ವರ್ಷಾಂತ್ಯಕ್ಕೆ ಹೊಸ ಮಾರುತಿ 800

ಗರಿಷ್ಠ ಇಂಧನ ಕ್ಷಮತೆ ಹೊಂದಿರುವ ಈ ಕಾರು ಈಗಿನ ಜನಪ್ರಿಯ `ಆಲ್ಟೊ~ ಮಾದರಿಗಿಂತಲೂ ದುಬಾರಿ ಆಗಿರಲಿದೆ. ಅಧಿಕೃತ ಮೂಲಗಳ ಪ್ರಕಾರ, ಕಂಪೆನಿಯ ಗುಡಗಾಂವ್‌ನಲ್ಲಿರುವ ತಯಾರಿಕಾ ಘಟಕದಲ್ಲಿ ಹೊಸ 800 ಸಿ.ಸಿ ಕಾರಿನ ತಯಾರಿಕೆ ಜುಲೈ-ಆಗಸ್ಟ್‌ನಿಂದ ಪ್ರಾರಂಭವಾಗಲಿದೆ. ಎಲ್ಲವೂ ಅಂದುಕೊಂಡಂತೆ ಆದರೆ, ದೀಪಾವಳಿಯ ಹೊತ್ತಿಗೆ ಹೊಸ ಕಾರನ್ನು ಮಾರುಕಟ್ಟೆಗೆ ಬಿಡುಗಡೆ ಮಾಡುವ ಯೋಜನೆ ಕಂಪೆನಿಯದ್ದು. ಆದರೆ, ಕಂಪೆನಿಯ ವಕ್ತಾರ ಈ ಕುರಿತು ಪ್ರತಿಕ್ರಿಯೆ ನೀಡಲು ನಿರಾಕರಿಸಿದ್ದಾರೆ.

`ಇದು 800 ಸಿ.ಸಿ ಸಾಮರ್ಥ್ಯದ ಹೊಸ ಕಾರು. ತಾಂತ್ರಿಕವಾಗಿ ಹಿಂದಿನ ಮಾರುತಿ 800ಗಿಂತಲೂ ಸುಧಾರಿತ ತಂತ್ರಜ್ಞಾನ ಮತ್ತು ಪರಿಷ್ಕೃತ ಎಂಜಿನ್ ಹೊಂದಿದೆ. ಆದರೆ, ಬೆಲೆ ಮಾತ್ರ `ಆಲ್ಟೋ~ಗಿಂತಲೂ ದುಬಾರಿ ಆಗಬಹುದು. ಈಗಾಗಲೆ ವಿವಿಧ ಹಂತಗಳ ಪರೀಕ್ಷಾರ್ಥ ಅಭಿವೃದ್ಧಿ ಕಾರ್ಯ ನಡೆಯುತ್ತಿವೆ~  ಎಂದು ಮೂಲಗಳು ಹೇಳಿವೆ.

ಕಂಪೆನಿಯ ವೆಬ್‌ಸೈಟ್‌ನಲ್ಲಿರುವ ಅಧಿಕೃತ ಮಾಹಿತಿಯ ಪ್ರಕಾರ ಸದ್ಯ ಮಾರುತಿ 800ನ ಮಾದರಿಗಳಿಗೆ  (ದೆಹಲಿ ಎಕ್ಸ್‌ಷೋರೂಂ) ರೂ. 2.05 ಲಕ್ಷದಿಂದ ರೂ. 2.30 ಲಕ್ಷದವರೆಗೆ ಬೆಲೆ ಇದೆ. `ಆಲ್ಟೊ~ ಮಾದರಿಗೆ ರೂ. 2.40 ಲಕ್ಷದಿಂದ ರೂ. 3.43 ಲಕ್ಷದವರೆಗೆ ದರ ಇದೆ. 1000 ಸಿ.ಸಿ ಸಾಮರ್ಥ್ಯದ `ಆಲ್ಟೊ~ ಮಾದರಿ ಬೆಲೆ ರೂ. 3.14 ಲಕ್ಷದಿಂದ ರೂ. 3.31ಲಕ್ಷದವರೆಗೆ ಇದೆ. 1983ರಲ್ಲಿ ಮಾರುತಿ 800ನ ಮೊದಲ ಮಾದರಿ ಮಾರುಕಟ್ಟೆಗೆ ಬಿಡುಗಡೆಯಾಗಿತ್ತು, ಇಲ್ಲಿಯವರೆಗೆ ಸುಮಾರು 2.5 ದಶಲಕ್ಷ `ಎಂ-800~ ಕಾರುಗಳು ಮಾರಾಟವಾಗಿವೆ.

ಇತ್ತೀಚೆಗೆ ಆಯ್ದ ಕೆಲವು ನಗರಗಳಲ್ಲಿ  ಕಂಪೆನಿ `ಮಾರುತಿ 800~ ತಯಾರಿಕೆ ಸ್ಥಗಿತಗೊಳಿಸಿದೆ.  ಈ ಕಾರಿನ ಇಂಗಾಲ ಹೊರಸೂಸುವಿಕೆ ಪ್ರಮಾಣವು `ಭಾರತ್ ಸ್ಟೇಜ್ 4~ ಮಾನದಂಡಕ್ಕಿಂತ ಹೆಚ್ಚಿರುವುದು ಇದಕ್ಕೆ ಪ್ರಮುಖ ಕಾರಣ. ಕೆಲವೆಡೆ ಮಾರುತಿ 800ನ ಮೊದಲ ಮಾದರಿ ಇನ್ನೂ ಮಾರಾಟವಾಗುತ್ತಿದೆ.

ಮಾರುತಿ ಸುಜುಕಿಯ ಅತ್ಯಂತ ಬೇಡಿಕೆ ಇರುವ ಕಾರು `ಆಲ್ಟೊ~. ಆದರೆ, ಇತ್ತೀಚಿನ ದಿನಗಳಲ್ಲಿ ಗರಿಷ್ಠ ಬಡ್ಡಿ ದರ, ಹಣದುಬ್ಬರ ಏರಿಕೆ, ಪೆಟ್ರೋಲ್ ಬೆಲೆ ಹೆಚ್ಚಳದಿಂದ ಕಂಪೆನಿಯ ಒಟ್ಟು ಕಾರು ಮಾರಾಟ ಗಣನೀಯವಾಗಿ ಕುಸಿದಿದೆ.  ಕಳೆದ ತಿಂಗಳಿಂದ ಕಂಪೆನಿ ಆಲ್ಟೊ, ಎಂ-800, ಎ-ಸ್ಟಾರ್ ಎಸ್ಟಿಲೊ, ಓಮ್ನಿ ಕಾರುಗಳ ಪೆಟ್ರೋಲ್ ಮಾದರಿ ತಯಾರಿಕೆ ಸ್ಥಗಿತಗೊಳಿಸಿದೆ.

ಭಾರತೀಯ ವಾಹನ ತಯಾರಿಕಾ ಸಂಸ್ಥೆಗಳ ಒಕ್ಕೂಟದ (ಎಸ್‌ಎಐಎಂ) ಅಂಕಿ ಅಂಶಗಳ ಪ್ರಕಾರ ಮಾರುತಿ ಸುಜುಕಿ ಕಾರು ಮಾರಾಟ ಮೇ ತಿಂಗಳಲ್ಲಿ ಶೇ 8.42ರಷ್ಟು ಕುಸಿತ ಕಂಡಿದ್ದು, 87,220ಕ್ಕೆ ಇಳಿದಿದೆ.