ಬಿಜೆಪಿಗೆ ಉಲ್ಲಾಸ, ಉಳಿದ ಪಕ್ಷಗಳಿಗೆ ಆತಂಕ

ಲಖನೌ: ಉತ್ತರ ಪ್ರದೇಶದ ಮತಗಟ್ಟೆ ಸಮೀಕ್ಷೆಗಳ ಅಂಕಿಅಂಶಗಳು ಬಿಜೆಪಿಗೆ ಉಲ್ಲಾಸದಾಯಕವಾಗಿದ್ದರೆ, ಇತರ ಪಕ್ಷಗಳನ್ನು ಆತಂಕಕ್ಕೆ ದೂಡಿದೆ. ಸಮೀಕ್ಷೆಗಳ ಅಂಕಿಅಂಶಗಳನ್ನು ಬಿಜೆಪಿಯೇತರ ಪಕ್ಷಗಳು ತಳ್ಳಿಹಾಕಿವೆಯಾದರೂ ಆ ಪಕ್ಷಗಳ ಮುಖಂಡರ ಮುಖದಲ್ಲಿನ ಆತಂಕದ ಗೆರೆಗಳು ಸ್ಪಷ್ಟವಾಗಿ ಗೋಚರಿಸುತ್ತಿವೆ.

ಕಾಂಗ್ರೆಸ್‌, ಸಮಾಜವಾದಿ (ಎಸ್‌ಪಿ) ಮತ್ತು ಬಹುಜನ ಸಮಾಜ ಪಕ್ಷಗಳ (ಬಿಎಸ್‌ಪಿ) ಕಚೇರಿಗಳು ಮಂಗಳವಾರ ಬಿಕೋ ಎನ್ನುತ್ತಿದ್ದು, ಆ ಪಕ್ಷಗಳ ಚಿಂತೆಯನ್ನು ಪ್ರತಿಫಲಿಸುವಂತಿದ್ದವು.

ವಿವಿಧ ಮತಗಟ್ಟೆ ಸಮೀಪ ಸಮೀಕ್ಷೆಗಳು ರಾಜ್ಯದಲ್ಲಿ ಬಿಜೆಪಿ ಜಯಭೇರಿ ಬಾರಿಸಲಿದೆ ಎಂದೇ ಅಭಿಪ್ರಾಯಪಟ್ಟಿವೆ. ಬಹುತೇಕ ಸಮೀಕ್ಷೆಗಳು 46ರಿಂದ 54 ಕ್ಷೇತ್ರಗಳಲ್ಲಿ  ಬಿಜೆಪಿ ಗೆಲ್ಲುತ್ತದೆ ಎಂದಿವೆ. ಒಂದು ಸಮೀಕ್ಷೆ ಮಾತ್ರ ಬಿಜೆಪಿಗೆ 70 ಸ್ಥಾನಗಳು ದೊರಕಲಿದೆ ಎಂದು ಅಂದಾಜಿಸಿದೆ.

ಸಮೀಕ್ಷೆಗಳ ಅಂಕಿಅಂಶದಿಂದ ಉಬ್ಬಿಹೋಗಿರುವ ರಾಜ್ಯದ ಬಿಜೆಪಿ ಮುಖಂಡರು, ‘ಇದು ಮೋದಿ ಅಲೆ ಇರುವುದನ್ನು ಸಾಬೀತು ಮಾಡಿದೆ’ ಎಂದು ಬೀಗುತ್ತಿದ್ದಾರೆ.

‘ರಾಜ್ಯದಲ್ಲಿ ಫಲಿತಾಂಶ ಅಚ್ಚರಿದಾಯಕವಾಗಿರುತ್ತದೆ ಎಂಬ ನಮ್ಮ ಅಭಿಪ್ರಾಯವನ್ನು ಮತಗಟ್ಟೆ ಸಮೀಪ ಸಮೀಕ್ಷೆಗಳು ದೃಢಪಡಿಸಿವೆ’ ಎಂದ ಬಿಜೆಪಿ ಮುಖಂಡ ವಿಜಯ್‌ ಬಹದೂರ್‌ ಪಾಠಕ್‌, 60 ಕ್ಷೇತ್ರಗಳಲ್ಲಿ ಪಕ್ಷದ ಅಭ್ಯರ್ಥಿಗಳು ಗೆಲುವು ಸಾಧಿಸಲಿದ್ದಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಸಮೀಕ್ಷೆಗಳ ಅಭಿಪ್ರಾಯಗಳನ್ನು ಸಾರಾಸಗಟಾಗಿ ತಳ್ಳಿಹಾಕಿರುವ ಕಾಂಗ್ರೆಸ್‌, ‘ಇದು ಅವೈಜ್ಞಾನಿಕ’ ಎಂದಿದೆ.
‘ಚುನಾವಣಾ ಪೂರ್ವ ಇಲ್ಲವೆ ನಂತರದ ಸಮೀಕ್ಷೆಗಳ ಬಗ್ಗೆ ನಮಗೆ ನಂಬಿಕೆ ಇಲ್ಲ. ನಾವು ಫಲಿತಾಂಶದ ನಿರೀಕ್ಷೆಯಲ್ಲಿದ್ದೇವೆ’ ಎಂದು ಕಾಂಗ್ರೆಸ್‌ ಹಿರಿಯ ಮುಖಂಡ ಸತ್ಯದೇವ್‌ ತ್ರಿಪಾಠಿ ಹೇಳಿದರು.

ಸಮೀಕ್ಷೆಗಳ ಅಂಕಿಅಂಶವನ್ನು ‘ತ್ಯಾಜ್ಯ’ ಎಂದಿರುವ ಸಮಾಜವಾದಿ ಪಕ್ಷ,  ರಾಜ್ಯದಲ್ಲಿ ಪಕ್ಷವು ಅತಿಹೆಚ್ಚು ಸ್ಥಾನಗಳಿಸಲಿದೆ. ತೃತೀಯರಂಗವೇ ಹೊಸ ಸರ್ಕಾರ ರಚಿಸಲಿದೆ ಎಂದಿದೆ.

‘2012ರ ನಡೆದ ರಾಜ್ಯ ವಿಧಾನಸಭಾ ಚುನಾವಣೆಯ ಕುರಿತ ಸಮೀಕ್ಷೆಗಳು ಅತಂತ್ರ ಸ್ಥಿತಿ ನಿರ್ಮಾಣವಾಗಲಿದೆ ಎಂದೇ ಹೇಳಿದ್ದವು. ಆದರೆ, ನಮ್ಮ ಪಕ್ಷ ಸ್ಪಷ್ಟ ಬಹುಮತ ಗಳಿಸಿತು. ಈ ಸಾರಿಯೂ ಸಮೀಕ್ಷೆಗಳ ಅಂಕಿಅಂಶಗಳು ಸರಿಯಲ್ಲ ಎನ್ನುವುದು ಇನ್ನೆರಡು ದಿನಗಳಲ್ಲಿ ಸಾಬೀತಾಗಲಿದೆ’ ಎಂದು  ಎಸ್‌ಪಿ ಮುಖಂಡರು ತಿಳಿಸಿದರು.