ಮುಂಬೈ(ಪಿಟಿಐ): ಬಾಡಿಗೆ ತಾಯಿ ಮೂಲಕ ಮೂರನೇ ಮಗು ಪಡೆದ ಬಾಲಿವುಡ್‌ ನಟ ಶಾರುಖ್‌ ದಂಪತಿ, ಜಸ್ಲೋಕ್‌ ಆಸ್ಪತ್ರೆ ಹಾಗೂ ಮುಂಬೈ ಮಹಾನಗರ ಪಾಲಿಕೆಗೆ ಬಾಂಬೆ ಹೈಕೋರ್ಟ್‌ ನೊಟೀಸ್‌ ಜಾರಿ ಮಾಡಿದೆ.
ಮಗುವಿನ ಜನನ ದಾಖಲೆಗಳನ್ನು ಒದಗಿಸುವಂತೆ ಸಲ್ಲಿಸಿದ ಅರ್ಜಿಯನ್ನು ಮ್ಯಾಜಿಸ್ಟ್ರೇಟ್‌ ನ್ಯಾಯಾಲಯ ತಿರಸ್ಕರಿಸಿದ್ದರಿಂದ ಸಾಮಾಜಿಕ ಕಾರ್ಯಕರ್ತೆ ವರ್ಷಾ ದೇಶಪಾಂಡೆ ಅವರು ಹೈಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಸಿದ್ದರು.
ಪ್ರಸವಪೂರ್ವದಲ್ಲಿ ಲಿಂಗ ಪತ್ತೆ ನಿಷೇಧ ಕಾಯ್ದೆಯನ್ನು ಉಲ್ಲಂಘಿಸಿ ನಿಯಮಬಾಹಿರವಾಗಿ ಮಗುವಿನ ಲಿಂಗ ಪತ್ತೆ ಮಾಡಿದ್ದರು ಎಂದು ಆರೋಪಿಸಿ ವರ್ಷಾ ಅವರು ಶಾರುಖ್‌ ದಂಪತಿ, ನಗರದ ಜಸ್ಲೋಕ್‌ ಆಸ್ಪತ್ರೆ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಮ್ಯಾಜಿಸ್ಟ್ರೇಟ್‌ ನ್ಯಾಯಾಲಯದಲ್ಲಿ ದೂರು ಸಲ್ಲಿಸಿದ್ದರು.
ಅಲ್ಲದೇ ಮೂರನೇ ಮಗು ಅಬ್ರಾಮ್‌ ಜನನದ ವಿವರಗಳನ್ನು ಶಾರುಖ್‌ ದಂಪತಿ ಹಾಗೂ ಮುಂಬೈ ಮಹಾನಗರ ಪಾಲಿಕೆ ಒದಗಿಸುವಂತೆ ನ್ಯಾಯಾಲಯದಲ್ಲಿ ಮನವಿ ಮಾಡಿದ್ದರು. ಆದರೆ ನ್ಯಾಯಾಲಯ ಶಾರುಖ್‌ ದಂಪತಿ ಲಿಂಗ ಪತ್ತೆ ನಿಷೇಧ ಕಾಯ್ದೆಯನ್ನು ಉಲ್ಲಂಘಿಸಿಲ್ಲವೆಂದು ತಿಳಿಸಿ, ಅರ್ಜಿಯನ್ನು ತಿರಸ್ಕರಿಸಿದ್ದರು. ಹೀಗಾಗಿ ವರ್ಷಾ ದೇಶಪಾಂಡೆ ಹೈಕೋರ್ಟ್‌ ಮೊರೆ ಹೋಗಿದ್ದರು.
ಪ್ರಕರಣಕ್ಕೆ ಸಂಬಂಧಿಸಿ ನೊಟೀಸ್‌ ಜಾರಿ ಮಾಡಿದ ನ್ಯಾಯಾಲಯ ಜ.10ಕ್ಕೆ ವಿಚಾರಣೆಯನ್ನು ಮುಂದೂಡಿದೆ.
