ನವದೆಹಲಿ: ತಮ್ಮ ನೇತೃತ್ವದಲ್ಲಿ ಬಿಜೆಪಿ ಅಭೂತಪೂರ್ವ ಸಾಧನೆಗೈದಿರು ವುದರಿಂದ ಹೃದಯ ತುಂಬಿದ ನರೇಂದ್ರ ಮೋದಿ ಅವರು ಈಗ ಅಪೇಕ್ಷಿಸುತ್ತಿರುವುದು ಸಂಪುಟ ರಚನೆಯಲ್ಲಿ ಸಂಪೂರ್ಣ ಸ್ವಾತಂತ್ರ್ಯ.
ಪಕ್ಷದ ಪ್ರಧಾನಿ ಅಭ್ಯರ್ಥಿಯಾದರೂ ಲೋಕಸಭಾ ಚುನಾವಣೆಯ ಟಿಕೆಟ್ ನೀಡಿಕೆ ವಿಷಯದಲ್ಲಿ ಮೋದಿ ಯಾವುದೇ ರೀತಿಯ ಹಸ್ತಕ್ಷೇಪ ಮಾಡಿಲ್ಲ, ಸಂಪುಟ ರಚನೆಯಲ್ಲಿ ಇಲ್ಲವೆ ಯಾರಿಗೆ ಯಾವ ಖಾತೆ ನೀಡಬೇಕು ಎನ್ನುವ ವಿಷಯದಲ್ಲಿಯೂ ಯಾರಿಂದಲೂ ಹಸ್ತಕ್ಷೇಪ ನಡೆಯಕೂಡದು ಎಂಬುದು ಮೋದಿ ಬೇಡಿಕೆಯಾಗಿದೆ ಎಂದು ಪಕ್ಷದ ಕೆಲ ಹಿರಿಯ ನಾಯಕರು ತಿಳಿಸಿದ್ದಾರೆ.
ಹೊಸಬರಿಗೆ ಅವಕಾಶ: ಸರ್ಕಾರ ಶಕ್ತಿಶಾಲಿ ಎನಿಸುವ ದಿಸೆಯಲ್ಲಿ ಆದಷ್ಟು ಹೊಸ ಹಾಗೂ ಯುವ ಮುಖಗಳಿಗೆ ಸಂಪುಟದಲ್ಲಿ ಅವಕಾಶ ನೀಡಬೇಕು ಎಂಬುದು ಮೋದಿ ಆಶಯವಾಗಿದೆ, ಈ ವಿಷಯದಲ್ಲಿ ಯಾವುದೇ ಮುಖಂಡರಿಂದ ಬರಬಹುದಾದ ಒತ್ತಡ ತಂತ್ರಗಳನ್ನು ಮೋದಿ ಸಹಿಸಲಾರರು ಎಂದು ಮೂಲಗಳು ತಿಳಿಸಿವೆ.