ಮಹಿಳೆಯರ ಮೇಲಿನ ಹಿಂಸೆ ಕೊನೆಗೊಳಿಸಲು ಸಾಧ್ಯ

ಹಿಂಸೆಯು ಮುಚ್ಚಿದ ಬಾಗಿಲುಗಳ ಹಿಂದೆ­ಯಾದರೂ ಆಗಿರಬಹುದು. ಇಲ್ಲವೇ, ಸಾರ್ವ­ಜನಿಕ­ವಾಗಿ ಬೆದರಿಸುವ ತಂತ್ರವೂ ಆದೀತು. ಅಂತಹ ಹಿಂಸೆಯಿಂದ ಮಹಿಳೆಯರು ಹಾಗೂ ಬಾಲಕಿಯರನ್ನು ಮುಕ್ತಗೊಳಿಸುವ ಜಾಗತಿಕ ಬದ್ಧತೆಯನ್ನು ಪುನರ್‌ ಪ್ರದರ್ಶಿಸಲು, ನವೆಂಬರ್ 25ರಿಂದ ಆರಂಭವಾಗಿರುವ ಲಿಂಗಾ­ಧಾರಿತ ಹಿಂಸೆಯ ವಿರುದ್ಧದ 16 ದಿನಗಳ ಜಾಗೃತಿ ಆಂದೋಲನ ಅವಕಾಶ ಕಲ್ಪಿಸುತ್ತದೆ.  ತನ್ನ ಅರ್ಧದಷ್ಟು ಜನಸಂಖ್ಯೆಯನ್ನು ಮೂಲೆ­ಗುಂಪು ಮಾಡಿ, ತುಳಿತಕ್ಕೀಡು ಮಾಡಿ ಹಾಗೂ ತಾರತಮ್ಯಕ್ಕೆ ಒಳಪಡಿಸುವ ಯಾವ ದೇಶವೂ ತನ್ನ ಪೂರ್ಣ ಸಾಮರ್ಥ್ಯಕ್ಕೆ ತಕ್ಕ ಸಾಧನೆಯನ್ನು ಮಾಡಲು ಸಾಧ್ಯವಿಲ್ಲ.  ಇದೇ ಕಾರಣಕ್ಕಾಗಿ, ಲೈಂಗಿಕ ಸಮಾನತೆ ಹಾಗೂ ಮಹಿಳಾ ಸಬಲೀಕರಣ­ವನ್ನೂ ತನ್ನ ವಿದೇಶಾಂಗ ನೀತಿಯ ಪ್ರಮುಖ ಭಾಗವನ್ನಾಗಿ ಅಮೆರಿಕ  ರೂಪಿಸಿಕೊಂಡಿದೆ.

ಮಹಿಳೆಯರ ವಿರುದ್ಧದ ಹಿಂಸೆಗೆ ಮನೆಯೇ  ಸಾಮಾನ್ಯವಾದ ತಾಣ ಆಗಿರುವುದರಿಂದ, ಅನೇಕ ಮಹಿಳೆಯರಿಗೆ ಆ ಭಯ ದೊರಕದು.  ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ದೈಹಿಕ ಗಾಯದಿಂದ ಹಿಡಿದು, ತೀವ್ರ ಖಿನ್ನತೆವರೆಗಿನ ಮಹಿಳೆಯರ ಅನೇಕ ಅನಾರೋಗ್ಯಗಳಿಗೆ ಕೌಟುಂಬಿಕ ದೌರ್ಜನ್ಯವೇ ಕಾರಣ.  ಉದಾ­ಹರಣೆ ಎಂದರೆ, ಮಗು ಗರ್ಭದಲ್ಲಿ­ರುವಾಗ ಕೌಟುಂಬಿಕ ದೌರ್ಜನ್ಯದ ಫಲವಾಗಿ ತಾಯಿಗೆ ಉಂಟಾಗುವ ತೀವ್ರ ಒತ್ತಡ ಹಾಗೂ  ಉದ್ವಿಗ್ನತೆ, ಕಡಿಮೆ ತೂಕದ ಶಿಶುಗಳ ಜನನಕ್ಕೆ ಕಾರಣ­ವಾಗುತ್ತದೆ.  ಮಹಿಳೆಯರು ಕೊಲೆಯಾ­ದಲ್ಲಿ, ಶೇಕಡ 38ರಷ್ಟು ಪ್ರಕರಣಗಳಲ್ಲಿ ಅದಕ್ಕೆ ಕಾರಣ  ಕೌಟುಂಬಿಕ ದೌರ್ಜನ್ಯವೇ ಆಗಿರುತ್ತದೆ.

ಲಿಂಗಾಧಾರಿತ ಹಿಂಸೆಯು ಕೇವಲ ದೈಹಿಕ ಪರಿಣಾಮಗಳಲ್ಲಿ ಕೊನೆಗೊಳ್ಳುವುದಿಲ್ಲ.  ಅದು ಆರ್ಥಿಕವಾಗಿಯೂ ಪರಿಣಾಮ ಬೀರಬಹುದು.  ಅದು ಮಹಿಳೆಯ ಗಳಿಕೆ, ಸಾಧನೆ ಹಾಗೂ ಉದ್ಯೋಗವನ್ನು ಉಳಿಸಿಕೊಳ್ಳುವ ಸಾಮರ್ಥ್ಯದ ಮೇಲೂ ಪರಿಣಾಮ ಬೀರಬಲ್ಲದು. ಇದ­ರಿಂದಾಗಿ ಏಕಾಂಗಿತನ, ದುಡಿಯಲು ಅಸಮರ್ಥ­ರಾಗುವುದು, ನಿಯಮಿತವಾಗಿ ಚಟುವಟಿಕೆ­ಯಲ್ಲಿ ಪಾಲ್ಗೊಳ್ಳದಿರುವುದು ಹಾಗೂ ತಮ್ಮನ್ನು ತಾವು ಮತ್ತು ತಮ್ಮ ಮಕ್ಕಳನ್ನು ಕಾಪಾಡಿ­ಕೊಳ್ಳುವ ಸಾಮರ್ಥ್ಯ ಕಡಿಮೆಯಾಗುವಂಥ ಲಕ್ಷಣಗಳು ಮಹಿಳೆಯರನ್ನು ಬಾಧಿಸಬಹುದು.

ಮಹಿಳೆಯರ ಮೇಲಣ ಹಿಂಸೆಯನ್ನು ತಡೆ­ಯುವುದು ಹಾಗೂ ಅಂಥ ಹಿಂಸೆಗೆ ಕಾರಣ­ರಾದವರ ವಿರುದ್ಧ ಕಾನೂನು ಕ್ರಮ ಜರುಗಿಸು­ವುದು ದೂರಗಾಮಿಯಾಗಿ ಧನಾತ್ಮಕ ಪರಿ­ಣಾಮ ಬೀರುತ್ತದೆ. ಇಂಥ ಅಪರಾಧ­ಗಳನ್ನು ತನಿಖೆ ಮಾಡಿ, ಕಾನೂನು ಕ್ರಮ ಕೈಗೊಳ್ಳುವು­ದಕ್ಕೆ ಅನುಕೂಲವಾಗುವಂತೆ ಮಹಿಳೆ­ಯರ ವಿರುದ್ಧ ಹಿಂಸೆ ತಡೆ ಕಾಯ್ದೆಯನ್ನು ಅಮೆರಿಕ  ಬಲಪಡಿಸಿತು.  ಈ ಕಾಯ್ದೆ  1994ರಲ್ಲಿ  ಜಾರಿ­ಯಾ­­ದಾ­ಗಿನಿಂದ 16 ಶತಕೋಟಿ ಡಾಲರು­ಗಳಿಗೂ ಹೆಚ್ಚು (ರೂ.1,00,000 ಕೋಟಿ) ಹಣ ಉಳಿತಾಯವಾಗಿದೆ ಎಂದು ಅಂದಾಜಿಸಲಾಗಿದೆ.

ಲಿಂಗಾಧಾರಿತ ಹಿಂಸೆ ಕುರಿತ ಸಮಸ್ಯೆಯನ್ನು ಬಗೆಹರಿಸಲು ಅನೇಕ ರಾಷ್ಟ್ರಗಳು ಕಾಯ್ದೆಯನ್ನು ರೂಪಿಸಿವೆ.  ಮುಂದಿನ ಮಹತ್ವದ ಹೆಜ್ಜೆ ಎಂದರೆ, ಜವಾಬ್ದಾರಿಯನ್ನು ಹೆಚ್ಚಿಸಲು ಹಾಗೂ ಕಾನೂನು­­­ ಪರಿಣಾಮಕಾರಿಯಾಗಿ ಜಾರಿ­ಗೊಳಿ­ಸಲು ಒಟ್ಟಾಗಿ ಕೆಲಸ ಮಾಡುವುದು. ಈ ವರ್ಷಾ­ರಂಭದಲ್ಲಿ ವರ್ಮಾ ಆಯೋಗದ ವರದಿ ಹೊರ­ಬಂದ ಬಳಿಕ ಹಾಗೂ ‘ಕೆಲಸದ ಸ್ಥಳದಲ್ಲಿ ಮಹಿಳೆ­ಯರ ಮೇಲಣ ಲೈಂಗಿಕ ಕಿರುಕುಳ (ತಡೆ) ಕಾಯ್ದೆ– 2013’ ಮೂಲಕ, ಭಾರತ ಲಿಂಗಾ­ಧಾರಿತ ಹಿಂಸೆ ನಿವಾರಣೆ ನಿಟ್ಟಿನಲ್ಲಿ ಪ್ರಮುಖ ಹೆಜ್ಜೆಯಿಟ್ಟಿದೆ.

ಜಾಗತಿಕ ಮಟ್ಟದಲ್ಲಿ ಲಿಂಗಾ­ಧಾರಿತ ಹಿಂಸೆಯನ್ನು ತಡೆ­ಗಟ್ಟಲು ಹಾಗೂ ಈ ಸಮಸ್ಯೆಗೆ ಸ್ಪಂದಿಸಲು ಅಮೆ­ರಿಕ 2012ರ ಆಗಸ್ಟ್‌­ನಲ್ಲಿ ಕಾರ್ಯತಂತ್ರ­ವೊಂದನ್ನು ಪ್ರಕಟಿ­ಸಿತು. ಇದರಲ್ಲಿ ನಿಖರವಾದ ಧ್ಯೇಯಗಳನ್ನು ಗುರುತಿಸುವುದರ ಜೊತೆಗೆ, ಲಿಂಗಾ­ಧಾರಿತ ಹಿಂಸೆ ನಿವಾರಿಸುವ ನಿಟ್ಟಿನಲ್ಲಿ ಅಮೆರಿಕದ ನೈಪುಣ್ಯ­ ಹಾಗೂ ಸಾಮರ್ಥ್ಯವನ್ನು ಕ್ರೋಡೀಕರಿಸುವುದರ ಕುರಿತೂ ಪ್ರಸ್ತಾಪಿಸಲಾಗಿದೆ.

ಅದೇ ವೇಳೆಯಲ್ಲಿ, ನಮಗೀಗ ಪ್ರತಿಪಾದಕರು ಹೆಚ್ಚಿನ ಸಂಖ್ಯೆಯಲ್ಲಿ ಬೇಕಿದ್ದಾರೆ. ಅಲ್ಲದೇ, ನೀತಿ ನಿರೂಪಕರು ಹಾಗೂ ಕಾರ್ಯಕ್ಷೇತ್ರದಲ್ಲಿ ಕೆಲಸ ಮಾಡುವವರ ನಡುವೆ ಹೆಚ್ಚಿನ ಸಂವಾದ ನಡೆ­ಯುವ ಅಗತ್ಯವಿದೆ. ತಮ್ಮ ಕುರಿತು ತಾವು ಮಾತ­­­ನಾಡಲು ಸಮರ್ಥರಾಗುವಂತೆ ಬಾಲಕಿ­ಯರನ್ನು ನಾವು ಸಬಲಗೊಳಿಸಬೇಕಿದೆ. ತಮ್ಮ ಸಹೋದರಿಯರ ಪರವಾಗಿ ಮಾತನಾಡುವಷ್ಟು ಶಕ್ತರಾಗಲು ಬಾಲಕರಿಗೆ ಶಿಕ್ಷಣ ಒದಗಿಸಬೇಕಿದೆ.

  ಹಿಂಸೆಯನ್ನು ತಡೆಯಲು ಹಾಗೂ ಈ ಸಮಸ್ಯೆ­ಯನ್ನು ನಿಭಾಯಿಸಲು ಮಾತ್ರವಲ್ಲದೇ,  ಲಿಂಗಾ­­ಧಾರಿತ ತಾರತಮ್ಯಕ್ಕೆ ಕಾರಣವಾಗುವ ಸಂಪ್ರ­ದಾಯ­ಗಳು ಹಾಗೂ ಧೋರಣೆಗಳನ್ನು ಬದಲಿ­ಸಲು  ಪುರುಷರು, ಬಾಲಕರು ಹಾಗೂ ಸಮು­ದಾಯದ ನಾಯಕರನ್ನೂ ಸೇರಿಸಿಕೊಳ್ಳ­ಬೇಕಿದೆ. ಪ್ರತ್ಯಕ್ಷವಾಗಿ ಅಥವಾ ಪರೋಕ್ಷವಾಗಿ ಹಿಂಸೆ ಹಾಗೂ ತಾರತಮ್ಯಕ್ಕೆ ಎಡೆಮಾಡುವ ಆಚರಣೆ­ಗಳಿಗೆ ಪ್ರೋತ್ಸಾಹ ನೀಡುವ, ಆಳವಾಗಿ ಬೇರೂರಿದ ಲಿಂಗಾಧಾರಿತ ಅಸಮಾನತೆಯನ್ನು ನಾವು ನಿವಾರಿಸಬೇಕಿದೆ.

ಸುಸ್ಥಿರ ಪ್ರಜಾತಾಂತ್ರಿಕ ಸಮಾಜಗಳ ನಿರ್ಮಾಣ, ಮುಕ್ತ ಹಾಗೂ ಜವಾಬ್ದಾರಿಯುತ ಆಳ್ವಿಕೆ, ಅಂತರರಾಷ್ಟ್ರೀಯ ಶಾಂತಿ ಹಾಗೂ ಭದ್ರತೆ­ಯನ್ನು ಬಲಗೊಳಿಸುವುದು, ಸ್ಪಂದನಶೀಲ ಮಾರುಕಟ್ಟೆಯ ಬೆಳವಣಿಗೆ ಹಾಗೂ ಆರೋಗ್ಯ ಮತ್ತು ಶೈಕ್ಷಣಿಕ ಸವಾಲುಗಳನ್ನು ಎದುರಿಸುವಲ್ಲಿ ಮಹಿಳಾ ಸಬಲೀಕರಣ ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತದೆ.  ಹಿಂಸೆಯಿಂದ ಮುಕ್ತರಾಗಿ, ಶೈಕ್ಷಣಿಕ, ಆರೋಗ್ಯ, ಉದ್ಯೋಗ ಕ್ಷೇತ್ರ ಹಾಗೂ ರಾಜ­ಕಾರಣ­­ದಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳಲು ಸಮಾನ ಅವಕಾಶಗಳನ್ನು ಮಹಿಳೆಯರಿಗೆ ನೀಡಿ­ದಲ್ಲಿ, ಅವರು ತಮ್ಮ ಕುಟುಂಬಗಳನ್ನು, ತಮ್ಮ ಸಮುದಾಯಗಳನ್ನು ಹಾಗೂ ತಮ್ಮ ರಾಷ್ಟ್ರ­ಗಳನ್ನು ಮೇಲೆತ್ತಬಲ್ಲರು.

ಜೊತೆಗೆ ಬದಲಾವ­ಣೆಯ ಹರಿಕಾರರಾಗಬಲ್ಲರು.  ಅಮೆರಿಕದ ವಿದೇ­ಶಾಂಗ ಸಚಿವ ಜಾನ್‌ ಕೆರ್ರಿ ಅವರು ಹೇಳು­ವಂತೆ “ಸಮೃದ್ಧಿ, ರಕ್ಷಣೆ ಹಾಗೂ ವಿಶ್ವಶಾಂತಿ­ಯನ್ನು ಹೆಚ್ಚಿಸುವ ನಿಟ್ಟಿನಲ್ಲಿ, ನಾವು ಬಾಲಕಿ­ಯರ ಸಬಲೀಕರಣಕ್ಕೆ  ಹೂಡಿಕೆ ಮಾಡು­ವುದು ನಮ್ಮ ಕರ್ತವ್ಯದ ಮಹತ್ವದ ಭಾಗ... ಆಗ ಅವರು ಶಕ್ತಿಯುತ ತಾಯಂದಿರು, ನಾಯಕರು ಹಾಗೂ ಪರಿವರ್ತನಕಾರರಾಗಿ ಹೊರಹೊಮ್ಮುತ್ತಾರೆ’’.