ಅಹಮದಾಬಾದ್ (ಪಿಟಿಐ): ಪ್ರಧಾನಿ ನರೇಂದ್ರ ಮೋದಿ ಬುಧವಾರ 64ನೇ ವರ್ಷಕ್ಕೆ ಕಾಲಿಟ್ಟರು. ಪ್ರಧಾನಿಯಾದ ನಂತರ ಮೊದಲ ಬಾರಿಗೆ ಜನ್ಮದಿನ ಆಚರಿಸಿಕೊಳ್ಳುತ್ತಿರುವ ಅವರು ಯಥಾಪ್ರಕಾರ ಗಾಂಧಿನಗರದಲ್ಲಿರುವ ತಮ್ಮ ತಾಯಿ ಹೀರಾಬಾ ಅವರನ್ನು ಭೇಟಿಯಾಗಿ ಆಶೀರ್ವಾದ ಪಡೆದರು.
ಜನ್ಮದಿನದಂದು ಯಾವುದೇ ಕಾರಣಕ್ಕೂ ತಾಯಿಯ ಆಶೀರ್ವಾದ ಪಡೆಯುವುದನ್ನು ಮರೆಯದ ಮೋದಿ, ಪ್ರಧಾನಿಯಾದ ನಂತರವೂ ಆ ಸಂಪ್ರದಾಯ ಮುಂದುವರಿಸಿದ್ದಾರೆ.
ರಾಜಭವನದಲ್ಲಿ ತಂಗಿರುವ ಮೋದಿ ಬೆಳಿಗ್ಗೆ ಯಾವುದೇ ಭದ್ರತೆ ಇಲ್ಲದೇ ಗಾಂಧಿನಗರದಲ್ಲಿ ನೆಲೆಸಿರುವ ತಾಯಿಯನ್ನು ಕಾಣಲು ಏಕಾಂಗಿಯಾಗಿ ತೆರಳಿದರು.
ಪಾದಮುಟ್ಟಿ ನಮಸ್ಕರಿಸಿದ ಮಗನ ತಲೆಯನ್ನು ಹೀರಾ ಬೆನ್ ಪ್ರೀತಿಯಿಂದ ನೇವರಿಸಿ ಅಕ್ಕರೆಯಿಂದ ಹಣೆಗೆ ಮುತ್ತಿಕ್ಕಿ ದರು. ಬಳಿಕ ಸಿಹಿ ತಿನ್ನಿಸಿ, ಹರಸಿದರು. ಪ್ರವಾಹದಿಂದ ಸಂಕಷ್ಟಕ್ಕೆ ಸಿಲುಕಿರುವ ಕಾಶ್ಮೀರದ ಜನರಿಗೆ ನೀಡಲೆಂಂದು ತಮ್ಮ ಬಳಿ ಇಟ್ಟುಕೊಂಡಿದ್ದ ಐದು ಸಾವಿರ ರೂಪಾಯಿಯನ್ನು ಪ್ರಧಾನಿ ಪರಿಹಾರ ನಿಧಿಗೆ ದೇಣಿಗೆ ನೀಡಲು ಅವರು ಮರೆಯಲಿಲ್ಲ.
ಮಗನದೊಂದಿಗೆ ಕಳೆದ 15 ನಿಮಿಷ ದಲ್ಲಿಯೇ 95 ವರ್ಷದ ಹೀರಾ ಬೆನ್, ಮಗನ ಆರೋಗ್ಯ, ಹೊಸ ಜವಾಬ್ದಾರಿ, ಕೆಲಸದ ಬಗ್ಗೆ ಕೇಳಿ ತಿಳಿದುಕೊಂಡರು.
‘ದೇಶಕ್ಕೆ ಪ್ರಧಾನಿಯನ್ನು ಕೊಡುಗೆಯಾಗಿ ನೀಡಿದ ಹಿರಿಯ ಚೇತನ ಹೀರಾ ಬಾಯಿ ಅವರಿಗೆ ಸೆಲ್ಯೂಟ್’ ಎಂದು ಗುಜರಾತ್ ಮುಖ್ಯಮಂತ್ರಿ ಆನಂದಿ ಬೆನ್ ಪಟೇಲ್ ಟ್ವೀಟ್ ಮಾಡಿದ್ದಾರೆ.
ಮೋದಿ ಅವರು ಚೀನಾ ಅಧ್ಯಕ್ಷರನ್ನು ಭೇಟಿಯಾಗುವ ಮುನ್ನವೇ ಜಪಾನ್ ಪ್ರಧಾನಿ ಶಿಂಜೊ ಅಬೆ ಕರೆ ಮಾಡಿ ಜನ್ಮ ದಿನದ ಶುಭಾಶಯ ಹೇಳಿದರು. ಆಸ್ಟ್ರೇಲಿಯಾ ಪ್ರಧಾನಿ ಟೋನಿ ಅಬಾಟ್ ಮಂಗಳವಾರವೇ ಕರೆ ಮಾಡಿದ್ದರು.
ನವದೆಹಲಿಯಲ್ಲಿರುವ ಚೀನಾ ರಾಯಭಾರಿ ಲೆ ಯುಚೆಂಗ್ ಮೋದಿ ಅವರನ್ನು ಕಂಡು ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಹಾಗೂ ಇತರ ಚೀನಾ ನಾಯಕರ ಶುಭಾಶಯ ತಲುಪಿಸಿದರು.