ಮಾಸ್ಕೊ (ಪಿಟಿಐ): ಭಾರತೀಯ ವಾಯುಪಡೆಯ ಸುಧಾರಿತ ಮಿಗ್-29 ಯುದ್ಧವಿಮಾನದ ಪರೀಕ್ಷಾರ್ಥ ಹಾರಾಟ ಇಲ್ಲಿನ ಝುಕೋವ್ಸ್ಕಿ ವಾಯುನೆಲೆಯಲ್ಲಿ ಯಶಸ್ವಿಯಾಗಿ ನಡೆದಿದೆ.
ವಿಮಾನದ ತಯಾರಕ ಸಂಸ್ಥೆಯಾದ ರಷ್ಯದ ಆರ್ಎಸಿ ಮಿಗ್ ಕಾರ್ಪೊರೇಷನ್ ಈ ಪ್ರಥಮ ಹಾರಾಟವನ್ನು ನಡೆಸಿ ಯಶಸ್ವಿಯಾಗಿದೆ ಎಂದು ಸಂಸ್ಥೆಯ ವಕ್ತಾರರು ತಿಳಿಸಿದ್ದಾರೆ. ಕಣ್ಣಿಗೆ ಕಾಣಿಸದಷ್ಟು ದೂರದಲ್ಲಿರುವ ವೈರಿಗಳನ್ನು ಗುರುತಿಸುವಂತಹ ಅತ್ಯಾಧುನಿಕ ಫಜಾಟ್ರಾನ್ ಝುಕ್-ಎಂ ರಾಡಾರ್ ಅಳವಡಿಕೆ ಸಹಿತ ಯುದ್ಧವಿಮಾನದಲ್ಲಿ ಸುಧಾರಣೆ ತರಲಾಗಿದೆ. ಒಟ್ಟು 69 ಮಿಗ್-29 ವಿಮಾನಗಳನ್ನು 900 ದಶಲಕ್ಷ ಡಾಲರ್ ವೆಚ್ಚದಲ್ಲಿ ಮೇಲ್ದರ್ಜೆಗೆ ಏರಿಸಲಾಗುತ್ತಿದ್ದು, ಆರು ಯುದ್ಧವಿಮಾನಗಳನ್ನು ರಷ್ಯದಲ್ಲಿ ಮೇಲ್ದರ್ಜೆಗೆ ಏರಿಸಿದರೆ, ಉಳಿದವುಗಳನ್ನು ಭಾರತದಲ್ಲಿ ಎಚ್ಎಎಲ್ ಮೇಲ್ದರ್ಜೆಗೆ ಏರಿಸಲಿದೆ.