ಐಜ್ವಾಲ್ (ಐಎಎನ್‌ಎಸ್): ಭಾರತದ ನಾಲ್ಕು ಈಶಾನ್ಯ ರಾಜ್ಯಗಳ ಜನರು ಪಾಸ್‌ಪೋರ್ಟ್ ಮತ್ತು ವೀಸಾ ಇಲ್ಲದೆಯೇ ಮ್ಯಾನ್ಮಾರ್‌ನ 16 ಕಿ.ಮೀ ಗಡಿಯೊಳಗೆ ಪ್ರವೇಶಿಸಲು ಆ ದೇಶದ ಸರ್ಕಾರ ಅನುಮತಿ ನೀಡಿದೆ ಎಂದು ಮಿಜೋರಾಂ ಸರ್ಕಾರದ ಅಧಿಕಾರಿಯೊಬ್ಬರು ಸೋಮವಾರ ತಿಳಿಸಿದ್ದಾರೆ.
ಮ್ಯಾನ್ಮಾರ್‌ನ ಶಿನ್ ರಾಜ್ಯದ ಫಾಲಂನಲ್ಲಿ ಕಳೆದ ವಾರ ನಡೆದ ಎರಡು ದೇಶಗಳ ಉಪ ಆಯುಕ್ತರ ಮಟ್ಟದ ಮಾತುಕತೆ ಸಂದರ್ಭದಲ್ಲಿ ಈ ತೀರ್ಮಾನಕ್ಕೆ ಬರಲಾಗಿದೆ. ಗಡಿಯಲ್ಲಿ ನೆಲೆಸಿರುವ ಜನರು ಪಾಸ್‌ಪೋರ್ಟ್ ಮತ್ತು ವೀಸಾ ಇಲ್ಲದೆಯೇ ಗಡಿ ಪ್ರವೇಶಿಸಬಹುದು. ಎರಡು ರಾಷ್ಟ್ರಗಳ ಬಾಂಧವ್ಯ ವೃದ್ಧಿಯಲ್ಲಿ ಇದೊಂದು ಮಹತ್ವದ ಹೆಜ್ಜೆ ಎಂದು ಮಿಜೋರಾಂ ಗೃಹ ಸಚಿವಾಲಯದ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಇಂತಹುದೇ ನಿರ್ಧಾರವನ್ನು ಕಳೆದ ವರ್ಷ ಭಾರತ ಘೋಷಿಸಿತ್ತು. ಆ ಮೂಲಕ ಮ್ಯಾನ್ಮಾರ್ ದೇಶದ ಪ್ರಜೆಗಳು ಈಶಾನ್ಯ ರಾಜ್ಯಗಳಾದ ಮಿಜೋರಾಂ, ಮಣಿಪುರ, ನಾಗಲ್ಯಾಂಡ್ ಮತ್ತು ಅರುಣಾಚಲ ಪ್ರದೇಶದ 16 ಕಿ.ಮೀ ವರೆಗೆ ಪಾಸ್‌ಪೋರ್ಟ್ ಮತ್ತು ವೀಸಾ ಇಲ್ಲದೆಯೇ ಬರಬಹುದಾಗಿದೆ.
