ಬೆಂಗಳೂರು: ಉತ್ತಮ ಪ್ರದರ್ಶನ ನೀಡುತ್ತಿರುವ ಕರ್ನಾಟಕ ಬಾಲಕ ಹಾಗೂ ಬಾಲಕಿಯರ ತಂಡದವರು ಚತ್ತೀಸಗಡದ ಚಂಪಾದಲ್ಲಿ ನಡೆಯುತ್ತಿರುವ 20ನೇ ಮಿನಿ ರಾಷ್ಟ್ರೀಯ ವಾಲಿಬಾಲ್ ಚಾಂಪಿಯನ್‌ಷಿಪ್‌ನ ಎರಡನೇ ಪಂದ್ಯದಲ್ಲಿ ಗೆಲುವು ಸಾಧಿಸಿದರು.
ಸೋಮವಾರ ನಡೆದ ಪಂದ್ಯದಲ್ಲಿ ಕರ್ನಾಟಕ ಬಾಲಕಿಯರ ತಂಡ 25-9, 25-12, 25-17ಪಾಯಿಂಟ್‌ಗಳಿಂದ ಒಡಿಶಾ ತಂಡವನ್ನು ಮಣಿಸಿತು. ಬಾಲಕಿಯರ ತಂಡಕ್ಕೆ ಸಿಕ್ಕ ದ್ವಿತೀಯ ಗೆಲುವು ಇದಾಗಿದೆ. ಮೊದಲ ಪಂದ್ಯದಲ್ಲಿ ಅಸ್ಸಾಂ ತಂಡವನ್ನು ಸೋಲಿಸಿತ್ತು.
ಬಾಲಕರ ತಂಡಕ್ಕೆ ಜಯ: ಮೊದಲ ಪಂದ್ಯದಲ್ಲಿ ರಾಜಸ್ತಾನದ ಎದುರು ಸೋಲು ಕಂಡಿದ್ದ ಕರ್ನಾಟಕ ಬಾಲಕರ ತಂಡ ಎರಡನೇ ಪಂದ್ಯದಲ್ಲಿ ಗೆಲುವು ಸಾಧಿಸಿತು.
ಈ ಪಂದ್ಯದಲ್ಲಿ 25-23, 25-23, 25-22ರಲ್ಲಿ ಉತ್ತರಾಖಂಡದ ಎದುರು ಜಯ ಪಡೆಯಿತು. ಈ ಹೋರಾಟ 70 ನಿಮಿಷಗಳ ಕಾಲ ನಡೆಯಿತು. ಆದರೆ ಭಾರಿ ಪೈಪೋಟಿ ಎದುರಾಯಿತು ಎಂದು ಇಲ್ಲಿಗೆ ಬಂದಿರುವ ವರದಿಗಳು ತಿಳಿಸಿವೆ. ಕರ್ನಾಟಕ ತಂಡ ಸೋಮವಾರ ನಡೆದ ಇನ್ನೊಂದು ಪಂದ್ಯದಲ್ಲಿ 25-22, 25-19, 30-28ಪಾಯಿಂಟ್‌ಗಳಿಂದ ಬಿಹಾರ ತಂಡವನ್ನು ಮಣಿಸಿ ದಿನದ ಎರಡನೇ ಗೆಲುವು ಪಡೆಯಿತು. ಈ ಪಂದ್ಯವು 67 ನಿಮಿಷ ನಡೆಯಿತು.
ಬಾಲಕರ ವಿಭಾಗದ ಇತರ ಪಂದ್ಯಗಳಲ್ಲಿ ತಮಿಳುನಾಡು 25-6, 25-17, 25-11ರಲ್ಲಿ ದೆಹಲಿ ಮೇಲೂ, ಪಶ್ಚಿಮ ಬಂಗಾಳ 25-16, 25-14, 25-13ರಲ್ಲಿ ಜಾರ್ಖಂಡ್ ವಿರುದ್ಧವೂ, ರಾಜಸ್ತಾನ 25-19, 27-25, 17-25, 25-21ರಲ್ಲಿ ಹರಿಯಾಣದ ಮೇಲೂ ಜಯ ಸಾಧಿಸಿತು.
ಬಾಲಕಿಯರ ವಿಭಾಗದಲ್ಲಿ ಮಣಿಪುರ 25-12, 25-7, 25-19ರಲ್ಲಿ ಮಧ್ಯ ಪ್ರದೇಶ ಎದುರು ಜಯ ಸಾಧಿಸಿತು.
