ಲಂಡನ್ (ಪಿಟಿಐ): ಬ್ರಿಟನ್ ರಾಜಮನೆತನಕ್ಕೆ ಹೊಸ ಕುಡಿಯ ಆಗಮನಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಈ ಕುತೂಹಲಕ್ಕೆ ವಾರಾಂತ್ಯದಲ್ಲಿ ತೆರೆ ಬೀಳಲಿದೆ ಎಂದು ರಾಜಕುಮಾರ ಚಾರ್ಲ್ಸ್ ಅವರ ಪತ್ನಿ ಕ್ಯಾಮಿಲಾ ತಿಳಿಸಿದ್ದಾರೆ.
`ಯುವರಾಜ ವಿಲಿಯಂ ಮತ್ತು ಕೇಟ್ ದಂಪತಿಗೆ ಈ ವಾರದ ಅಂತ್ಯದಲ್ಲಿ ಮಗ ಅಥವಾ ಮಗಳು ಜನಿಸಬಹುದು. ನಾವೆಲ್ಲರೂ ಆ ಸಂಭ್ರಮದ ಕ್ಷಣಕ್ಕಾಗಿ ಕಾತರರಾಗಿದ್ದೇವೆ' ಎಂದು ಕ್ಯಾಮಿಲಾ ಹೇಳಿದ್ದಾರೆ.
ರಾಜಕುಮಾರ ಚಾರ್ಲ್ಸ್ ಮತ್ತು ಕ್ಯಾಮಿಲಾ ದಂಪತಿ ಮಂಗಳವಾರವೇ ತಮ್ಮ ವಾರ್ಷಿಕ ರಜಾ ದಿನಗಳನ್ನು ಕಳೆಯಲು ಪ್ರಸಿದ್ಧ ಪ್ರವಾಸಿ ತಾಣ ಬ್ಯೂಡ್‌ಗೆ ತೆರಳಿದ್ದಾರೆ. ಆದರೆ, ದೂರವಾಣಿ ಮೂಲಕ ಪ್ರತಿ ಕ್ಷಣದ ಬೆಳವಣಿಗೆಯನ್ನು ಅಲ್ಲಿಂದಲೇ ತಿಳಿದುಕೊಳ್ಳುತ್ತಿದ್ದಾರೆ.
