ಜಿಂದ್(ಪಿಟಿಐ): ಮತ ಕೇಳಲು ಹೊರಡುವ ಹರಿಯಾಣ ಲೋಕಸಭೆ ಅಭ್ಯರ್ಥಿಗಳಿಗೆ ವಿಚಿತ್ರ ಸಮಸ್ಯೆಯೊಂದು ಎದುರಾಗುತ್ತಿದೆ. ಮತ ಕೇಳಲು ಬಂದ ಅಭ್ಯರ್ಥಿಗಳಿಗೆ, ‘ನಮಗೆ ಹೆಣ್ಣು ಹುಡುಕಿ ಕೊಟ್ಟು ಮತ ಗಿಟ್ಟಿಸಿಕೊಳ್ಳಿ’ ಎಂದು ಇನ್ನೂ ಮದುವೆಯಾಗದಿರುವ ಮತದಾರರು ಬೇಡಿಕೆ ಮುಂದಿಡುತ್ತಿದ್ದಾರೆ.
ರಾಜ್ಯವು ದೇಶದಲ್ಲೇ ಕಡಿಮೆ ಪುರುಷ–ಮಹಿಳೆ ಅನುಪಾತ ಹೊಂದಿದ್ದು, ಬಿಬಿಪುರ್ ಗ್ರಾಮ ಪಂಚಾಯಿತಿ ಮುಖ್ಯಸ್ಥ ಸುನಿಲ್ ಜಗ್ಲನ್ ಅವರ ನೇತೃತ್ವದ ‘ಅವಿವಾಹಿತ ಪುರುಷರ ಸಂಘಟನೆ’ ಈ ರೀತಿಯಾಗಿ ಹೊಸ ಬೇಡಿಕೆಯನ್ನು ಮುಂದಿಟ್ಟಿದೆ.
‘ಮತ ಕೇಳಲು ಹಲವು ಅಭ್ಯರ್ಥಿಗಳು ಗ್ರಾಮಕ್ಕೆ ಬಂದರೂ ಯಾವೊಬ್ಬ ಅಭ್ಯರ್ಥಿಯೂ ನಮ್ಮ ಬೇಡಿಕೆಗೆ ಗಮನ ಹರಿಸಿಲ್ಲ. ನಮ್ಮ ಬೇಡಿಕೆಯಿಂದಾಗಿ ಎಲ್ಲ ಯುವಕರಿಗೆ ಹುಡುಗಿಯರು ಸಿಗುತ್ತಾರೆ ಎಂದಲ್ಲ. ಆದರೆ ಈ ವಿಚಾರದ ಕುರಿತಾಗಿ ಗಮನ ಸೆಳೆಯುವುದು ನಮ್ಮ ಕಾಳಜಿ’ ಎಂದು ಸುನಿಲ್ ಹೇಳಿದ್ದಾರೆ.