ಶಿವ ನಾಮ

ಅಂದು ಬೆಳಿಗ್ಗೆಯಿಂದಲೇ ಗೃಹಿಣಿಯರು, ಮಕ್ಕಳು ಮನೆಯ ಮುಂದೆ ರಂಗೋಲಿ ಬಿಡಿಸುವುದು, ಶಿವನಿಗೆ ಇಷ್ಟವಾದ ಬಿಲ್ವ ಪತ್ರೆಯಿಂದ ಶಿವಲಿಂಗ ಸಿಂಗರಿಸುವ ಕೆಲಸದಲ್ಲಿ ಮಗ್ನರಾಗಿರುತ್ತಾರೆ. ದೇವರಿಗೆ ಇಷ್ಟವಾದ ಧೂಪ ಆರತಿ  ಮಾಡುವುದರೊಂದಿಗೆ ಬಿಲ್ವಾರ್ಚನೆ, ಶಿವಸಹಸ್ರನಾಮ ಪಠನೆ ನಿರಂತರವಾಗಿರುತ್ತದೆ.

ಮನೆಯಲ್ಲಿ ಶಿವನಿಗೆ ಪೂಜೆ ಸಲ್ಲಿಸಿದ ನಂತರ ದೇವಸ್ಥಾನಗಳಿಗೆ ಪಯಣ, ಎಲ್ಲೆಲ್ಲಿ ಶಿವನ ದೇವಾಲಯಗಳಿವೆಯೋ ಅಲ್ಲೆಲ್ಲ ಭಕ್ತರು ದರುಶನ ಮಾಡಿ ಬಂದು ಧನ್ಯರಾಗುತ್ತಾರೆ. ಮನೆಯಲ್ಲಿ ಜಾಗರಣೆ ಇರುವವರಿಗೆ ಫಲಾಹಾರ, ಪಾನಕ, ಕೋಸಂಬರಿ ಜೊತೆಗೆ ಉಪ್ಪಿಟ್ಟು ಸಮಾರಾಧನೆ.

ಗವಿಪುರಂ ಬಡಾವಣೆಯ ಗವಿಗಂಗಾಧರೇಶ್ವರ, ವಿಜಯಗರದ ಕನ್ನಿಕಾಪರಮೇಶ್ವರಿ, ಮಲ್ಲೇಶ್ವರದ ಕಾಡುಮಲ್ಲೇಶ್ವರ, ವಾಸವಿ ಕನ್ನಿಕಾಪರಮೇಶ್ವರಿ, ದಕ್ಷಿಣ ನಂದಿತೀರ್ಥ, ನಂಜನಗೂಡು ಶ್ರೀ ಕಂಠೇಶ್ವರ ಸೇವಾ ಸಂಘದ ‘ಮೃತ್ತಿಕಾ ಶಿವಲಿಂಗ’ ಹಾಗೂ ಮಹಾಗಣಪತಿ ದೇವಸ್ಥಾನ ಟ್ರಸ್ಟ್‌ನ ನಾಲ್ಕುಅಡಿ ಎತ್ತರದ ನವರತ್ನ ಖಚಿತ ಶಿವಲಿಂಗ, ಹಳೆ ಏರ್‌ಪೋರ್ಟ್ ರಸ್ತೆಯ ಬೃಹತ್ ಶಿವ ಹೀಗೆ ವಿವಿಧೆಡೆಯ ಶಿವ ದೇವಾಲಯಗಳು ಬುಧವಾರ ರಾತ್ರಿಯಿಡೀ ತೆರೆದಿರುತ್ತವೆ. ಭಕ್ತರ ದಟ್ಟಣೆ ಸಹಜವಾಗೇ ಹೆಚ್ಚಿರುತ್ತದೆ.

ಜಾಗರಣೆಗೆ ಅನುಕೂಲವಾಗಲಿ ಎಂದು ವಿವಿಧೆಡೆ ರಾತ್ರಿಯಿಡೀ ನಗೆ ಜಾಗರಣೆ, ಭಜನೆ, ಸಂಗೀತ, ಮತ್ತಿತರ ಸಾಂಸ್ಕೃತಿಕ ಕಾರ್ಯಕ್ರಮಗಳಿರುತ್ತವೆ. ಅನೇಕ ಬಡಾವಣೆಗಳಿಂದ ರಾತ್ರಿಯಿಡಿ ಶಿವ ದೇವಾಲಯಗಳ ದರ್ಶನಕ್ಕೆ ವಾಹನಗಳು ಹೊರಡುವುದೂ ಉಂಟು.