ನವದೆಹಲಿ (ಐಎಎನ್‌ಎಸ್): ಭಾರತದ ಕಂಪೆನಿಗಳು ಆಮದು ಮಾಡಿಕೊಳ್ಳುವ ತೈಲಕ್ಕೆ ಹಣದ ಬದಲಿಗೆ ಚಿನ್ನವನ್ನು ನೀಡುತ್ತಿರುವ ವದಂತಿಗಳನ್ನು ಇರಾನ್ ಅಲ್ಲಗಳೆದಿದೆ. ಎರಡೂ ದೇಶಗಳ ನಡುವಿನ ಒಪ್ಪಂದದನ್ವಯ `ಆಮದು ತೈಲಕ್ಕೆ ಶೇ 45ರಷ್ಟು ಭಾರತೀಯ ಕರೆನ್ಸಿಯಲ್ಲೇ ಹಣ ಪಾವತಿಯಾಗುತ್ತಿದೆ~ ಎಂದು ಅದು ಸ್ಪಷ್ಟಪಡಿಸಿದೆ.
ಈ ಸಂಬಂಧ ಮಂಗಳವಾರ ಇಲ್ಲಿ ಸುದ್ದಿಗಾರರ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಭಾರತದಲ್ಲಿರುವ ಇರಾನ್‌ನ ರಾಯಭಾರಿ ಸೈಯದ್ ಮೆಹ್ದಿ ನಬೀಜದ್ದೆಹ್ ಅವರು, `ಒಪ್ಪಂದ ಪ್ರಕಾರ ಎರಡೂ ದೇಶಗಳು ತೃಪ್ತವಾಗಿವೆ~ ಎಂದರು. `ಇರಾನ್ ರಫ್ತು ಮಾಡುವ ತೈಲಕ್ಕೆ ಭಾರತದಿಂದ ಹಣದ ಬದಲಿಗೆ ಚಿನ್ನವನ್ನು ಪಾವತಿಯಾಗಿ ಒಪ್ಪಿದೆಯೇ~ ಎಂಬ ಪ್ರಶ್ನೆಗೆ `ಚಿನ್ನ ಸೂಕ್ತವಲ್ಲ~ ಎಂದು ಉತ್ತರಿಸಿದರು. `ಇರಾನ್ ಭಾಗಶಃ ಹಣ ಪಾವತಿ ಒಪ್ಪಿಕೊಳ್ಳುವ ಮೂಲಕ ತನ್ನ ವ್ಯಾಪಾರವನ್ನು ಹೆಚ್ಚಿಸಿಕೊಳ್ಳಬಹುದು~ ಎಂದೂ ಅವರು ಈ ಸಂದರ್ಭದಲ್ಲಿ ತಿಳಿಸಿದರು.
