ಸಾವಿನ ಸೂತಕದ ಒಬ್ಬಂಟಿ ಮನೆಗಳ ಮಣಭಾರ
ಹೆಗಲ ಮೇಲೆ ಹೊರುವ ಧವಳಪ್ಪ,
ಬೆಟ್ಟದ ಮೇಲಿನ ಮಂಗಗಳಿಗೆ
ಮಂಡಕ್ಕಿ ಚೆಲ್ಲುವ ಧವಳಪ್ಪ: ತೆರೆಯಿತು
ಫಕೀರನ ಜೋಳಿಗೆಯಲ್ಲಿ ಕಾರುಣ್ಯದ ಮಳಿಗೆ
ಬೆನ್ನಟ್ಟಿದ ಅವನು ಧವಳಪ್ಪಗೆ ಹೆಗಲೆಣೆ ಆಗಲು;
ಹೃದಯವೇ ಬಾಯಿಗೆ ಬಂದಂತಾಗಿ
ಧವಳಪ್ಪನೂ ಹಾರಿದ ಮಾರುದೂರ
ಇಬ್ಬರೂ ಬೆಟ್ಟವೇರಿದರು ಸರ ಸರ
ಇನ್ನೇನು ಹಿಡಿದ, ಹಿಡಿದೇಬಿಟ್ಟ ಎನುವಾಗ
ಸಿಡಿಲು ಬಡಿದಿತ್ತು ಗುಡ್ಡದ ತುತ್ತ ತುದೀಲಿ,
ಇಬ್ಬರ ಕಣ್ಣಲೂ ಆಕಾಶದ ಪ್ರತಿಬಿಂಬ