ಸಾರ್ವಜನಿಕ ಅಹವಾಲು- ಸ್ಪಂದನೆ ಭರವಸೆ

ಬೀರೂರು: ಪಟ್ಟಣದ ಕುಂದು-ಕೊರತೆಗಳ ಕುರಿತು ಪುರಸಭೆಯ ಗಮನ ಸೆಳೆದಿರುವ ಸಾರ್ವಜನಿಕ ಅಹವಾಲುಗಳನ್ನು ಮತ್ತು ಸಲಹೆಗಳನ್ನು ಪರಿಗಣಿಸಿ ಶೀಘ್ರ ಪರಿಹಾರ ಒದಗಿಸಲು ಯತ್ನಿಸುವುದಾಗಿ ಪುರಸಭಾಧ್ಯಕ್ಷ ಎಸ್.ರಮೇಶ್ ಭರವಸೆ ನೀಡಿದರು.

ಇಲ್ಲಿನ ಪುರಸಭೆ ಆವರಣದಲ್ಲಿ ಸೋಮವಾರ  ನಡೆದ ಜನಸ್ಪಂದನ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಸಭೆಯಲ್ಲಿ ಮಾತನಾಡಿದ ಹಿರಿಯ ನಾಗರಿಕ ಟಿ.ಹನುಮಂತಪ್ಪ, 12ನೇ ವಾರ್ಡ್‌ನಲ್ಲಿ ಕೆಲವು ಕಡೆ ರಸ್ತೆಯುದ್ದಕ್ಕೂ ಮೆಳೆಗಳು ಬೆಳೆದಿದ್ದು ಹಂದಿಗಳ, ಕಳ್ಳಕಾಕರ ಭಯದಲ್ಲಿ ಜನ ಸಂಚಾರ ಮಾಡಬೇಕಾದ ಸ್ಥಿತಿ ಇದೆ.ಇತ್ತ ಗಮನ ಹರಿಸಿ ಸೂಕ್ತ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದರು.

 ಗ್ರಾಹಕ ಹೋರಾಟ ಸಮಿತಿಯ ಬಿ.ವಿ.ಮಹೇಶ್ವರಪ್ಪ ಮಾತನಾಡಿ, ಪಟ್ಟಣದ ಅನೇಕ ಕಡೆ ಅಕ್ರಮ ಕಟ್ಟಡಗಳು ತಲೆ ಎತ್ತಿವೆ. ಇನ್ನು ಕೆಲವರಿಗೆ ಆಸ್ತಿಗಿಂತ ಹೆಚ್ಚು ಅಳತೆಗೆ ಅಕ್ರಮವಾಗಿ ಖಾತೆ ಮಾಡಲಾಗಿದೆ. ಅಕ್ರಮ ಕಟ್ಟಡಗಳನ್ನು ತೆರವುಗೊಳಿಸಿ. ಇಲ್ಲದಿದ್ದಲ್ಲಿ ನ್ಯಾಯಾಲಯದ ಮೊರೆ ಹೋಗಬೇಕಾಗುತ್ತದೆ ಎಂದು ಎಚ್ಚರಿಸಿದರು.

 ಆಶ್ರಯ ನಿವೇಶನ ಕುರಿತಂತೆ ಮಾಹಿತಿ ನೀಡಿದ ಸಿಬ್ಬಂದಿ ಈವರೆಗೆ 1006 ಮನೆಗಳು ನಿರ್ಮಾಣಗೊಂಡು ಕೆಲವು ತಳಪಾಯ ನಿರ್ಮಾಣ ಹಂತದಲ್ಲಿವೆ. ನಿವೇಶನ ಖಾಲಿ ಬಿಟ್ಟಿರುವವರ ಕಂಪ್ಯೂಟರೀಕೃತ ಪಟ್ಟಿ ಮಾಡಿ ಅವರಿಗೆ ಕಾರಣ ಕೇಳಿ ನೋಟಿಸ್ ಜಾರಿ ಮಾಡಲಾಗುವುದು ಎಂದು ತಿಳಿಸಿದರು.

 ಜಿಲ್ಲಾ ಮಾದಿಗ ಮೀಸಲಾತಿ ಹೋರಾಟ ಸಮಿತಿಯ ಬಿ.ಟಿ.ಚಂದ್ರಶೇಖರ್, ಬಸ್ ನಿಲ್ದಾಣದ ಮುಂದಿರುವ ಅಂಬೇಡ್ಕರ್ ಪ್ರತಿಮೆಯನ್ನು ರಸ್ತೆ ವಿಸ್ತರಣೆ ಸಮಯದಲ್ಲಿ ಸ್ಥಳಾಂತರಿಸುವ ಮಾಹಿತಿ ಇದ್ದು ಅಂಬೇಡ್ಕರ್‌ರ ಕಂಚಿನ ಪ್ರತಿಮೆ ನಿರ್ಮಿಸುವಂತೆ ಮನವಿ ಸಲ್ಲಿಸಿದರು.

 ಪಟ್ಟಣದಲ್ಲಿ ಬಡವರಿಗೆ ನಿವೇಶನ ಹಂಚಿಕೆಯಾಗಿ ದಶಕ ಕಳೆದಿದೆ. ನಿವೇಶನಕ್ಕಾಗಿ ಗುರುತಿಸಿದ ಸ್ಥಳದಲ್ಲಿ ಗಿಡ, ಗೆಂಟೆಗಳು ಬೆಳೆದು ಹಾಳು ಬಿದ್ದಿದೆ.ಅನೇಕ ಕಡೆ ಖಾಸಗಿ ನಿವೇಶನಗಳಲ್ಲಿ ಕಳೆಗಿಡಗಳು ಬೆಳೆದಿದ್ದು ನಿವೇಶನ ಸ್ವಚ್ಛಗೊಳಿಸಲು ಪುರಸಭೆಯ ಜೆಸಿಬಿ ಯಂತ್ರ ಬಳಸಿ, ಸ್ವಚ್ಛತೆ ಖರ್ಚನ್ನು ನಿವೇಶನದಾರರಿಂದ ಕಂದಾಯ ವಸೂಲು ಸಮಯದಲ್ಲಿ ಪಾವತಿಸುವಂತೆ ಸೂಚಿಸಿ ಎಂದು ಸಾರ್ವಜನಿಕರು ಆಗ್ರಹಿಸಿದರು.