ಸಿಮೆಂಟ್ ರಸ್ತೆಗೆ ಹೆಗ್ಗಣಗಳ ಕನ್ನ; ಅವ್ಯವಸ್ಥೆ

ನಗರದ ಕಾಲು ಭಾಗದಷ್ಟು ಶೌಚಾಲಯ, ಚರಂಡಿ ನೀರು ಕೋಡಿಬಸವಣ್ಣ ದೇವಸ್ಥಾನದ ಬಾವಿಕಟ್ಟೆ ಕಲ್ಯಾಣ ಮಂಟಪದ ಹಿಂದೆ ಬಂದು ಸೇರುತ್ತದೆ. ಇಲ್ಲಿಂದ ಆಚೆಗೆ ಬೀಮಸಂದ್ರ ತ್ಯಾಜ್ಯ ಸಂಸ್ಕರಣಾ ಘಟಕಕ್ಕೆ ಹರಿದುಹೋಗಲು ಬೇಕಾದ ಕಾಲುವೆ ಈವರೆಗೂ ಆಗಿಲ್ಲ. ಹೀಗಾಗಿ ಕೊಳಚೆ ನೀರು ಇಲ್ಲಿನ  ಕೆರೆ, ಗದ್ದೆಗಳ ಮೇಲೆಯೇ ಹಾದು ಹೋಗುತ್ತಿದ್ದು ಹಲವು ರೋಗಳಿಗೆ ಕಾರಣವಾಗಿದೆ.

ಚಿಕ್ಕಪೇಟೆ ಸರ್ಕಲ್, ಅಗ್ರಹಾರದ ಮುಖ್ಯರಸ್ತೆ, ಹಳೆ ಪೊಲೀಸ್ ಠಾಣೆ ರಸ್ತೆ, ಆಚಾರ್ಯರ ಬೀದಿ, ಶಿಶುವಾರದ ಹಿಂಭಾಗ, ಗಾರ್ಡನ್ ರಸ್ತೆ, ಹರಿಸಿಂಗ್‌ರ ಬೀದಿ, ಕಾರಂಜಿ ಆಂಜನೇಯ ದೇವಸ್ಥಾನದ ಹಿಂದಿನ ರಸ್ತೆ, ಅಯ್ಯಪ್ಪಸ್ವಾಮಿ ದೇವಸ್ಥಾನದ ರಸ್ತೆ, ಚಿಕ್ಕಪೇಟೆ ಮುಖ್ಯರಸ್ತೆಗಳ ಪಾಡು ಕೂಡ ಕೇಳುವವರಿಲ್ಲವಾಗಿದೆ.
ಹಳೆ ಪೊಲೀಸ್ ಠಾಣೆ ರಸ್ತೆಯನ್ನು ಅಭಿವೃದ್ಧಿಪಡಿಸಲು ರೂ. 30 ಲಕ್ಷಕ್ಕೆ ಟೆಂಡರ್ ಕರೆದು ತಿಂಗಳುಗಳೇ ಕಳೆದರೂ ಗುತ್ತಿಗೆದಾರರು ಕಾಮಗಾರಿ ಆರಂಭಿಸದೇ ಇರುವುದು ಸಂಶಯಕ್ಕೆ ಕಾರಣವಾಗಿದೆ. ಇನ್ನು ಒಳಚರಂಡಿ, ಕಾಂಕ್ರೀಟ್ ರಸ್ತೆಗಾಗಿ ಒಂದೂವರೆ ಕೋಟಿ ರೂಪಾಯಿ ವೆಚ್ಚದ ಕಾರ್ಯಾದೇಶ (ವರ್ಕ್ ಆರ್ಡರ್) ಕೂಡ ಆಗಿದೆ. ಆದರೆ ಕೆಲಸ ಮಾತ್ರ ಆರಂಭವಾಗುತ್ತಿಲ್ಲ.

`ಪಾಲಿಕೆಯಲ್ಲಿ ಭ್ರಷ್ಟಚಾರದ ಕುರಿತು ದ್ವನಿ ಎತ್ತುತ್ತಿರುವುದರಿಂದ ನಾನು ಪ್ರತಿನಿಧಿಸುವ ವಾರ್ಡ್‌ನ ಭಾಗಗಳ ಅಭಿವೃದ್ಧಿಯನ್ನು ತಡೆ ಹಿಡಿಯಲಾಗಿದೆ. ಆಚಾರ್ಯರ ಬೀದಿ ಅಭಿವೃದ್ಧಿಗಾಗಿ ವರ್ಕ್ ಆರ್ಡರ್ ಕೂಡ ಆಗಿದೆ. ಈವರೆಗೂ ಗುತ್ತಿಗೆದಾರರು ಯಾರೆಂಬುದೇ ಗೊತ್ತಿಲ್ಲ. ಕೆಲಸ ಆರಂಭಿಸುವಂತೆ ಅಧಿಕಾರಿಗಳಿಗೆ ಮನವಿ ಮಾಡಿ ಸಾಕಾಗಿ ಹೋಗಿದೆ. ನಾನು ಅನುದಾನ ತರಬಹುದು. ಆದರೆ ಕೆಲಸ ಮಾಡಿಸುವುದು ಅಧಿಕಾರಿಗಳ ಕೆಲಸ. ರಾಜಕೀಯ ಒತ್ತಡದಿಂದ ಅಧಿಕಾರಿಗಳು ಕೆಲಸ ಮಾಡುತ್ತಿಲ್ಲ~ ಎಂದು ಪಾಲಿಕೆ ಸದಸ್ಯ ತರುಣೇಶ್ ದೂರುತ್ತಾರೆ.

ನಗರ ಸಾರಿಗೆ ಶಿರಾಗೇಟ್, ಗಾರ್ಡ್‌ನ ರಸ್ತೆ, ದಿಬ್ಬೂರು, ಬೆಳ್ಳಾವಿ ರಸ್ತೆ ಮೂಲಕ  ಹೆಗ್ಗರೆಗೆ ಸಂಚರಿಸಿದರೆ ಅನುಕೂಲವಾಗುತ್ತದೆ ಎಂಬುದು ಇಲ್ಲಿನ ಜನರ ಬೇಡಿಕೆಯಾಗಿದೆ.