ನವದೆಹಲಿ: ಕೆನಡಾ ಮೂಲದ ಸ್ಮಾರ್ಟ್‌ಫೋನ್‌ ತಯಾರಿಕಾ ಕಂಪೆನಿ ಬ್ಲ್ಯಾಕ್‌ಬೆರಿಯನ್ನು ಭಾರತೀಯ ಮೂಲದ ಕೆನಡಾ ಉದ್ಯಮಿ ಪ್ರೇಮ್ ವತ್ಸಾ ಒಡೆತನದ ಫೇರ್‌ಫಾಕ್ಸ್ ಫೈನಾಶ್ಶಿಯಲ್‌ ಹೋಲ್ಡಿಂಗ್ಸ್‌ ಲಿಮಿಟೆಡ್‌ ಅಂದಾಜು ₨28,200 ಕೋಟಿಗೆ (470 ಕೋಟಿ ಡಾಲರ್‌– ಪ್ರತಿ ಷೇರಿಗೆ 9 ಡಾಲರ್‌ನಂತೆ) ಖರೀದಿಸಲು ಒಪ್ಪಂದ ಮಾಡಿಕೊಂಡಿದೆ.
ಪ್ರೇಮ್ ವತ್ಸಾ ಹುಟ್ಟಿದ್ದು ಹೈದರಾಬಾದ್‌ನಲ್ಲಿ. ಈಗ ಅವರ ಕುಟುಂಬ ಟೊರಾಂಟೊದಲ್ಲಿ ನೆಲೆಗೊಂಡಿದೆ. ಬ್ಲ್ಯಾಕ್‌ಬೆರಿ ಕಂಪೆನಿಯಲ್ಲಿ ಗರಿಷ್ಠ ಷೇರುಪಾಲು ಹೊಂದಿರುವವರಲ್ಲಿ ಪ್ರೇಮ್ ಕೂಡ ಒಬ್ಬರು. ಆಗಸ್ಟ್‌ನಲ್ಲಿ ಅವರು ಬ್ಲ್ಯಾಕ್‌ಬೆರಿ ನಿರ್ದೇಶಕ ಮಂಡಳಿಯಿಂದ ಹೊರಬಂದಿದ್ದರು.
ಪ್ರೇಮ್ ವತ್ಸಾ ಅವರನ್ನು ‘ಕೆನಡಾದ ವಾರೆನ್‌ ಬಫೆಟ್‌’ ಎಂದೂ ಕರೆಯಲಾಗುತ್ತದೆ.
ಸ್ಮಾರ್ಟ್‌ಫೋನ್‌ ಮಾರುಕಟ್ಟೆಯಲ್ಲಿ ಆಪಲ್‌ ಮತ್ತು ಸ್ಯಾಮ್ಸಂಗ್‌ನಿಂದ ಬ್ಲ್ಯಾಕ್‌ಬೆರಿ ತೀವ್ರ ಸ್ಫರ್ಧೆ ಎದುರಿಸುತ್ತಿದೆ. ವೆಚ್ಚ ಕಡಿತದ ಹಿನ್ನೆಲೆಯಲ್ಲಿ ಇತ್ತೀಚೆಗಷ್ಟೇ ಕಂಪೆನಿ 4,500 ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದು ಹಾಕಿತ್ತು.
