ಮಕ್ಕಳನ್ನು ವೇಶ್ಯಾವಾಟಿಕೆಗೆ ತಳ್ಳುತ್ತಿದ್ದ ಮತ್ತೊಬ್ಬನ ಸೆರೆ

ಮೈಸೂರಿನ ಒಡನಾಡಿ ಸ್ವಯಂಸೇವಾ ಸಂಸ್ಥೆ ಸಂತ್ರಸ್ತ ಬಾಲಕಿಯನ್ನು ರಕ್ಷಿಸಿದ್ದ ವೇಳೆ ಆಕೆ ನೀಡಿದ್ದ ಮಾಹಿತಿಯ ಅನ್ವಯ ಸಿಒಡಿ ಪೊಲೀಸರು ಕಾರ್ಯಾಚರಣೆ ನಡೆಸಿದ್ದರು. ಈ ವೇಳೆ ತಾರಾ, ದೀಪಾ, ರಿಕ್ಷಾ ಚಾಲಕ ಚಿತ್ರಾಪುರದ ಚಿತ್ತಪ್ಪನನ್ನು ವಶಕ್ಕೆ ಪಡೆದುಕೊಂಡಿದ್ದರೆ, ಭುವನೇಶ್ ತಲೆಮರೆಸಿಕೊಂಡಿದ್ದ.

ತಾರಾಳ ಬಾಡಿಗೆ ಮನೆಯಲ್ಲಿ ವೇಶ್ಯಾವಾಟಿಕೆ ನಡೆಯುತ್ತಿದ್ದ ಬಗ್ಗೆ ಸುರತ್ಕಲ್ ಪೊಲೀಸರಿಗೂ ಮಾಹಿತಿ ಸಿಕ್ಕಿತ್ತು. ಕಳೆದ ಅಕ್ಟೋಬರ್‌ನಲ್ಲಿ ಕುಳಾಯಿ ನಿವಾಸಿ ಸ್ಟೆಲ್ಲಾ ಎಂಬವರು ತನ್ನ ಗಂಡ ಅಶೋಕ ಪದೇ ಪದೇ ತಾರಾಳ ಮನೆಗೆ ಹೋಗಿ ಬರುತ್ತಿದ್ದು, ಅವರನ್ನು ಕರೆಸಿ ವಿಚಾರಣೆ ನಡೆಸಿ ನ್ಯಾಯ ಕೊಡಿಸಬೇಕೆಂದು ಠಾಣೆಗೆ ದೂರು ನೀಡಿದ್ದರು.

ಆಗ ಕರ್ತವ್ಯದಲ್ಲಿದ್ದ ಕಾನ್‌ಸ್ಟೇಬಲ್ ಜನಾರ್ದನ ಹಾಗೂ ವಿಶ್ವನಾಥ್ ಜೊತೆ ಎಎಸ್‌ಐ ಫೆಡ್ರಿಕ್ ಪಾಯ್ಸ ಅವರು ತಾರಾ ಮನೆಗೆ ಪೊಲೀಸ್ ಸಮವಸ್ತ್ರದಲ್ಲಿ ತೆರಳಿ ವಿಚಾರಣೆ ನಡೆಸಿದ್ದರು. ಆ ವೇಳೆ ಅಶೋಕ ಅಲ್ಲಿರಲಿಲ್ಲ. ನಂತರ ಅಶೋಕನನ್ನು ಠಾಣೆಗೆ ಕರೆಸಿ ವಿಚಾರಣೆ ನಡೆಸಿದ್ದ ವೇಳೆ ಆತ, ತಾರಾಳ ಕಾರು  ಚಾಲಕನಾಗಿ ಕೆಲಸ ಮಾಡುತ್ತಿರುವುದಾಗಿ ಹೇಳಿಕೆ ನೀಡಿದ್ದರಿಂದ ಪ್ರಕರಣ ಇತ್ಯರ್ಥಗೊಂಡಿತು ಎನ್ನಲಾಗಿದೆ.