ನವದೆಹಲಿ (ಪಿಟಿಐ): ಜಾಗತಿಕ ಆರ್ಥಿಕ ಅಸ್ಥಿರತೆ, ಹಣಕಾಸು ಮಾರುಕಟ್ಟೆಯಲ್ಲಿನ ತಲ್ಲಣ ಇತ್ಯಾದಿ ಪ್ರತಿಕೂಲ ಸಂಗತಿಗಳ ನಡುವೆಯೂ ಭಾರತೀಯ ಕಂಪೆನಿಗಳು ಪ್ರಸಕ್ತ ಸಾಲಿನಲ್ಲಿ ಉದ್ಯೋಗಿಗಳ ವಾರ್ಷಿಕ ವೇತನವನ್ನು ಶೇ 9.8ರಷ್ಟು ಹೆಚ್ಚಿಸಿವೆ.
ಈ ವರ್ಷ ಗರಿಷ್ಠ ಮಟ್ಟದಲ್ಲಿ ವೇತನ ಪರಿಷ್ಕರಣೆ ಮಾಡಿರುವ ದೇಶಗಳ ಪಟ್ಟಿಯಲ್ಲೂ ಭಾರತ ಮುಂಚೂಣಿಯಲ್ಲಿದೆ ಎಂದು ಫೆಡರ್ಸನ್ ಅಂಡ್ ಪಾರ್ಟ್ನರ್ ಸಂಸ್ಥೆ ನಡೆಸಿದ ಅಧ್ಯಯನ ತಿಳಿಸಿದೆ.
ವೇತನ ಏರಿಕೆಯಲ್ಲಿ ದಕ್ಷಿಣ ಆಫ್ರಿಕಾ ಎರಡನೆಯ ಸ್ಥಾನದಲ್ಲಿದ್ದು, ಸಿಬ್ಬಂದಿ ವೇತನ ಸರಾಸರಿ ಶೇ 8.8ರಷ್ಟು ಹೆಚ್ಚಿದೆ. ಚೀನಾದಲ್ಲಿ ಶೇ 6.8ರಷ್ಟು, ಬ್ರಿಟನ್ನಲ್ಲಿ ಶೇ 4.4ರಷ್ಟು, ಯೂರೋಪ್ ಒಕ್ಕೂಟದ ದೇಶಗಳಲ್ಲಿ ಶೇ 4.1ರಷ್ಟು ಅಮೆರಿಕ ಮತ್ತು ಜಪಾನ್ನಲ್ಲಿ ಶೇ 4ರಷ್ಟು ವಾರ್ಷಿಕ ವೇತನದಲ್ಲಿ ಹೆಚ್ಚಳವಾಗಿದೆ.
ಮೂಲ ವೇತನ, ತುಟ್ಟಿಭತ್ಯೆ ಸೇರಿದಂತೆ ಕಾರ್ಯನಿರ್ವಾಹಕ ಅಧಿಕಾರಿಗಳಿಗೆ ಹೆಚ್ಚಿನ ವೇತನ ನೀಡುತ್ತಿರುವ ದೇಶಗಳ ಸಾಲಿನಲ್ಲಿ ಜರ್ಮನಿ ಮೊದಲ ಸ್ಥಾನದಲ್ಲಿದೆ. ಜರ್ಮನಿಯಲ್ಲಿ ಕಂಪೆನಿಯ ಉನ್ನತ ಶ್ರೇಣಿಯ ಅಧಿಕಾರಿಗಳಿಗೆ ಮಾಸಿಕ ₨50 ರಿಂದ ₨60 ಲಕ್ಷದಷ್ಟು ವೇತನ ಲಭಿಸುತ್ತಿದೆ. ಭಾರತ ಈ ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿದೆ. ಭಾರತೀಯ ಕಂಪೆನಿಗಳು ಕಾರ್ಯನಿರ್ವಾಹಕ ಅಧಿಕಾರಿಗಳಿಗೆ ಮಾಸಿಕ ₨8ರಿಂದ ₨9 ಲಕ್ಷದಷ್ಟು ವೇತನ ನೀಡುತ್ತಿವೆ.
ಮಾರನ್ ದಂಪತಿ ವೇತನ ₨56.25 ಕೋಟಿ
ನವದೆಹಲಿ (ಪಿಟಿಐ): ಸನ್ ಟಿವಿ ಪ್ರವರ್ತಕರಾದ ಕಲಾನಿಧಿ ಮಾರನ್ ಮತ್ತು ಅವರ ಪತ್ನಿ ಕಾವೇರಿ, ಭಾರತದಲ್ಲಿ ಅತಿ ಹೆಚ್ಚು ವೇತನ ಪಡೆಯುತ್ತಿರುವ ಕಾರ್ಪೊರೇಟ್ ಉದ್ಯಮಿಗಳು. ಇವರಿಬ್ಬರು ಕಳೆದ ಹಣಕಾಸು ವರ್ಷದಲ್ಲಿ ತಲಾ ₨56.25 ಕೋಟಿ ವೇತನ ಪಡೆದಿದ್ದಾರೆ. ಮೂರನೆಯ ಸ್ಥಾನದಲ್ಲಿರುವ ಜಿಂದಾಲ್ ಕಂಪೆನಿಯ ನವೀನ್ ಜಿಂದಾಲ್ ವೇತನ ₨54.98 ಕೋಟಿಯಷ್ಟಿದೆ. ಆದಿತ್ಯಾ ಬಿರ್ಲಾ ಸಮೂಹದ ಅಧ್ಯಕ್ಷ ಕುಮಾರ ಮಂಗಳಂ ಬಿರ್ಲಾ ಅವರು ಕಳೆದ ಹಣಕಾಸು ವರ್ಷದಲ್ಲಿ ₨49.62 ಕೋಟಿ ವೇತನ ಪಡೆದಿದ್ದು 4ನೇ ಸ್ಥಾನದಲ್ಲಿದ್ದಾರೆ.