ಪಣಜಿ (ಪಿಟಿಐ): ಇಂಡಿಯನ್‌ ಮುಜಾಹಿದೀನ್‌ ಉಗ್ರ ಯಾಸೀನ್‌ ಭಟ್ಕಳ ಗೋವಾ ರಾಜ್ಯದ ಅಂಜುನಾ ಗ್ರಾಮದಲ್ಲಿ ಬಾಡಿಗೆಗೆ ಇದ್ದ ಮನೆಯಿಂದ ಬಾಂಬ್‌ ತಯಾರಿಕಾ ಸಾಧನವನ್ನು ರಾಷ್ಟ್ರೀಯ ತನಿಖಾ ತಂಡ ವಶಪಡಿಸಿಕೊಂಡಿದೆ.
ಹೋದ ಶನಿವಾರ ಯಾಸೀನ್‌ನನ್ನು ಕರೆತಂದಿದ್ದ ಎನ್‌ಐಎ ಸಿಬ್ಬಂದಿ ಮನೆ ತಪಾಸಣೆ ಮಾಡಿದಾಗ ಬಾಂಬ್‌ ತಯಾರಿಕೆ ಸಾಧನ ಪತ್ತೆಯಾಯಿತು ಎಂದು ಮುಖ್ಯಮಂತ್ರಿ ಮನೋಹರ್‌ ಪರಿಕ್ಕರ್‌ ಬುಧವಾರ ತಿಳಿಸಿದರು.
ಯಾಸೀನ್‌ ಮತ್ತು ಆತನ ಸಹಚರರಿಗೆ ಮನೆಯನ್ನು ಬಾಡಿಗೆ ನೀಡಿದ್ದ ಮಾಲೀಕ, ಇದಕ್ಕೆ ಮುನ್ನ ಸುದ್ದಿಸಂಸ್ಥೆ ಜತೆ ಮಾತನಾಡಿ, ಎನ್‌ಐಎ ಸಿಬ್ಬಂದಿ ಕೆಲವು ಆಸಿಡ್‌ ಬಾಟಲಿಗಳು ಹಾಗೂ ಇನ್ನಿತರ ವಸ್ತುಗಳನ್ನು ವಶಪಡಿಸಿಕೊಂಡಿದ್ದರು ಎಂದು ಮಾಹಿತಿ ನೀಡಿದ್ದರು.
ಯಾಸೀನ್‌ ಹಾಗೂ ಇನ್ನಿಬ್ಬರು 2011ರ ನವೆಂಬರ್‌ನಿಂದ 2012ರ ಡಿಸೆಂಬರ್‌ವರೆಗೆ ಈ ಮನೆಯಲ್ಲಿ ಇದ್ದರು. ನಂತರ ಮಾಲೀಕ ಧ್ಯಾನೇಶ್ವರ್‌ ಚಾರಿ ಅವರಿಗೂ ತಿಳಿಸದೆ, ಮನೆ ಖಾಲಿ ಮಾಡಿದ್ದರು.
ಯಾಸೀನ್‌ನನ್ನು ಶನಿವಾರ ರಾತ್ರಿ ದೆಹಲಿಯಿಂದ ವಿಮಾನದಲ್ಲಿ ಕರೆತಂದಿದ್ದ ಎನ್‌ಐಎ ಸಿಬ್ಬಂದಿ, ಆತ ಬಾಡಿಗೆ ಇದ್ದ ಮನೆಗೆ ಭೇಟಿ ನೀಡಿ ತಪಾಸಣೆ ನಡೆಸಿದ್ದರು. ಪಣಜಿ ಹತ್ತಿರದ ಚಿಂಬೆಲ್‌ ಎಂಬ ಕೊಳೆಗೇರಿಗೂ ಭೇಟಿ ನೀಡಿ, ಆಮೇಲೆ ಅದೇ ರಾತ್ರಿ ದೆಹಲಿಗೆ ವಾಪಸ್ಸಾಗಿದ್ದರು.ಇದೇ ವೇಳೆ ಎನ್‌ಐಎ ಚಿಂಬೆಲ್‌ನಲ್ಲಿ ವ್ಯಕ್ತಿಯೊಬ್ಬನನ್ನು ತನಿಖೆಗಾಗಿ ವಶಕ್ಕೆ ತೆಗೆದುಕೊಂಡಿತು. ಯಾಸೀನ್‌ ಬಳಸುತ್ತಿದ್ದ ಸೆಕೆಂಡ್‌ ಹ್ಯಾಂಡ್‌ ಬೈಕ್‌ ವಶಪಡಿಸಿಕೊಳ್ಳಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಮನೆಯನ್ನು ಬಾಡಿಗೆ ಪಡೆಯುವಾಗ ಯಾಸೀನ್‌ ಎಂಬ ಹೆಸರನ್ನು ಹೇಳಲೇ ಇಲ್ಲ, ಪುಣೆಯ ವಿಳಾಸ ನೀಡಿದ ಬೇರೊಬ್ಬ ಬಾಡಿಗೆ ಒಪ್ಪಂದ ಮಾಡಿಕೊಂಡ, ನಂತರ ಯಾಸೀನ್‌ ಮನೆಗೆ ಬಂದು ಸೇರಿಕೊಂಡ; ಪುಣೆಯ ವಿಳಾಸ ನೀಡಿ ಬಾಡಿಗೆ ಪಡೆದಾತನ ಹೆಸರು ತನಗೆ ನೆನಪಿಲ್ಲ ಎಂದು ಮನೆ ಮಾಲೀಕ ಮಾಹಿತಿ ನೀಡಿದ್ದಾರೆ.
