ದಾವಣಗೆರೆ: ಬೆಳಗಾವಿ ವಿಭಾಗವು ಜಿಲ್ಲಾಡಳಿತ ಹಾಗೂ ಸಾರ್ವಜನಿಕ ಶಿಕ್ಷಣ ಇಲಾಖೆ ಆಶ್ರಯದಲ್ಲಿ ನಡೆದ 14 ಮತ್ತು 17 ವರ್ಷದೊಳಗಿನವರ ಪ್ರಾಥಮಿಕ ಮತ್ತು ಪ್ರೌಢಶಾಲಾ ಮಟ್ಟದ ಬಾಲಕ ಬಾಲಕಿಯರ ರಾಜ್ಯ ಮಟ್ಟದ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಎರಡೂ ವಿಭಾಗಗಳಲ್ಲಿ ಪ್ರಶಸ್ತಿ ಗೆದ್ದುಕೊಂಡಿತು.
ಗುರುವಾರ ಕೊನೆಗೊಂಡ ಈ ಟೂರ್ನಿಯು ರೌಂಡ್ ರಾಬಿನ್ ಮಾದರಿಯಲ್ಲಿ ಆಯೋಜನೆಯಾಗಿತ್ತು. ಬೆಳಗಾವಿಯ ಬಾಲಕರ ತಂಡ 2-1ರಲ್ಲಿ ಬೆಂಗಳೂರು ಮೇಲೂ, 2-0ರಲ್ಲಿ ಗುಲ್ಬರ್ಗ ವಿರುದ್ಧವೂ, 2-1ರಲ್ಲಿ ಮೈಸೂರು ಮೇಲೂ ಜಯ ಪಡೆದು ಅಗ್ರಸ್ಥಾನ ತನ್ನದಾಗಿಸಿಕೊಂಡಿತು.
ಬೆಂಗಳೂರು ತಂಡವು ಗುಲ್ಬರ್ಗ ಮತ್ತು ಮೈಸೂರು ವಿರುದ್ಧ ತಲಾ 2-0ರಲ್ಲಿ ಜಯ ಪಡೆದು ರನ್ನರ್ ಅಪ್ ಸ್ಥಾನಕ್ಕೆ ತೃಪ್ತಿ ಪಟ್ಟಿತು. 2-0ರಲ್ಲಿ ಗುಲ್ಬರ್ಗ ವಿರುದ್ಧ ಜಯ ಸಾಧಿಸಿದ ಮೈಸೂರು ತಂಡವು ಮೂರನೇ ಸ್ಥಾನ ಪಡೆಯಿತು.
ಬಾಲಕಿಯರ ವಿಭಾಗ: ಬೆಳಗಾವಿಯ ಬಾಲಕಿಯರ ತಂಡವು ಬೆಂಗಳೂರು, ಗುಲ್ಬರ್ಗ, ಮೈಸೂರು ವಿಭಾಗದ ತಂಡಗಳ ವಿರುದ್ಧ ತಲಾ 2-0ರಲ್ಲಿ ವಿಜಯ ಸಾಧಿಸಿ ಚಾಂಪಿಯನ್ ಆಯಿತು. ರನ್ನರ್ ಅಪ್ ಸ್ಥಾನ ಪಡೆದ ಬೆಂಗಳೂರು ವಿಭಾಗವು ಗುಲ್ಬರ್ಗ, ಮೈಸೂರು ವಿರುದ್ಧ ತಲಾ 2-0 ಸೆಟ್ಗಳಿಂದ ಜಯ ಸಾಧಿಸಿತು. ಮೈಸೂರು ವಿಭಾಗವು ಗುಲ್ಬರ್ಗದ ಎದುರು 2-0 ಸೆಟ್ಗಳಿಂದ ಗೆಲುವು ಸಾಧಿಸಿ ಮೂರನೇ ಸ್ಥಾನಕ್ಕೆ ತೃಪ್ತಿ ಪಟ್ಟಿತು.
14ರ ವಯೋಮಿತಿ ವಿಭಾಗ: ಬಾಲಕರ ಪಂದ್ಯದಲ್ಲಿ ಗುಲ್ಬರ್ಗ ವಿಭಾಗವು ಪ್ರಶಸ್ತಿ ತನ್ನದಾಗಿಸಿಕೊಂಡಿತು. ಈ ವಿಭಾಗವು ಬೆಂಗಳೂರು ಹಾಗೂ ಬೆಳಗಾವಿ ವಿರುದ್ಧ ತಲಾ 2-0ರಲ್ಲಿ, ಮೈಸೂರು ವಿರುದ್ಧ 2-1 ಸೆಟ್ಗಳಲ್ಲಿ ಗೆಲುವು ಸಾಧಿಸಿತ್ತು.. ಮೈಸೂರು ವಿಭಾಗವು ಬೆಂಗಳೂರು ಹಾಗೂ ಬೆಳಗಾವಿ ವಿರುದ್ಧ 2-0ರಲ್ಲಿ ಜಯ ಸಾಧಿಸಿ ಎರಡನೆ ಸ್ಥಾನ ಪಡೆದರೆ, ಬೆಳಗಾವಿಯು ಬೆಂಗಳೂರು ವಿಭಾಗದ ವಿರುದ್ಧ 2-0ರಲ್ಲಿ ಜಯ ಸಾಧಿಸಿತು.