ನವದೆಹಲಿ(ಪಿಟಿಐ): ಗ್ರಾಹಕರಿಂದ ಯಾವುದೇ ವಿರೋಧ ಇಲ್ಲದಿದ್ದರೂ, ಕೆಲವು ದೇಶಗಳು ಬಿ.ಟಿ ಹತ್ತಿ ಆಮದು ಮೇಲೆ ನಿರ್ಬಂಧ ಹೇರುತ್ತಿವೆ ಎಂದು ಹತ್ತಿ ಉತ್ಪಾದನೆಯಲ್ಲಿ ಜೈವಿಕ ತಂತ್ರಜ್ಞಾನ ಬಳಕೆ ಕುರಿತು ಅಧ್ಯಯನ ನಡೆಸುತ್ತಿರುವ ಅಮೆರಿಕ ಮೂಲದ ಸಂಸ್ಥೆಯೊಂದು ಹೇಳಿದೆ.
ಈ ಸಂಸ್ಥೆಯಲ್ಲಿ 9 ದೇಶಗಳ ತಜ್ಞರಿದ್ದು, ಈ ಮಾಸಾಂತ್ಯಕ್ಕೆ ನಡೆಯಲಿರುವ 72ನೇ ಅಂತರರಾಷ್ಟ್ರೀಯ ಹತ್ತಿ ಸಲಹಾ ಸಮಿತಿ(ಐಸಿಎಸಿ) ಸಭೆಯಲ್ಲಿ ಈ ಕುರಿತು ವರದಿ ಸಲ್ಲಿಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
1996ರಿಂದ ಬಿ.ಟಿ ಹತ್ತಿ ವಾಣಿಜ್ಯ ಬಳಕೆಗೆ ಅವಕಾಶ ನೀಡಲಾಗಿದೆ. ಇದುವರೆಗೆ ಗ್ರಾಹಕರು ಇದನ್ನು ತಿರಸ್ಕರಿಸಿರುವ ಕುರಿತು ಯಾವುದೇ ಸಾಕ್ಷ್ಯ ಆಧಾರ ಇಲ್ಲ. ಹಾಗಿದ್ದರೂ ಕೆಲವು ದೇಶಗಳು ಇದರ ಆಮದು ಮೇಲೆ ಕಠಿಣ ನಿರ್ಬಂಧಗಳನ್ನು ವಿಧಿಸಿವೆ ಎಂದು ಈ ಸಂಸ್ಥೆ ಆರೋಪಿಸಿದೆ.
ಪ್ರಸಕ್ತ ಸಾಲಿನಲ್ಲಿ ಜಾಗತಿಕ ಹತ್ತಿ ಉತ್ಪಾದನೆ 255 ಲಕ್ಷ ಟನ್‌ಗಳಷ್ಟಾಗುವ ನಿರೀಕ್ಷೆ ಇದೆ. 237 ಲಕ್ಷ ಟನ್‌ಗಳಷ್ಟು ಬೇಡಿಕೆ ಅಂದಾಜು ಮಾಡಲಾಗಿದೆ.
