ಕುಣಿಗಲ್: ರೈತರ ಆರ್ಥಿಕ ಪ್ರಗತಿಗೆ ಹೈನುಗಾರಿಕೆ ಸಹಕಾರಿ. ಜಿಲ್ಲಾ ಹಾಲು ಒಕ್ಕೂಟದ ಮಾರ್ಗದರ್ಶನದಲ್ಲಿ ಕಾರ್ಯಪ್ರವೃತ್ತರಾದಾಗ ರೈತರು ವೇಗದ ಮುನ್ನಡೆ ದಾಖಲಿಸಬಹುದು ಎಂದು ಜಿಲ್ಲಾ ಹಾಲು ಒಕ್ಕೂಟದ ಮಾಜಿ ಅಧ್ಯಕ್ಷ ಹಾಗೂ ನಿರ್ದೇಶಕ ಡಿ.ಕೃಷ್ಣಕುಮಾರ್ ತಿಳಿಸಿದರು.
ತಾಲ್ಲೂಕಿನ ಮಡಿಕೆಹಳ್ಳಿ ಹಾಲು ಉತ್ಪಾದಕರ ಸಹಕಾರ ಸಂಘದ ಸರ್ವ ಸದಸ್ಯರ ವಾರ್ಷಿಕ ಮಹಾಸಭೆ ಮತ್ತು ನೂತನ ಅಂಗಡಿ ಮಳಿಗೆಗಳನ್ನು ಇತ್ತೀಚೆಗೆ ಉದ್ಘಾಟಿಸಿ ಮಾತನಾಡಿದ ಅವರು, 23 ವರ್ಷಗಳ ಹಿಂದೆ ಸ್ಥಾಪಿತವಾದ ಸಂಘದಲ್ಲಿ 145 ಮಂದಿ ಸದಸ್ಯರಿದ್ದಾರೆ. ಖಾಸಗಿ ಡೈರಿಗಳ ಪೈಪೋಟಿ ನಡುವೆಯೂ ಪ್ರತಿದಿನ 1,200 ಲೀಟರ್ ಹಾಲು ಸಂಗ್ರಹವಾಗುತ್ತಿದ್ದು, ಸಂಘದ ವ್ಯವಸ್ಥಿತ ಕಾರ್ಯನಿರ್ವಹಣೆ ಇತರ ಸಂಘಗಳಿಗೂ ಮಾದರಿಯಾಗಿದೆ ಎಂದರು.
ಸಂಸ್ಥಾಪಕ ಅಧ್ಯಕ್ಷ ಎಂ.ನಂಜಯ್ಯ ಅವರನ್ನು ಕಾರ್ಯಕ್ರಮದಲ್ಲಿ ಸನ್ಮಾನಿಸಲಾಯಿತು. ಅಧ್ಯಕ್ಷ ಎಂ.ನಂಜುಂಡಯ್ಯ ಅಧ್ಯಕ್ಷತೆ ವಹಿಸಿದ್ದರು. ಉಪವ್ಯವಸ್ಥಾಪಕ ಆರ್.ಬಿ.ಕೇಶವಮೂರ್ತಿ, ನಿರ್ದೇಶಕರಾದ ಕುನ್ನೇಗೌಡಯ್ಯ, ಎಂ.ಸಿ.ರಂಗಸ್ವಾಮಿ, ರಾಮಕೃಷ್ಣಯ್ಯ, ನಿಂಗಯ್ಯ, ರಂಗಯ್ಯ, ನಾಗರಾಜು, ಹೊನ್ನಮ್ಮ, ಕಾರ್ಯದರ್ಶಿ ಗಂಗರಂಗಯ್ಯ, ಸಹಾಯಕ ಬೋರೇಗೌಡ ಉಪಸ್ಥಿತರಿದ್ದರು.
