ನವದೆಹಲಿ (ಪಿಟಿಐ): ಕರ್ನಾಟಕ ತಂಡ ಈ ಬಾರಿಯ ರಣಜಿ ಟ್ರೋಫಿ ಕ್ರಿಕೆಟ್ ಟೂರ್ನಿಯಲ್ಲಿ `ಬಿ~ ಗುಂಪಿನಲ್ಲಿ ಸ್ಥಾನ ಪಡೆದಿದ್ದು, ನಾಕೌಟ್ ಹಂತ ಪ್ರವೇಶಿಸಲು ಸಾಕಷ್ಟು ಪರಿಶ್ರಮ ನಡೆಸುವುದು ಅಗತ್ಯ. 2012-13ರ ರಣಜಿ ಋತುವಿಗೆ ನವೆಂಬರ್ 2 ರಂದು ಚಾಲನೆ ಲಭಿಸಲಿದೆ ಎಂದು ಬಿಸಿಸಿಐ ಪ್ರಕಟಣೆ ತಿಳಿಸಿದೆ.
`ಗ್ರೂಫ್ ಆಫ್ ಡೆತ್~ ಎಂದೇ ಹಣೆಪಟ್ಟಿ ಹೊಂದಿರುವ `ಬಿ~ ಗುಂಪಿನಲ್ಲಿ ಕರ್ನಾಟಕ ಅಲ್ಲದೆ, ಬಲಿಷ್ಠ ತಂಡಗಳಾದ ತಮಿಳುನಾಡು, ದೆಹಲಿ ಮತ್ತು ಉತ್ತರ ಪ್ರದೇಶ ಇವೆ. ಒಂದು ಗುಂಪಿನಿಂದ ಮೂರು ತಂಡಗಳು ನಾಕೌಟ್ ಹಂತ ಪ್ರವೇಶಿಸಲಿವೆ. ಇದರಿಂದ ಈ ನಾಲ್ಕು ತಂಡಗಳಲ್ಲಿ ಒಂದು ತಂಡ ಲೀಗ್ ಹಂತದಲ್ಲೇ ಹೊರಬೀಳಲಿದೆ.
ಬರೋಡಾ ಮತ್ತು ಈ ಹಿಂದಿನ ಋತುವಿನಲ್ಲಿ ಸೆಮಿಫೈನಲ್ ಪ್ರವೇಶಿಸಿದ್ದ ಹರಿಯಾಣ ಕೂಡಾ ಇದೇ ಗುಂಪಿನಲ್ಲಿವೆ. ಹಾಲಿ ಚಾಂಪಿಯನ್ ರಾಜಸ್ತಾನ ಮತ್ತು 39 ಬಾರಿಯ ಚಾಂಪಿಯನ್ ಮುಂಬೈ ತಂಡ `ಎ~ ಗುಂಪಿನಲ್ಲಿ ಸ್ಥಾನ ಪಡೆದಿದ್ದು, ಸುಲಭವಾಗಿ ನಾಕೌಟ್ ಹಂತ ಪ್ರವೇಶಿಸುವ ಸಾಧ್ಯತೆಯಿದೆ.
ಈ ವರ್ಷದಿಂದ ರಣಜಿ ಟ್ರೋಫಿ ಟೂರ್ನಿಯ ಮಾದರಿಯಲ್ಲಿ ಬದಲಾವಣೆ ತರಲು ಬಿಸಿಸಿಐ ನಿರ್ಧರಿಸಿತ್ತು. ಅದರಂತೆ ತಲಾ ಒಂಬತ್ತು ತಂಡಗಳ ಮೂರು ಗುಂಪುಗಳನ್ನು ಮಾಡಲಾಗಿದೆ. ಹೊಸ ನಿಯಮದಂತೆ `ಎ~ ಮತ್ತು `ಬಿ~ ಗುಂಪಿನಿಂದ ತಲಾ ಮೂರು ತಂಡಗಳು ಹಾಗೂ `ಸಿ~ ಗುಂಪಿನಿಂದ ಎರಡು ತಂಡಗಳು ನಾಕೌಟ್ ಹಂತ ಪ್ರವೇಶಿಸಲಿವೆ.
ಗುಂಪುಗಳು: `ಎ~ ಗುಂಪು: ರಾಜಸ್ತಾನ, ಮುಂಬೈ, ಹೈದರಾಬಾದ್, ಮಧ್ಯಪ್ರದೇಶ, ಸೌರಾಷ್ಟ್ರ, ರೈಲ್ವೇಸ್, ಬಂಗಾಳ, ಪಂಜಾಬ್ ಮತ್ತು ಗುಜರಾತ್
