ರಾಜ್ಯ ಸಭೆಯ ಮೊದಲ ಉಪಾಧ್ಯಕ್ಷೆಯಾಗಿದ್ದ ವಯಲೆಟ್ ಆಳ್ವಾ, ಸಕ್ರಿಯ ಸಂಸದೆಯಾಗಿ ಮೊದಲ ಲೋಕಸಭೆಯಲ್ಲಿ ಭಾಗವಹಿಸಿದವರು. ಹೈಕೋರ್ಟಿನ ಪೂರ್ಣ ಪೀಠದ ಮುಂದೆ ಕೇಸನ್ನು ವಾದಿಸಿದ ಮೊದಲ ಮಹಿಳಾ ವಕೀಲೆ ಎಂಬ ಹೆಗ್ಗಳಿಕೆ ಇವರದು. 1952ರಲ್ಲಿ ಇವರು ಅಖಿಲ ಭಾರತ ವೃತ್ತ ಪತ್ರಿಕೆಗಳ ಸಂಪಾದಕರ ಸ್ಥಾಯಿ ಸಮಿತಿಗೆ ಆಯ್ಕೆಯಾಗಿದ್ದ ಮೊದಲ ಮಹಿಳೆ. ಕ್ರೈಸ್ತ ಸಮುದಾಯದಿಂದ ಬಂದ ಇವರು ಮಹಿಳೆಯರ ಹಿತಾಸಕ್ತಿ ಕುರಿತು ವಿಶೇಷ ಕಾಳಜಿ ಹೊಂದಿದ್ದರು.
1908ರಲ್ಲಿ ಪ್ರೊಟೆಸ್ಟೆಂಟ್ ಕ್ರೈಸ್ತ ಕುಟುಂಬದಲ್ಲಿ ಜನಿಸಿದ ಆಳ್ವಾ, ಮುಂಬೈನ ಸೈಂಟ್ ಝೇವಿಯರ್ಸ್ ಕಾಲೇಜು ಮತ್ತು ಸರ್ಕಾರಿ ಕಾನೂನು ಕಾಲೇಜಿನಲ್ಲಿ ಶಿಕ್ಷಣ ಪಡೆದರು. ಕಾನೂನು ವ್ಯಾಸಂಗದ ವೇಳೆ ಪರಿಚಯವಾದ ಕ್ಯಾಥೋಲಿಕ್ರಾದ ಜೋಕಿಂ ಆಳ್ವಾ ಅವರನ್ನು ವರಿಸಿದರು. ಸಮಾಜ ಕಾರ್ಯ, ಪತ್ರಿಕೋದ್ಯಮ, ಸ್ವಾತಂತ್ರ್ಯ ಸಮರದಲ್ಲಿ ಇಬ್ಬರೂ ಒಟ್ಟೊಟ್ಟಿಗೆ ಭಾಗವಹಿಸಿದರು. 1942ರ ಚಳವಳಿಯಲ್ಲಿ ವಯಲೆಟ್ ಅವರು ಪುಟಾಣಿ ಮಗುವಿನ ಸಮೇತ ಜೈಲಿನಲ್ಲಿದ್ದರು. 1944ರಲ್ಲಿ ‘ದಿ ಬೇಗಂ’ ಎಂಬ ಮಹಿಳಾ ಪತ್ರಿಕೆ ಆರಂಭಿಸಿ ಬಳಿಕ ಅದನ್ನು ‘ಇಂಡಿಯನ್ ವುಮೆನ್’ ಎಂದು ಬದಲಾಯಿಸಿದರು. 1952ರಲ್ಲಿ ವಯಲೆಟ್ ರಾಜ್ಯ ಸಭೆಗೆ, ಜೋಕಿಂ ಅವರು ಲೋಕಸಭೆಗೆ ಅಂದಿನ ಮುಂಬೈ ಪ್ರಾಂತದಿಂದ ಚುನಾಯಿತರಾದರು. ಪತಿ–ಪತ್ನಿ ಇಬ್ಬರು ಸಂಸತ್ತಿಗೆ ಆಯ್ಕೆಯಾದ ಮೊದಲ ಅಪೂರ್ವ ಘಟನೆ ಇದು.
ಕೇಂದ್ರ ಗೃಹಖಾತೆಯ ಉಪಮಂತ್ರಿಯಾಗಿ ನೆಹರೂ ಅವರ ಸಂಪುಟದಲ್ಲಿ ಕೆಲಸ ಮಾಡಿದ ವಯಲೆಟ್, ಎರಡು ಸಲ ರಾಜ್ಯ ಸಭೆಯ ಉಪಸಭಾಧ್ಯಕ್ಷೆ 1962–66, 1966–69ರಲ್ಲಿ ಸೇವೆ ಸಲ್ಲಿಸಿದರು. ಮಾರ್ಗರೇಟ್ ಆಳ್ವಾ ಇವರ ಮಗಳು.
ಸಂಸತ್ತಿನಲ್ಲಿದ್ದ ಮೊದಲ ಜೋಡಿ ಇವರಾದ್ದರಿಂದ ವಯಲೆಟ್ ಮತ್ತು ಜೋಕಿಂ ಅವರ ಭಾವಚಿತ್ರವನ್ನು 2007ರಲ್ಲಿ ಸಂಸತ್ತಿನಲ್ಲಿ ಅನಾವರಣ ಮಾಡಿ ಈ ದಂಪತಿ ಜೋಡಿಗೆ ಗೌರವ ತೋರಿಸಲಾಯಿತು. ಅವರಿಬ್ಬರ ನೆನಪಿನಲ್ಲಿ 2008ರಲ್ಲಿ ಅಂಚೆ ಚೀಟಿ ಬಿಡುಗಡೆ ಮಾಡಲಾಯಿತು. ಅದು ವಯಲೆಟ್ ಅವರ ಜನ್ಮಶತಮಾನೋತ್ಸವದ ವರ್ಷವೂ ಆಗಿತ್ತು.