಗ ಅನುಕಂಪ ಅಲೆಯದ್ದೇ ಮಾತು. ಆಕಸ್ಮಿಕ ಗುಂಡೇಟಿನಿಂದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಹಾಲಿ ಶಾಸಕ ಸಿ.ಸಿ.ಪಾಟೀಲ  ಕುಟುಂಬದವರು ಅನುಕಂಪ ಅಲೆ ಸೃಷ್ಟಿಸಿ ಲಾಭ ಪಡೆದುಕೊಳ್ಳುವ ಲೆಕ್ಕಾ ಚಾರದಲ್ಲಿ ತೊಡಗಿದ್ದರೆ, ಇತ್ತ ರಾಜಕೀಯ ಜೀವನದ ಕೊನೆ ಚುನಾವಣೆ ಎದುರಿಸುತ್ತಿರುವ ಮಾಜಿ ಸಚಿವ ಬಿ.ಆರ್.ಯಾವಗಲ್ ಅವರನ್ನು ಗೆಲ್ಲಿಸಬೇಕು ಎಂದು ಅವರ ಅಭಿಮಾನಿಗಳು ಮತದಾರರ ಬಳಿ ಅನುಕಂಪ ಪಡೆಯಲು ಮುಂದಾಗಿದ್ದಾರೆ.

ಸತತವಾಗಿ ಎರಡು ಬಾರಿ ಆಯ್ಕೆಯಾಗಿರುವ ಶಾಸಕ ಸಿ.ಸಿ.ಪಾಟೀಲ ಬಿಜೆಪಿಯಿಂದ ಮೂರನೇ ಬಾರಿಗೆ ಕಣಕ್ಕಿಳಿದಿದ್ದಾರೆ. ಅವರಿಗೆ ಪ್ರಬಲ ಎದುರಾಳಿ ಆಗಿರುವ ಕಾಂಗ್ರೆಸ್‌ನ ಬಿ.ಆರ್. ಯಾವಗಲ್ ಗೆಲುವಿನ ಓಟಕ್ಕೆ ತಡೆಯೊಡ್ಡಲು ಹವಣಿಸುತ್ತಿದ್ದಾರೆ.

1983 ಮತ್ತು 1985ರ ಚುನಾವಣೆಯಲ್ಲಿ ಜನತಾ ಪಕ್ಷದಿಂದ ಬಿ.ಆರ್.ಯಾವಗಲ್ ಜಯ ಸಾಧಿಸಿದರು. 1989ರಲ್ಲಿ ಸೋಲುಂಡ ಬಳಿಕ 1994 ಮತ್ತು 1999ರಲ್ಲಿ ಮತ್ತೆ ಯಾವಗಲ್ ಆಯ್ಕೆಯಾಗುವ ಮೂಲಕ ನೆಲೆ ಭದ್ರಪಡಿಸಿದರು.

2004ರ ಚುನಾವಣೆಯಲ್ಲಿ ಸಿ.ಸಿ.ಪಾಟೀಲ ಆಯ್ಕೆಯಾಗುವ ಮೂಲಕ ಕ್ಷೇತ್ರದಲ್ಲಿ ಮೊದಲ ಬಾರಿಗೆ ಕಮಲ ಅರಳಿಸಿದ ಕೀರ್ತಿ ತಂದು ಕೊಂಡರು. 2008ರ ಚುನಾವಣೆಯಲೂ ಗೆಲುವಿನ ಯಾತ್ರೆ ಮುಂದುವರೆಸಿದರು. ಈ ಬಾರಿ ಹ್ಯಾಟ್ರಿಕ್ ಸಾಧಿಸುತ್ತಾರೆ ಎಂಬ ಕಾತರ ಕಾರ್ಯಕರ್ತರಲ್ಲಿತ್ತು. ಆದರೆ ಆಕಸ್ಮಿಕ ಗುಂಡೇಟಿನಿಂದ ಆಸ್ಪತ್ರೆ ಸೇರಬೇಕಾಯಿತು.

ಕಳಸಾ-ಬಂಡೂರಿ ನಾಲಾ ಜೋಡಣೆಯಾಗಬೇಕು ಎಂಬುದು ಕ್ಷೇತ್ರ ಜನರ ಬಹುದಿನಗಳ ಬೇಡಿಕೆ. ಈ ಯೋಜನೆ ಕಾಂಗ್ರೆಸ್-ಬಿಜೆಪಿ ಅಭ್ಯರ್ಥಿಗಳಿಬ್ಬರಿಗೂ ಮೈನಸ್ ಪಾಯಿಂಟ್. `ಯಾವ ಸರ್ಕಾರ ಬಂದರೂ ಯೋಜನೆ ಪೂರ್ಣಗೊಳ್ಳಲಿಲ್ಲ' ಎಂಬ ಅಸಮಾ ಧಾನ ಒಂದೆಡೆಯಾದರೆ, `ಅಧಿಕಾರದಲ್ಲಿದ್ದರೂ ರೈತರ ಹಿತರಕ್ಷಣೆ ಮಾಡಲು ಬಿಜೆಪಿಗೆ ಸಾಧ್ಯವಾಗಲಿಲ್ಲ' ಎಂಬ ಅಭಿಪ್ರಾಯ ಮತ್ತೊಂದೆಡೆ.

ಸಿ.ಸಿ.ಪಾಟೀಲ ಪ್ರಚಾರದಲ್ಲಿ ತೊಡಗದಿದ್ದರೂ ಅವರ ಕುಟುಂಬದ ಸದಸ್ಯರು ತಂಡಗಳನ್ನು ರಚಿಸಿಕೊಂಡು ಕ್ಷೇತ್ರದಲ್ಲಿ ಪಾಟೀಲರು ಮಾಡಿದ ಅಭಿವೃದ್ಧಿ ಕಾರ್ಯಗಳ ಪಟ್ಟಿ ಹಿಡಿದು ಮತಯಾಚನೆಯಲ್ಲಿ ತೊಡಗಿದ್ದಾರೆ. ಆಧುನಿಕ ತಂತ್ರಜ್ಞಾನ ಬಳಸಿಕೊಂಡು ಈಗಾಗಲೇ ಆಸ್ಪತ್ರೆಯಿಂದಲೇ ವಿಡಿಯೋ ಕಾನ್ಫರೆನ್ಸ್ ಮೂಲಕ ಪಾಟೀಲ ಕ್ಷೇತ್ರದ ಜನತೆಯ ಮತಯಾಚನೆಯನ್ನೂ ಮಾಡಿದ್ದಾರೆ.

ಬಿಜೆಪಿ ಸರ್ಕಾರದ ದುರಾಡಳಿತ, ಭ್ರಷ್ಟಾಚಾರ ಮತ್ತು ವೈಫಲ್ಯ ಮುಂದಿಟ್ಟುಕೊಂಡು ಕೊನೆ ಬಾರಿ ಗೆಲುವು ಸಾಧಿಸಲು ಯಾವಗಲ್ ಅವರು ಮತದಾರರ ಓಲೈಕೆಯಲ್ಲಿ ಮುಂದಾಗಿದ್ದಾರೆ. ಕೊನೆ ಬಾರಿ ಆರಿಸಿ ತರಬೇಕು ಎಂದು ಅವರ ಅಭಿಮಾನಿಗಳು ಸಹ ಬೆವರು ಹರಿಸುತ್ತಿದ್ದಾರೆ.

20 ತಿಂಗಳ ಅಧಿಕಾರವಧಿಯಲ್ಲಿ ಎಚ್. ಡಿ.ಕುಮಾರಸ್ವಾಮಿ ಕೈಗೊಂಡ ಜನಪರ ಸೇವೆ, ಗ್ರಾಮ ವಾಸ್ತವ್ಯ ಬಗ್ಗೆ ಮತದಾರರಿಗೆ ತಿಳಿಸಿ ಜೆಡಿಎಸ್ ಅಭ್ಯರ್ಥಿ ಪ್ರಕಾಶ ಕರಿ ಅವರು ತಮ್ಮದೇ ಕಾರ್ಯಪಡೆ ಕಟ್ಟಿಕೊಂಡು ಮತಯಾಚನೆ ಮಾಡುತ್ತಿದ್ದರೆ, ಶ್ರೀರಾಮುಲು ಅವರ ಸಾಧನೆಗಳನ್ನು ಜನರ ಮುಂದೆ ತೆರೆದಿಟ್ಟು ಬಿಎಸ್‌ಆರ್ ಕಾಂಗ್ರೆಸ್ ಅಭ್ಯರ್ಥಿ ಎಸ್.ಎಚ್.ಶಿವನಗೌಡ್ರ ಮತ ಬೇಟೆಯಲ್ಲಿ ತೊಡಗಿದ್ದರೆ. ಮಾಜಿ ಮತ್ತು ಹಾಲಿ ಶಾಸಕರ ಓಟಕ್ಕೆ ತೊಡರಗಾಲು ಹಾಕಲು ಕೆಜೆಪಿ ಅಭ್ಯರ್ಥಿ ಕುಬೇರ ಗೌಡ ಪರ್ವತಗೌಡರ, ರಾಣಿ ಚನ್ನಮ್ಮ ಪಕ್ಷದಿಂದ ಗುರುಸಿದ್ದಪ್ಪ ದೇಸಾಯಿ, ಲೋಕ ಜನಶಕ್ತಿಯ ಹೇಮಂತ ಕಡಿಯವರ ಸೇರಿದಂತೆ ನಾಲ್ವರು ಪಕ್ಷೇತರರು ಕಣದಲ್ಲಿದ್ದಾರೆ.

ಸಚಿವ ವರ್ತೂರ ಪರಕಾಶ ಅವರ ಸಹೋದರ ವಿ.ಆರ್.ರಮಾನಂದ, ಕಾಂಗ್ರೆಸ್ ಟಿಕೆಟ್ ವಂಚಿತರಾಗಿ ಬಂಡಾಯ ಅಭ್ಯರ್ಥಿ ಯಾಗಿ ಕಣದಲ್ಲಿರುವ ಏಕೈಕ ಮಹಿಳೆ ಶಕುಂತಲಾ ಕೊಂಡಾಬಿಂಗಿ, ಸುರೇಶ ಮುಂಡರಗಿ, ಕೃಷ್ಣಗೌಡ ಪಾಟೀಲ ಅವರು ಮತದಾರರ ಓಲೈಕೆಗೆ ಮಂದಾಗಿದ್ದಾರೆ.

ಈ ಬಾರಿ ಮತದಾರರು ಹಾಲಿ ಶಾಸಕ ಸಿ.ಸಿ.ಪಾಟೀಲರ ಹ್ಯಾಟ್ರಿಕ್ ಸಾಧನೆಗೆ ಕೈಜೋಡಿಸುತ್ತಾರೋ, ರಾಜಕೀಯ ಭವಿಷ್ಯದ ಕೊನೆ ಮೆಟ್ಟಿಲು ಏರಲು ಮಾಜಿ ಶಾಸಕ ಬಿ.ಆರ್.ಯಾವಗಲ್‌ಗೆ ಅವಕಾಶ ಮಾಡಿಕೊಡುತ್ತಾರೋ ಎಂಬ ಕುತೂಹಲ ಮನೆ ಮಾಡಿದೆ.