ರಾಜಕಾರಣ-ಅಭಿವೃದ್ಧಿ ಮಂತ್ರ; ಟೀಕೆ- ಟಿಪ್ಪಣಿ

ಉಡುಪಿ: ಜಿಲ್ಲಾ ಉಸ್ತುವಾರಿ ಸಚಿವ ಹಾಗೂ ಉನ್ನತ ಶಿಕ್ಷಣ ಸಚಿವ ಡಾ. ವಿ.ಎಸ್. ಆಚಾರ್ಯರ ಆಕಸ್ಮಿಕ ನಿಧನ ಉಡುಪಿ ಜನತೆಗೆ ಬರಸಿಡಿನಂತೆ ಬಂದೆರಗಿದೆ. ಆಚಾರ್ಯರ ರಾಜಕೀಯ ನಿಲುವನ್ನು ವಿರೋಧಿಸುತ್ತಿದ್ದವರಿಗೆ ಕೂಡ ಇದನ್ನು ಅರಗಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ.

`ಆಚಾರ್ಯ ನೇರವಾಗಿ ಜನರಿಂದ ಆಯ್ಕೆಯಾದವರಲ್ಲ, ಹೀಗಾಗಿ ಅವರಿಗೆ ಜನರ ಸಮಸ್ಯೆಗಳೇ ಗೊತ್ತಿಲ್ಲ,ಆಚಾರ್ಯರು ಉಡುಪಿಗೆ ಮಾಡಿದ್ದೇನು?~ ಎಂದೆಲ್ಲ ದೂಷಣೆ ಮಾಡುವವರು ಇಲ್ಲಿದ್ದರು. `ಆಚಾರ್ಯರಿಗೆ ದೃಢ ನಿಲುವುಗಳಿಲ್ಲ, ಅಭಿವೃದ್ಧಿ ನೆಪದಲ್ಲಿ ಕರಾವಳಿ ಜಿಲ್ಲೆ ನಾಶ ಮಾಡುತ್ತಿದ್ದಾರೆ~ ಎಂದು ವಿರೋಧಪಕ್ಷಗಳು, ರೈತಸಂಘದಾದಿಯಾಗಿ ಬಹಳ ಟೀಕೆಗಳನ್ನು ಆಚಾರ್ಯ ಇಲ್ಲಿ ಕೇಳಿಸಿಕೊಂಡಿದ್ದರು.

ವಿಶೇಷವಾಗಿ ನಂದಿಕೂರಿನ ಉಷ್ಣವಿದ್ಯುತ್ ಸ್ಥಾವರ ವಿಚಾರದಲ್ಲಿ ಆಚಾರ್ಯರ ವಿರುದ್ಧ ಬಹಳ ಟೀಕೆಗಳು ಇಲ್ಲಿ ಕೇಳಿಬಂದಿದ್ದವು. ಬಿಜೆಪಿ ಅಧಿಕಾರಕ್ಕೆ ಬರುವ ಮುನ್ನ ಆಚಾರ್ಯ ಈ ಯೋಜನೆ ವಿರೋಧಿಸುತ್ತಿದ್ದರು, ಅಧಿಕಾರಕ್ಕೆ ಬಂದ ಬಳಿಕ ಆಚಾರ್ಯರು ಯುಪಿಸಿಎಲ್ ಯೋಜನೆ ಬೆಂಬಲಿಸಿದರು, ಈ ಭಾಗದ ರೈತರಿಗೆ ಕಂಟಕರಾದರು ಎಂಬ ಆರೋಪಗಳು ಆಚಾರ್ಯರ ಮೇಲಿದ್ದವು. ಕೆಟ್ಟ ಮಾತುಗಳನ್ನು ಕೂಡ ಆಚಾರ್ಯರು ಕೇಳಿಸಿಕೊಳ್ಳಬೇಕಾದ ಸ್ಥಿತಿ ಬಂದಿತ್ತು.

 ಇಂತಹ ಟೀಕೆಗಳನ್ನು ಆಚಾರ್ಯರು ಬೆಂಗಳೂರಿನಿಂದ ಉಡುಪಿಗೆ ಬಂದಾಗಲೆಲ್ಲ ಕೇಳಿಸಿಕೊಳ್ಳುತ್ತಿದ್ದರು. ಸಭೆ ಸಮಾರಂಭಗಳಲ್ಲಿ ಈ ಬಗ್ಗೆ ಆಚಾರ್ಯರು ಪ್ರಸ್ತಾಪಿಸುತ್ತಿದ್ದರು.

`ನಮ್ಮ ರಾಜ್ಯಕ್ಕೆ ವಿದ್ಯುತ್ ಬೇಕು, ಹೀಗಾಗಿ ಯುಪಿಸಿಎಲ್ ಯೋಜನೆ ಬಹಳ ಅಗತ್ಯ, ಯಾರೋ ಕೆಲವರು (ರೈತಸಂಘ) ಹುಯಿಲೆಬ್ಬಿಸುತ್ತಾರೆ ಎಂದು ಈ ಯೋಜನೆ ಬಿಡಲಿಕ್ಕೆ ಆಗದು, ಇದೇನು ಗೂಡಂಗಡಿಯೇ ಬಂದ್ ಮಾಡಲಿಕ್ಕೆ~ ಎಂದು ಆಚಾರ್ಯರು ಇತ್ತೀಚೆಗೆ ಗುಡುಗಿದ್ದರು. ಅಷ್ಟರಮಟ್ಟಿಗೆ ಆಚಾರ್ಯ ಈ ಯೋಜನೆ ಸಮರ್ಥಿಸಿಕೊಂಡಿದ್ದರು.
 
ದುರಂತವೆಂದರೆ ಮಂಗಳವಾರ ಕೂಡ ರೈತ ಸಂಘದ ಉಡುಪಿ ಜಿಲ್ಲಾ ಘಟಕದವರು ಸುದ್ದಿಗೋಷ್ಠಿ ನಡೆಸಿ ಆಚಾರ್ಯರು ಕೂಡಲೇ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು, ಇಲ್ಲದಿದ್ದರೆ ನಾವು ಅವರ ಮುಂದಿನ ಎಲ್ಲ ಕಾರ್ಯಕ್ರಮಗಳಿಗೂ ಕಪ್ಪು ಬಟ್ಟೆ ತೋರಿಸಿ ಪ್ರತಿಭಟಿಸುತ್ತೇವೆ ಎಂದು ಹೇಳಿದ್ದರು. ಅವರ ಸುದ್ದಿಗೋಷ್ಠಿ ಮುಗಿಸಿ ಹೊರಬರುವಷ್ಟರಲ್ಲಿ ನಿಧನದ ವಾರ್ತೆ ಬಿತ್ತರವಾಗುತ್ತಿತ್ತು !