ಬೇಡಿಕೆ ಈಡೇರಿಕೆಗೆ ಆಗ್ರಹಿಸಿ ಸತ್ಯಾಗ್ರಹ

ನವಲಗುಂದ: `ತಾಲ್ಲೂಕಿನ ನಾಯಕ ನೂರ ಗ್ರಾಮದಲ್ಲಿ ನಡೆದ ದಲಿತರಿಗೆ ಸಾಮೂಹಿಕ ಬಹಿಷ್ಕಾರ ಪ್ರಕರಣದಲ್ಲಿ ನೊಂದ ಕುಟುಂಬಗಳಿಗೆ ಪರಿಹಾರ ನೀಡುವಲ್ಲಿ ಸರಕಾರ ಮೀನ ಮೇಷ ಮಾಡುತ್ತಿದೆ'  ಎಂದು ಆರೋಪಿಸಿ ರಾಜ್ಯ ಆದಿಜಾಂಬವ ಮಾದಿಗರ ಸಂಘ ಹಾಗೂ ನಾಯ್ಕನೂರ ದಲಿತ ಕುಟುಂಬ ದವರು ಬುಧವಾರ ಬೆಳಿಗ್ಗೆಯಿಂದ ತಹಶೀಲ್ದಾರ ಕಾರ್ಯಾಲಯದ ಎದುರು ಸತ್ಯಾಗ್ರಹ ನಡೆಸಿದರು.

`ನೊಂದ 34 ಕುಟುಂಬಗಳ ಸಂತ್ರಸ್ತರ ಪೈಕಿ 14 ಜನರಿಗೆ ಮಾತ್ರ ಭೂ ಒಡೆತನದ ಯೋಜನೆಯಡಿ ತಲಾ ಎರಡು ಎಕರೆ ಜಮೀನನ್ನು ಮಂಜೂರ ಮಾಡಲಾಗಿದೆ. ಉಳಿದ 24 ಕುಟುಂಬ ಗಳಿಗೆ ಜಮೀನು ಖರಿದಿಸಿ ಕೊಡುವುದಾಗಿ ಸರಕಾರ ಭರವಸೆ ಕೊಡುತ್ತಲೆ ಬಂದಿದೆ.

ಗ್ರಾಮದ ಸುತ್ತಲಿನ ಜಮೀನು ಮಾಲಿಕರು 22 ಎಕರೆ ಜಮೀನು ಮಾರಾಟ ಮಾಡಲು ಒಪ್ಪಿಗೆ ಸೂಚಿಸಿ 6 ತಿಂಗಳು ಹಿಂದೆಯೇ  ಧಾರವಾಡದಲ್ಲಿನ ಡಾ.ಬಿ.ಆರ್.ಅಂಬೇಡ್ಕರ ಅಭಿವೃದ್ಧಿ ನಿಗಮಕ್ಕೆ ಪ್ರಸ್ತಾವನೆ ಸಲ್ಲಿಸಿದ್ದಾರೆ. ಎಕರೆಗೆ ರೂ.3.10 ಲಕ್ಷ ಕ್ಕೆ ಒಪ್ಪಿಗೆಯನ್ನು ಕೊಟ್ಟಿದ್ದಾರೆ.  ಆದರೆ ಸಮಾಜ ಕಲ್ಯಾಣ ಇಲಾಖೆ ವಿರೋಧಿ ನೀತಿ ಅನುಸರಿಸುತ್ತಿರುವುದರಿಂದ ಸಮಸ್ಯೆ ಉಂಟಾಗಿ ಕಾಲಹರಣ ವಾಗುತ್ತಿದೆ.