`ಭಾರತಕ್ಕೆ ನೆರವಿತ್ತರೆ ಕಮ್ಯೂನಿಸಂ ಪ್ರಸಾರಕ್ಕೆ ಪ್ರೋತ್ಸಾಹವಿತ್ತಂತೆ'
ರಾವಲ್ಪಿಂಡಿ, ಜುಲೈ 9 - ಭಾರತದ ಸೇನಾ ಸಾಮರ್ಥ್ಯವನ್ನು ಬಲಪಡಿಸುವ ಪಶ್ಚಿಮ ರಾಷ್ಟ್ರಗಳ ನೀತಿಯಿಂದ ಏಷ್ಯದ ಸಣ್ಣ ರಾಷ್ಟ್ರಗಳು ಭಾರತದಿಂದ ದೂರವಾಗಿ ಚೀಣಿ ಆಶ್ರಯವನ್ನರಸ ಬೇಕಾದೀತೆಂದು ಪಾಕಿಸ್ತಾನದ ಅಧ್ಯಕ್ಷ ಅಯೂಬ್ ಖಾನರು ನಿನ್ನೆ ಇಲ್ಲಿ ಎಚ್ಚರಿಕೆಯಿತ್ತರು.
ಅಪಪ್ರಚಾರದಿಂದ `ಅಪಾಯಕರ ಪರಿಣಾಮ'
ಮಾಸ್ಕೊ, ಜುಲೈ 9 - ರಷ್ಯ, ಚೀಣಗಳ ನಡುವಣ ಸಂಬಂಧವನ್ನು ಉದ್ದೇಶಪೂರ್ವಕವಾಗಿ ಕೆಡಿಸಲು ಚೀಣ ನಡೆಸುತ್ತಿರುವ ಪ್ರಚಾರದಿಂದ `ಅಪಾಯಕರ ಪರಿಣಾಮಗಳು' ಉಂಟಾಗುವುದೆಂದು ಸೋವಿಯತ್ ರಷ್ಯ ಇಂದು ಜನತಾ ಚೀಣಕ್ಕೆ ಎಚ್ಚರಿಕೆಯಿತ್ತರು.
ಈ ಪರಿಣಾಮಗಳೇನೆಂಬುದನ್ನು ಸೋವಿಯತ್ ಕಮ್ಯುನಿಸ್ಟ್ ಪಕ್ಷದ ಕೇಂದ್ರ ಸಮಿತಿ ಸ್ಪಷ್ಟಪಡಿಸಲಿಲ್ಲ `ಪ್ರಾವ್ಡಾ' ಪತ್ರಿಕೆಯಲ್ಲಿ ಪ್ರಥಮ ಪುಟದಲ್ಲಿ ಪ್ರಕಟಿಸಿದ ಹೇಳಿಕೆಯೊಂದರಲ್ಲಿ ಸಮಿತಿ ಈ ರೀತಿ ಎಚ್ಚರಿಕೆಯಿತ್ತಿದೆ.
ಮಗುವಿನ ಹೃದಯಕ್ಕೆ ಕವಾಟದ ಜೋಡಣೆ
ನ್ಯೂಯಾರ್ಕ್, ಜುಲೈ 9- ಜೂನ್ 18 ರಂದು ಇಲ್ಲಿನ ಆಸ್ಪತ್ರೆಯೊಂದರಲ್ಲಿ ನಡೆದ ಶಸ್ತ್ರಚಿಕಿತ್ಸೆಯಲ್ಲಿ ಹನ್ನೊಂದು ತಿಂಗಳ ಶಿಶುವೊಂದರ ಹೃದಯದಲ್ಲಿ ಅತಿ ಚಿಕ್ಕ ಕವಾಟಗಳನ್ನು (ವಾಲ್ವ್ಸ್) ಅಳವಡಿಸಲಾಯಿತು.
