ನವದೆಹಲಿ, (ಪಿಟಐ): ಪದೇ ಪದೇ ಆಗುತ್ತಿರುವ ರೈಲು ಅಪಘಾತಗಳಿಂದ ಆತಂಕಕ್ಕೆ ಒಳಗಾಗಿರುವ ರೈಲ್ವೆ ಇಲಾಖೆಯು, 800 ಕಿ.ಮೀ ಉದ್ದದ ರೈಲು ಮಾರ್ಗದಲ್ಲಿ ರಕ್ಷಣೆ ಮತ್ತು ಮುನ್ನೆಚ್ಚರಿಕೆ ವ್ಯವಸ್ಥೆ ಅಳವಡಿಸುವ ಕಾರ್ಯವನ್ನು ಚುರುಕುಗೊಳಿಸಿದೆ.
ಐರೋಪ್ಯ ತಂತ್ರಜ್ಞಾನದ ಈ ವ್ಯವಸ್ಥೆ ಅಳವಡಿಸಲು ಪ್ರತಿ ಕಿಲೊ ಮೀಟರ್ಗೆ ರೂ 50 ಲಕ್ಷ ವೆಚ್ಚವಾಗಲಿದೆ.
ರೈಲಿನ ಚಾಲಕ ಕೆಂಪು ದೀಪದ ಸೂಚನೆಯನ್ನು ಉಲ್ಲಂಘಿಸಿ ಮುಂದೆ ಸಾಗಲು ಪ್ರಯತ್ನಿಸಿದಾಗ ಅಥವಾ ತುರ್ತು ಸಂದರ್ಭದಲ್ಲಿ ತನ್ನಿಂದತಾನೇ ಬ್ರೇಕ್ ಹಾಕಲು ಈ ಹೊಸ ವ್ಯವಸ್ಥೆಯಿಂದ ಸಾಧ್ಯವಾಗುತ್ತದೆ.
ಇದರ ಪರೀಕ್ಷಾ ಕಾರ್ಯ ಅಂತಿಮ ಹಂತದಲ್ಲಿದ್ದು, ಸ್ವಯಂಚಾಲಿತ ಸಿಗ್ನಲ್ ವ್ಯವಸ್ಥೆ ಹೊಂದಿದ ಮಾರ್ಗಗಳಲ್ಲಿ ಅಳವಡಿಸಲು ಕೆಲವು ಮಾರ್ಪಾ ಡುಗಳನ್ನು ಮಾಡಿಕೊಳ್ಳಲಾಗುವುದು ಎಂದು ಅಧಿಕೃತ ಮೂಲಗಳು ತಿಳಿಸಿವೆ.