ನೀಮುಚ್, ಮಧ್ಯ ಪ್ರದೇಶ (ಪಿಟಿಐ): ಆಮ್‌ ಆದ್ಮಿ ಪಕ್ಷದ ನಾಯಕಿ ಶಾಜಿಯಾ ಇಲ್ಮಿ ಅವರು ಭಾಗವಹಿಸಿದ್ದ ರ್‍್ಯಾಲಿಯ ವೇದಿಕೆಯತ್ತ ಬಿಜೆಪಿಯ ಪ್ರಧಾನಿ ಅಭ್ಯರ್ಥಿ ಮೋದಿ ಪರವಾಗಿ ಘೋಷಣೆ ಕೂಗುತ್ತಾ ಕೆಲವು ಅಪರಿಚಿತ ವ್ಯಕ್ತಿಗಳು ಕಲ್ಲು ತೂರಿದ ಘಟನೆ ಸೋಮವಾರ ನಡೆದಿದೆ.
ಮಂಡ್‌ಸೌರ್‌–ನೀಮುಚ್ ಕ್ಷೇತ್ರದ ಎಎಪಿ ಅಭ್ಯರ್ಥಿ ಪರಾಸ್‌ ಸಕ್ಲೇಚಾ ಪರವಾಗಿ ಇಲ್ಮಿ ರ್‍್ಯಾಲಿಯಲ್ಲಿ ಮಾತನಾಡುತ್ತಿದ್ದ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ.
ಇಲ್ಮಿ ಅವರು ತಮ್ಮ ಭಾಷಣದಲ್ಲಿ ಮೋದಿ ಅವರನ್ನು ಟೀಕಿಸಲು ಆರಂಭಿಸುತ್ತಿದ್ದಂತೆಯೇ ಅಪರಿಚಿತರು ಮೋದಿ ಪರ ಘೋಷಣೆಗಳನ್ನು ಕೂಗಿದರು. ಮಾತ್ರವಲ್ಲದೇ ವೇದಿಕೆಯತ್ತ ಕಲ್ಲು ತೂರಿದರು. ಇದರಿಂದಾಗಿ ಅವರು ಭಾಷಣ ಮೊಟಕುಗೊಳಿಸಬೇಕಾಯಿತು.
ಘಟನೆ ನಂತರ ಎಎಪಿ ಕಾರ್ಯಕರ್ತರು ಹಾಗೂ ಪೊಲೀಸರು ಕಲ್ಲು ತೂರಾಟ ನಡೆಸಿದವರನ್ನು ಬೆನ್ನಟ್ಟಲು ಯತ್ನಿಸಿದರಾದರೂ, ಅವರು ಅಲ್ಲಿಂದ ಪರಾರಿಯಾದರು.
