ನವದೆಹಲಿ: 16 ನೇ ಲೋಕಸಭೆಗೆ ಒಂಬತ್ತು ಹಂತಗಳಲ್ಲಿ ನಡೆದ ಚುನಾವಣೆಯಲ್ಲಿ ಶೇ 1.1 ರಷ್ಟು ‘ನೋಟಾ’ ಮತಗಳು ಚಲಾವಣೆಯಾಗಿವೆ.
28 ರಾಜ್ಯಗಳಲ್ಲಿ ಒಟ್ಟು 58,91,702 ಮತದಾರರು ನೋಟಾ (ಮೇಲಿನವರಲ್ಲಿ ಯಾರಿಗೂ ಮತವಿಲ್ಲ) ಆಯ್ಕೆ ಮಾಡಿಕೊಂಡಿದ್ದಾರೆ.
ಅಚ್ಚರಿಯೆಂದರೆ ಕೆಲ ರಾಜಕೀಯ ಪಕ್ಷಗಳು ‘ನೋಟಾ’ ಕ್ಕಿಂತ ಕಡಿಮೆ ಶೇಕಡಾವಾರು ಮತಗಳನ್ನು ಪಡೆದಿವೆ.
ಸಿಪಿಐ ಶೇ 0.8, ಜೆಡಿಎಸ್ 0.7, ಶಿರೋಮಣಿ ಅಕಾಲಿದಳ ಶೇ 0.7, ಎಲ್ಜೆಪಿ 0.4, ಡಿಎಂಕೆ 0.4 ಹಾಗೂ ಜೆಎಂಎಂ ಶೇ 0.3 ರಷ್ಟು ಮತಗಳನ್ನು ಪಡೆದಿವೆ. ಇದೇ ಮೊದಲ ಬಾರಿ ಮತಯಂತ್ರದಲ್ಲಿಯೇ ನೋಟಾ ಆಯ್ಕೆಯನ್ನು ಮತದಾರರಿಗೆ ನೀಡಲಾಗಿತ್ತು.
ಪುದುಚೇರಿಯಲ್ಲಿ ಅತೀ ಹೆಚ್ಚು ನೋಟಾ ಬಳಕೆಯಾಗಿದೆ. ಶೇ 3 ರಷ್ಟು ಮತದಾರರು ಎಲ್ಲಾ ಅಭ್ಯರ್ಥಿಗಳನ್ನು ತಿರಸ್ಕರಿಸಿದ್ದಾರೆ.