ಬೆಂಗಳೂರು: ಸರ್ಕಾರಿ ಸ್ವಾಮ್ಯದ ಭಾರತ್ ಅರ್ಥ್ ಮೂವರ್ಸ್ ಲಿಮಿಟೆಡ್ (ಬಿಇಎಂಎಲ್) ಹೂಳೆತ್ತುವ ಯಂತ್ರೋಪಕರಣಗಳ ತಯಾರಿಕೆ, ವಿನ್ಯಾಸಕ್ಕೆ ಸಂಬಂಧಿಸಿದಂತೆ ನೆದರ್‌ಲೆಂಡ್ ಮೂಲದ ವೋಸ್ಟ್ ಎಲ್‌ಎಂಜಿ ಕಂಪೆನಿ ಜತೆ ಒಪ್ಪಂದ ಮಾಡಿಕೊಂಡಿದೆ.
ಈ ಜಂಟಿ ಒಪ್ಪಂದದ ಅನ್ವಯ ದೇಶದಲ್ಲಿ ತಯಾರಿಸಲಾಗುವ ಹೂಳೆತ್ತುವ ಯಂತ್ರಗಳನ್ನು `ಬಿಇಎಂಎಲ್~ ಆಗ್ನೇಯ ಏಷ್ಯಾ ಮಾರುಕಟ್ಟೆಗಳಿಗೆ ರಫ್ತು ಮಾಡಲಿದೆ. ಈ ಉಪಕರಣಗಳ ತಯಾರಿಕೆಗಾಗಿ ವೋಸ್ಟ್ ಎಲ್‌ಎಂಜಿ ಕಂಪೆನಿಯಿಂದ ತಂತ್ರಜ್ಞಾನ ನೆರವು ಪಡೆದುಕೊಳ್ಳಲಾಗುವುದು ಎಂದು ಬಿಇಎಂಎಲ್ ಪ್ರಕಟಣೆ ತಿಳಿಸಿದೆ.
ವೋಸ್ಟ್ ಎಲ್‌ಎಂಜಿ ಜತೆಗಿನ ಒಪ್ಪಂದವು ಭಾರತ-ನೆದರ್‌ಲೆಂಡ್ ನಡುವಿನ ವಾಣಿಜ್ಯ ಸಂಬಂಧವನ್ನು ಇನ್ನಷ್ಟು ಬಲಪಡಿಸಲಿದ್ದು, ಇದರಿಂದ ದೇಶೀಯ ಮತ್ತು ಆಗ್ನೇಯ ಏಷ್ಯಾ ಮಾರುಕಟ್ಟೆಗಳಲ್ಲಿ ಇರುವ ಹೂಳೆತ್ತುವ ಯಂತ್ರಗಳ ಬೇಡಿಕೆಗಳನ್ನು ಪೂರೈಸಲು ಸಾಧ್ಯವಾಗುತ್ತದೆ ಎಂದು ಬಿಇಎಂಎಲ್ ಹೇಳಿದೆ.
