ನವದೆಹಲಿ(ಪಿಟಿಐ): ಕಳೆದ ಎರಡು ತೆರಿಗೆ ಲೆಕ್ಕಾಚಾರ ವರ್ಷಗಳಲ್ಲಿ (2011–12 ಮತ್ತು 2012–13) ಆನ್‌ಲೈನ್‌ ಮೂಲಕ(ಇ–ಫೈಲಿಂಗ್‌) ಆದಾಯ ತೆರಿಗೆ ಲೆಕ್ಕಪತ್ರ ವಿವರ (ಐ.ಟಿ ರಿಟರ್ನ್ಸ್‌) ಸಲ್ಲಿಸಿರುವ ತೆರಿಗೆದಾರರು ಅದರ ಮುದ್ರಿತ ಪ್ರತಿಯನ್ನು ಬೆಂಗಳೂರಿನಲ್ಲಿರುವ ಕೇಂದ್ರ ಸಂಸ್ಕರಣೆ ಘಟಕಕ್ಕೆ (ಸಿಪಿಸಿ) ಕಳುಹಿಸಲು ವಿಳಂಬ ಮಾಡಿದ್ದರೆ, ಕೂಡಲೇ ಅಂಚೆ ಮೂಲಕ ಕಳುಹಿಸುವಂತೆ ಆದಾಯ ತೆರಿಗೆ ಇಲಾಖೆ ಸೂಚನೆ ನೀಡಿದೆ.
ಮುದ್ರಿತ ಪ್ರತಿ ಕಳುಹಿಸಲು ಅಕ್ಟೋಬರ್‌ 31 ಅಂತಿಮ ಗಡುವು. ಈ ಬಾರಿ ಡಿಜಿಟಲ್‌ ಸಹಿ ಇಲ್ಲದೆ ರಿಟರ್ನ್ಸ್‌ ಸಲ್ಲಿಸಿರುವ ತೆರಿಗೆದಾರರು ಅದರ ಮುದ್ರಿತ ಪ್ರತಿಯನ್ನು ‘ಸಿಪಿಸಿ’ಗೆ ಕಳುಹಿಸುವುದು ಕಡ್ಡಾಯ. ಒಂದು ವೇಳೆ ಮುದ್ರಿತ ಪ್ರತಿಯನ್ನು ಈಗಾಗಲೇ ಕೇಂದ್ರ ಕಚೇರಿಗೆ ಕಳುಹಿಸಿದ್ದರೂ, ಅದಕ್ಕೆ ಸ್ವೀಕೃತಿ ಪತ್ರ ಲಭಿಸದಿದ್ದರೆ, ಇನ್ನೊಮ್ಮೆ ಕಳುಹಿಸುವಂತೆಯೂ ತೆರಿಗೆ ಇಲಾಖೆ ಸೂಚನೆ ನೀಡಿದೆ.
ಮುದ್ರಿತ ಪ್ರತಿ ಕಳುಹಿಸಲು ವಿಫಲ ವಾಗಿರುವ ತೆರಿಗೆದಾರರ ಆನ್‌ಲೈನ್‌ ಲೆಕ್ಕಪತ್ರ ವಿವರ ಸಲ್ಲಿಕೆಯನ್ನು ಅಸಿಂಧು ಎಂದು ಪರಿಗಣಿಸಲಾಗುತ್ತದೆ ಎಂದೂ ಪ್ರಕಟಣೆ ತಿಳಿಸಿದೆ.
ವಿಳಾಸ: ಅಂಚೆ ಪೆಟ್ಟಿಗೆ ಸಂಖ್ಯೆ 1, ಎಲೆಕ್ಟ್ರಾನಿಕ್‌ ಸಿಟಿ ಅಂಚೆ ಕಚೇರಿ, ಬೆಂಗಳೂರು–560 100
